News @ M-Media

ဖိလစ်ပိုင်သမ္မတ၏ တရားလက်လွတ် သတ်ဖြတ်မှုများကို ကုလ စုံစမ်းမည်

စက်တင်ဘာ ၂၇၊ ၂၀၁၆
M-Media

duterte-2

– ကုလသမဂ္ဂ လူ့အခွင့်အရေးဆိုင်ရာ အထူးကိုယ်စားလှယ်တစ်ဦးဖြစ်သူ အဂ်နက်စ် ကာလာမာ့ဒ်က မိမိအနေဖြင့် ဖိလစ်ပိုင်သို့ သွားရောက်ကာ သမ္မတ ဒူတာတေးက ရာဇ၀တ်ကောင်များအပေါ် ဆင်နွှဲနေသည့် စစ်ပွဲနှင့်ပတ်သက်၍ စုံစမ်းစစ်ဆေးရန် ဆန္ဒရှိနေသည်ဟု ပြောကြားလိုက်သည်။

ယမန်နေ့က AFP သတင်းဌာနသို့ ပေးပို့သည့် အီးမေးလ်တွင် ပြောကြားလိုက်ခြင်းဖြစ်ပြီး ထိုသို့ဆန္ဒရှိသော်လည်း မိမိ တွေ့ဆုံစကားပြောဆိုရန် စီစဉ်ထားသူများအတွက် လုံခြုံရေးအာမံချက် ရှိ၊ မရှိကိုလည်း ဆန်းစစ်နေသည်ဟု ဆိုသည်။

မူးယစ်ဆေးဝါး တရားမ၀င် ရောင်းဝယ်ဖောက်ကားမှုအပေါ် နှိမ်နင်းမည့်အစီအစဉ် တစ်စိတ်တစ်ပိုင်းအဖြစ် ရာဇ၀တ်ကောင် ၁ သိန်းကို သတ်ပစ်မည်ဟူသော ကတိဖြင့် ၂၀၁၆ ခုနှစ် မေလတွင် အာဏာရလာပြီးနောက် သမ္မတ ဒူတာတေးမှာ ကတိအတိုင်း ဆောင်ရွက်ခဲ့ပြီး ၎င်း၏ မူးယစ်နှိမ်နှင်းရေးအစီအစဉ်တွင် လူပေါင်းထောင်ချီ သေဆုံးခဲ့ပြီးဖြစ်သည်။

ထိုကဲ့သို့ တရားလက်လွတ် သတ်ဖြတ်မှုများကြောင့် ဝေဖန်မှုများကို အပြင်းအထန် ခံနေရသော်လည်း ဒူတာတေးက ကုလသမဂ္ဂနှင့် ဥရောပသမဂ္ဂမှ ကျွမ်းကျင်သူများကို ၎င်း သမ္မတတာဝန်ယူပြီးချိန်မှစ၍ ထောင်ပေါင်းများစွာသော သုတ်သင်မှုများအပေါ် စုံစမ်းစစ်ဆေးခွင့်ပေးမည်ဟု ပြီးခဲ့သည့်သီတင်းပတ်တွင် ပြောကြားခဲ့ပြီး ၎င်းတို့နှင့် လူထုရှေ့ မျက်နှာချင်းဆိုင် စကားစစ်ထိုးမည်ဟုလည်း စိန်ခေါ်ခဲ့သည်။

ဖိလစ်ပိုင်အစိုးရက ဖိတ်ကြားခြင်း မရှိသေးသော်လည်း ကာလာမာ့ဒ်က မိမိအနေဖြင့် တရားလက်လွတ်သတ်ဖြတ်မှု၊ ဥပဒေမဲ့ ကျူးလွန်မှုများကို စုံစမ်းစစ်ဆေးရန်အတွက် တောင်းဆိုသွားမည်ဟု ဆိုသည်။

“တရားလက်လွတ် သတ်ဖြတ်မှုတွေကို စုံစမ်းဖို့ ကုလသမဂ္ဂကို ဖိတ်ကြားမယ်လို့ ဖိလစ်ပိုင်သမ္မတနဲ့ အစိုးရက မီဒီယာတွေကနေတဆင့် ဖိတ်ခေါ်တဲ့ကိစ္စကို ကျွန်မ ကြိုဆိုပါတယ်” ဟု သူမကဆိုပြီး ၎င်းနှင့် စကားပြောဆိုသူများမှာ လက်စားချေမခံရစေရန်အတွက်လည်း ဖိလစ်ပိုင်အစိုးရကို တောင်းဆိုသွားမည်ဟု ပြောကြားခဲ့သည်။

“လိုအပ်တဲ့ အာမခံချက်တွေ တောင်းဆိုမှုနဲ့အတူ သွားမယ့်နေ့နဲ့ အချက်အလက်ရှာဖွေရေးလုပ်ငန်းစဉ်အတွက် အစိုးရနဲ့ ဆွေးနွေး ညှိနှိုင်းသွားမှာပါ”

ထို့ပြင် ၎င်း၏ တောင်းဆိုမှုများတွင် လွတ်လပ်စွာလှုပ်ရှားသွားလာခွင့်၊ လွတ်လပ်စွာ စုံစမ်းစစ်ဆေးခွင့်၊ ၎င်းနှင့် ပူးပေါင်းဆောင်ရွက်သူများအတွက် လုံခြုံရေး၊ လက်စားချေမခံရရေး စသည်တို့ ပါဝင်မည်ဟု ကာလာမာ့ဒ်က ထည့်သွင်းပြောကြားခဲ့သည်။

Ref : Bangkokpost

Comments

Leave a Reply