News @ M-Media

ရခိုင်တွင် ကျူးလွန်မှုများကို မြန်မာစစ်တပ်က တာဝန်ခံရေး ဆောင်ရွက်ရန် ကုလကို အမေရိကန် တိုက်တွန်း

ဖေဖော်ဝါရီ ၁၄၊ ၂၀၁၈
M-Media

ကုလဆိုင်ရာ အမေရိကန်သံအမတ် နစ်ကီဟာလေး

– ရိုဟင်ဂျာတွေ လူမျိုးစုလိုက် သုတ်သင်ရှင်းလင်းခံရတာကို မြန်မာနိုင်ငံက ငြင်းဆိုနေတာဟာ ‘အလွန်အမင်း မိုက်မဲတဲ့’ လုပ်ရပ်ဖြစ်တယ်လို့ အမေရိကန်က ပြောကြားလိုက်ပြီး ကျူးလွန်ခဲ့တာတွေအတွက် မြန်မာစစ်တပ်က တာဝန်ခံရေး၊ မြန်မာနိုင်ငံမှာ ဖြစ်ပျက်နေတဲ့ ကြောက်မယ်ဖွယ်ရာ အခြေအနေတွေကို ၀န်ခံဖို့ ဒေါ်အောင်ဆန်းစုကြည်ကို ဖိအားပေးရေး လုံခြုံရေးကောင်စီကိုလည်း တိုက်တွန်းခဲ့ပါတယ်။

“မြန်မာအစိုးရထဲက အာဏာပါဝါရှိတဲ့ အင်အားစုတွေဟာ ရခိုင်ပြည်နယ်က လူမျိုးစုလိုက် ရှင်းလင်းသုတ်သတ်မှုကို ငြင်းဆိုထားပါတယ်။ သူတို့ရဲ့ ဒီမိုက်မဲတဲ့ ငြင်းဆိုမှုတွေနဲ့ ကွဲလွဲတဲ့စကားတွေ ထွက်မလာစေဖို့ ရက်စက်ကြမ်းကြုတ်မှုတွေကို မြင်တွေ့သွားနိုင်တဲ့ ကုလလုံခြုံရေးကောင်စီအပါအ၀င် ဘယ်သူ့ကို၊ ဘယ်အဖွဲ့အစည်းကိုမှ ရခိုင်ပြည်နယ်ကို ၀င်ရောက်ခွင့်မပေးတာ ဖြစ်ပါတယ်” လို့ ကုလဆိုင်ရာ အမေရိကန်သံအမတ် နစ်ကီဟာလေးက မနေ့ကပြုလုပ်တဲ့ လုံခြုံရေးကောင်စီ အစည်းအဝေးမှာ ပြောကြားခဲ့ပါတယ်။

ရိုဟင်ဂျာမွတ်စလင်တွေ အစုလိုက်အပြုံလိုက် သတ်ဖြတ်ခံရမှုကို သတင်းလိုက်တဲ့အတွက် ဖမ်းဆီးခံထားရတဲ့ ရိုက်တာသတင်းထောက်နှစ်ဦးကို ခြွင်းချက်မရှိ ချက်ခြင်းပြန်လွှတ်ပေးဖို့လည်း ဟာလေးက တိုက်တွန်းခဲ့ပါတယ်။

ကုလဆိုင်ရာ ပြင်သစ်သံအမတ် Francois Delattre က ရိုက်တာသတင်းဌာနကနေ ဖော်ထုတ်တဲ့ ရိုဟင်ဂျာတွေ အစုလိုက်အပြုံလိုက် အသတ်ခံရမှုဟာ ‘လူသားထုအပေါ် ကျူးလွန်တဲ့ ရာဇ၀တ်မှုအဖြစ်’ သတ်မှတ်လို့ရနေပြီလို့ ပြောကြားခဲ့ပါတယ်။

ရိုဟင်ဂျာမွတ်စလင်တွေအပေါ် လူမျိုးစုလိုက် သုတ်သင်ရှင်းလင်းမှု လုပ်နေတယ်ဆိုတဲ့ စွပ်စွဲချက်တွေအပေါ် မြန်မာအစိုးရနဲ့ စစ်တပ်တို့က ငြင်းဆိုထားပါတယ်။

လုံခြုံရေးကောင်စီမှာ ဗီတိုအာဏာကိုင်ထားတဲ့ ရုရှားနဲ့ တရုတ်တို့ကတော့ ရခိုင်ပြည်နယ်က အခြေအနေဟာ တည်ငြိမ်နေတယ်လို့ မနေ့မှာ ပြောကြားခဲ့ပါတယ်။

ရိုဟင်ဂျာတွေကို အစုလိုက်အပြုံလိုက် သတ်ဖြတ်မြှုပ်နှံထားတဲ့ ကိစ္စတွေအတွက် စိုးရိမ်ကြောင်း ဗြိတိန်၊ နယ်သာလန်၊ ပြင်သစ်၊ ကာဇက်စတန်နဲ့ ဆွီဒင်တို့ကလည်း လုံခြုံရေးကောင်စီမှာ ပြောကြားခဲ့ပါတယ်။

Ref: Reuters