စက်တင်ဘာ ၁၇၊ ၂၀၁၈
M-Media
– ရှင်ကျန်းပြည်နယ်က ၀ီဂါမွတ်စလင်တွေကို တရုတ်အစိုးရက ဖိနှိပ်နေတယ်ဆိုတဲ့ သတင်းတွေအတွက် မိမိတို့အနေနဲ့ တရုတ်အစိုးရနဲ့ ဆွေးနွေးနေတယ်လို့ အီရန် နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ ဘဟ်ရမ် ကာစေမီက ပြောကြားလိုက်ပါတယ်။
တရုတ်ဟာ တူရကီစကားပြော ၀ီဂါမွတ်စလင် တစ်သန်းကျော်လောက်ကို အကျဉ်းစခန်းတွေမှာ ပိတ်လှောင်ထားတယ်လို့ လူ့အခွင့်အရေးစောင့်ကြည့်အဖွဲ့ HRW က ဖွင့်ချခဲ့ပြီးတဲ့နောက် အမေရိကန်အပါအ၀င် ကမ္ဘာတစ်ဝှမ်းက တရုတ်အစိုးရကို ဝေဖန်ခဲ့ကြပါတယ်။
အမေရိကန်နိုင်ငံခြားရေးဝန်ကြီး မိုက်ပွမ်ပီယိုကလည်း ဒီကိစ္စမှာ အီရန်ဟာ နှုတ်ဆိတ်နေတယ်လို့ Twitter မှာ ရေးသားခဲ့ပါတယ်။
ကာစေမီက ပွမ်ပီယိုရဲ့ ဒီပြောကြားမှုကို ပြန်လည်တုန့်ပြန်ခဲ့ပြီး အီရန်က ကမ္ဘာတစ်ဝှမ်းမှာရှိတဲ့ မွတ်စလင်တွေကို အမြဲတမ်း ကူညီပံ့ပိုးသွားမယ်လို့ ပြောကြားခဲ့ပါတယ်။
“တရုတ်အစိုးရနဲ့ ကျွန်တော်တို့အကြား ရှိနေတဲ့ ဆက်ဆံရေးလမ်းကြောင်းကနေ ဒီကိစ္စကို ဆွေးနွေးအဖြေရှာဖို့၊ အပြုသဘောဆောင်တဲ့ ကဏ္ဍကနေ ပါဝင်ဖို့ ကျွန်တော်တို့ ကြိုးစားနေပါတယ်။ သူ့(ပွမ်ပီယို)ရဲ့စကားကို ကျွန်တော်တို့ သိပ်ပြီး အဖက်မလုပ်ပါဘူး။ အမေရိကန်က မောက်မာတဲ့ခေါင်းဆောင်တွေရဲ့ ပါးစပ်ကနေ ထွက်လာတဲ့ စကားတွေနဲ့ သူတို့ရဲ့ရည်ရွယ်ချက်ဟာ အီရန်နိုင်ငံရဲ့ ပုံရိပ်ကို ပျက်ဆီးစေဖို့ပဲ ဖြစ်ပါတယ်”
အီရန်-အာဖဂနစ္စတန်-အိန္ဒိယ ၃ ပွင့်ဆိုင်ဆွေးနွေးပွဲနဲ့ပတ်သက်ပြီး ကာစေမီက ဒီလိုအစည်းအဝေးတွေဟာ အမေရိကန်ရဲ့ အနိုင်ကျင့်လိုတဲ့ပေါ်လစီကို ဆန့်ကျင်နေတဲ့ အီရန်အတွက် အပြုသဘောဆောင်လိမ့်မယ်လို့ ထည့်သွင်းပြောဆိုခဲ့ပါတယ်။
Ref: IRNA