ဖိလစ်ပိုင်သမ္မတက အိုဘားမားအား ရိုင်းစိုင်းစွာဆဲဆို

စက်တင်ဘာ ၆၊ ၂၀၁၆
M-Media

– ဖိလစ်ပိုင်သမ္မတ ရော်ဒရီဂို ဒူတာတီ၏ ရိုင်းစိုင်းစွာ ဆဲရေးတိုင်းထွာခြင်းကို ခံခဲ့ရပြီးနောက် အမေရိကန်သမ္မတ အိုဘားမားမှာ ၎င်းနှင့်တွေ့ဆုံရန် အစီအစဉ်ကို ဖျက်သိမ်းလိုက်သည်ဟု အိမ်ဖြူတော် ပြောရေးဆိုခွင့်ရှိသူ နဒ် ပရိုက်စ်က ပြောကြားလိုက်သည်။

လာအိုနိုင်ငံတွင် ပြုလုပ်မည့် အရှေ့တောင်အာရှခေါင်းဆောင်များ ထိပ်သီးအစည်းအဝေးသို့ မသွားရောက်မီ တနင်္လာနေ့ သတင်းစာရှင်းလင်းပွဲတွင် ဒူတာတီက အိုဘားမားအား “-ာသည်မသား” ဟု ဆဲရေးခဲ့ခြင်းဖြစ်ပြီး၊ မိမိအနေဖြင့် အိုဘာမား၏ လူ့အခွင့်အရေး သင်တန်းပေးမှုကို ခံယူမည်မဟုတ်ဟုလည်း ဆိုသည်။

“ခင်ဗျားအနေနဲ့ လေးစားသမှုရှိရမယ်။ မေးခွန်းထုတ်တာတွေ၊ ကြေငြာချက်ထုတ်တာတွေကို ခေါက်ထားလိုက်ပါ။ -ာသည်မသားရေ – ခင်ဗျားကို အဲဒီဖိုရမ်မှာ ကျုပ် ကျိန်စာတိုက်မယ်။ ခင်ဗျား ဒါမျိုးတွေလာလုပ်ရင် ကျုပ်တို့ ၀က်တွေလို ရွှံ့ထဲမှာလူးပြမယ် (အရွဲ့တိုက်ပြမယ်)” ဟု ဖိလစ်ပိုင်သမ္မတက ပြောကြားခဲ့သည်။

ဒူတာတီမှာ ယနေ့တွင် အိုဘားမားနှင့်တွေ့ဆုံရန် စီစဉ်ထားသော်လည်း ပရိုက်စ်ကမူ သမ္မတ အိုဘားမားက ထိုအစီအစဉ်ကို ဖျက်သိမ်းလိုက်ပြီး တောင်ကိုရီးယားသမ္မတ ပတ်ဂျုံဟေးနှင့်သာ တွေ့ဆုံမည်ဟု ဆိုသည်။

မူးယစ်ဆေးဝါးပြဿနာကို နှိမ်နှင်းမည်ဟူသော ကတိဖြင့် ပြီးခဲ့သည့်မေလက အာဏာရခဲ့သည့် ဖိလစ်ပိုင်သမ္မတ ဒူတာတီမှာ၊ ၎င်း၏ ကတိက၀တ်ကို အကောင်အထည်ဖော်ရာတွင် အပြင်းထန်ဆုံး နည်းလမ်းများကို အသုံးပြုခဲ့ပြီး ၎င်း၏ မူးယစ်နှိမ်နှင်းမှုအတွင်း လက်ရှိအချိန်အထိ လူပေါင်း ၂၄၀၀ ကျော် သေဆုံးခဲ့ပြီဖြစ်သည်။

ထိုကဲ့သို့ တရားလက်လွတ်သတ်ဖြတ်မှုများကြောင့် လူ့အခွင့်အရေးအဖွဲ့များက ဝေဖန်မှုများ ရှိနေပြီး တရုတ်နိုင်ငံတွင် ကျင်းပပြုလုပ်ခဲ့သည့် G20 ထိပ်သီးအစည်းအဝေးတွင် အိုဘားမားက မူးယစ်ဆေးဝါးမှာ ဖိလစ်ပိုင်၏ အဓိကပြဿနာတစ်ခု ဖြစ်သော်လည်း လူ့အခွင့်အရေး ချိုးဖောက်မှုများအတွက် သတိပေးရန် နောက်တွန့်နေမည်မဟုတ် ပြောကြားခဲ့သည်။

Ref : Aljazeera