အောက်တိုဘာ ၃၁၊ ၂၀၁၉
M-Media
-ဆော်ဒီ-ယူအေအီး နှစ်နိုင်ငံ ပူးတွဲဗီဇာထုတ်ပေးရေး နှစ်နိုင်ငံတာဝန်ရှိသူတွေ ပူးပေါင်းဆောင်ရွက်နေကြတယ်လို့ အာရပ်စော်ဘွားများပြည်ထောင်စု (ယူအေအီး) စီးပွားရေးဝန်ကြီး ဆူလ်တန် အလ်-မန်ဆူရီက ပြောကြားလိုက်ပါတယ်။
ပူးတွဲဗီဇာထုတ်ပေးမှုဟာ ၂၀၂၀ ခုနှစ်မှာ စတင်အကြုံးဝင်မှာဖြစ်ပြီး ခရီးသွားသူတွေအနေနဲ့ ဗီဇာတစ်ခုတည်းနဲ့ ၂ နိုင်ငံစလုံးကို သွားရောက်နိုင်မှာဖြစ်ပါတယ်။ လက်ရှိမှာတော့ ပူးတွဲဗီဇာထုတ်ပေးနိုင်ရေး ဆော်ဒီနဲ့ ယူအေအီးအာဏာပိုင်တွေက ညှိနှိုင်းဆွေးနွေးမှုတွေ လုပ်ဆောင်နေပါတယ်။
နိုင်ငံအတွင်းဝင်ရောက်တဲ့ ကမ္ဘာလှည့်ခရီးသွားအရေအတွက် တိုးတက်ရေး ဆော်ဒီရဲ့ ကြိုးပမ်းဆောင်ရွက်မှုကနေ ရရှိလာမယ့် အလားအလာတွေကို အမိအရ ဆုပ်ကိုင်နိုင်ဖို့ ကြိုးပမ်းမှုဖြစ်တယ်လို့ အလ်-မန်ဆူရီက ဆိုပါတယ်။
ဒီဆောင်ရွက်မှုကြောင့် ခရီးသွားလာရေးလုပ်ငန်းသာမက နှစ်နိုင်ငံ စီးပွားရေးနဲ့ ရင်းနှီးမြှုပ်နှံမှု လုပ်ငန်းတွေမှာပါ တိုးတက်လာဖို့ မျှော်လင့်ထားပါတယ်။
အလ်-မန်ဆူရီက ပူးတွဲဗီဇာထုတ်ပေးရင် ခရီးသွားတွေ မြင့်တက်လာမှာဖြစ်တဲ့အတွက် လေယာဉ်ခရီးစဉ်တွေ တိုးချဲ့ပြေးဆွဲဖို့ လိုအပ်တယ်လို့လည်း ထည့်သွင်းပြောကြားခဲ့ပါတယ်။
Ref: Saudi Gazette