အောက်တိုဘာ ၁၇၊ ၂၀၂၀
M-Media
-လူနည်းစုတွေအပေါ် တရုတ်အစိုးရရဲ့ ဖိနှိပ်မှုတွေကို ထုတ်ဖော်ပြောဆိုရာမှာ ကြောက်ရွံ့နေမှာ မဟုတ်ဘူးလို့ ကနေဒါက ပြောကြားလိုက်ပါတယ်။
ဟွာဝေးကုမ္ပဏီရဲ့ ဘဏ္ဍာရေးအကြီးအကဲကို ၂၀၁၈ ခုနှစ် ဒီဇင်ဘာလာမှာ ကနေဒါက ဖမ်းဆီးခဲ့ပြီးတဲ့နောက်ပိုင်း တရုတ်နဲ့ ကနေဒါတို့အကြား တင်းမာမှုတွေ မြင့်တက်လာခဲ့တာပါ။ တရုတ်ကလည်း ကနေဒါ သံအမတ်ဟောင်းတစ်ဦးနဲ့ စီးပွားရေးလုပ်ငန်းရှင်တစ်ဦးကို သူလျှိုမှုနဲ့ တရားစွဲခဲ့သလို၊ အခြား ကနေဒါနိုင်ငံသားတစ်ဦးကိုလည်း အခုနှစ် ဩဂုတ်လမှာ မူးယစ်မှုနဲ့ သေဒဏ်ချမှတ်ခဲ့ပါတယ်။
ဟောင်ကောင်သားတစ်ချို့ကို ကနေဒါက ခိုလှုံခွင့်ပေးမှုကို ကနေဒါနိုင်ငံဆိုင်ရာ တရုတ်သံအမတ် ကျိုပင်းက ကြာသာပတေးနေ့မှာ ဝေဖန်ခဲ့ပြီး နောက်ဆက်တွဲအဖြစ် ဟောင်ကောင်မှာ နေထိုင်နေတဲ့ ကနေဒါနိုင်ငံသား ၃ သိန်းလောက်ရဲ့ ကျန်းမာရေးနဲ့ လုံခြုံရေးကို ထိခိုက်စေလိမ့်မယ်လို့ သတိပေးခဲ့ပါတယ်။
“ကမ္ဘာတစ်ဝှမ်းလုံးက လူ့အခွင့်အရေးအခြေအနေနဲ့ပတ်သက်ပြီး ကျွန်တော်တို့ မားမားမတ်မတ်ရပ်တည်ကာ၊ ကျယ်ကျယ်လောင်လောင် ပြောနေအုံးမှာပါ။ ဝီဂါမွတ်စလင်တွေရဲ့ လူ့အခွင့်အရေးကိစ္စပဲဖြစ်ဖြစ်၊ ဟောင်ကောင်က စိုးရိမ်စရာ အခြေအနေတွေကိုပဲ ဖြစ်ဖြစ်၊ တရုတ်ရဲ့ နိုင့်ထက်စီးနင်းပြုတဲ့ သံတမန်အရေးကိစ္စပဲ ဖြစ်ဖြစ်ပေ့ါ” လို့ ကနေဒါဝန်ကြီးချုပ် ဂျပ်စတင် ထရူဒူက မနေ့မှာ ပြောကြားခဲ့ပါတယ်။
ဒါပေမယ့် နှစ်နိုင်ငံဆက်ဆံရေးကို မတင်းမာစေလို့ဘူးလို့လည်း ထရူဒူက ဆိုပါတယ်။
ကနေဒါနိုင်ငံခြားရေးဝန်ကြီး ဖရန်ကိုအစ် ဖိလစ် ရှန်ပိန်ကလည်း တရုတ်သံအမတ်ရဲ့ မှတ်ချက်ဟာ လက်မခံနိုင်စရာ၊ စက်ဆုပ်ဖွယ်ရာ မှတ်ချက်မျိုး ဖြစ်တယ်လို့ အစောပိုင်းမှာ တုန့်ပြန်ပြောကြားခဲ့ပါတယ်။
Ref: Reuters