ဒီဇင်ဘာ ၂ ၊ ၂၀၁၂
M-Media
မောင်လျှောက်(မြယာမြေ)
အစ္စလာမ်ဘာသာဝင်များအတွက် ဟဂ်ျဘုရားဖူး ခရီးစဉ်သည် ပဉ္စမမဏ္ဍိင် တာဝန်ဖြစ်သည့်အား လျော်စွာ မြန်မာနိုင်ငံသား အစ္စလာမ်ဘာသာဝင်များသည် ကျမ်းမြတ် ကုရ်အာန် ပြဋ္ဌာန်းချက်များနှင့် အညီ ငွေကြေးတတ်နိုင်သူများမှာ တသက်တွင် တခေါက် ဆော်ဒီအာရေဗျနိုင်ငံ မက္ကာမြို့ရှိ ကအ်ဗာ ဝတ်ကျောင်းတော်သို့ ဟဂ်ျပြုလုပ်ကြပါသညည်။
Photo (Peace Forall Faceboook)
ယခုနှစ်တွင် ဆော်ဒီသံရုံးမှ ဟဂ်ျဗီဇာခွဲတမ်း (၅၀၀၀) ရရှိခဲ့ပြီး နိုင်ငံတော် အစိုးရမှ စေလွှတ်သော မြန်မာဟာဂျီ (၃၅၀) နှင့် ပြင်ပ ပုဂ္ဂလိက ဟဂ်ျဘုရားဖူး အေးဂျင့် ကုမ္ပဏီများနှင့် သွားလာသူများလည်းရှိကြောင်း သိရသည်။ မြန်မာနိုင်ငံမှ အေးဂျင့် အချို့သည် မြန်မာဟာဂျီများကို မလိမ့်တပတ်လုပ်ကာ (၂၀၁၀) နှင့် (၂၀၁၁) ခုနှစ်တွင် မြန်မာဟာဂျီများ အခက်အခဲတွေ့ခဲ့ရကြောင်း၊ ယခုနှစ်ဟဂ်ျရာသီမှာတော့ ခရိုနီများ လွှမ်းမိုးမှု လျော့နည်းလာကာ ၀န်ဆောင်မှု တိုးတက်လာကြောင်း (၂၀၁၂) ခုနှစ်တွင် ဟဂ်ျဘုရားဖူး ခရီးစဉ်မှ ပြန်လာသော ဟာဂျီတစ်ဦးက ဆိုပါသည်။
သို့သော်လည်း မြန်မာနိုင်ငံမှ ဟဂ်ျဘုရားဖူးသွားရာတွင် မတန်တဆဈေးပေးနေရခြင်း၊ ဗီဇာအတွက် အခက်အခဲရှိခြင်း၊ အေးဂျင့်အချို့သည် ရန်ကုန်တွင်တစ်မျိုးပြောပြီး ဟဂ်ျ ခရီးစဉ်ရောက်မှ အပြောနှင့်လက်တွေ့မကိုက်ညီခြင်း၊ အထုပ်အပိုးများအတွက် သေချာစီစဉ်မပေးခြင်း၊ တည်းခိုရန်နေရာ စီစဉ်မပေးခြင်း၊ အခက်အခဲဖြစ်ခြင်း၊ အချို့သည်မောက်မာစွာ ဆက်ဆံခြင်းများရှိကြောင်း သိရသည်။ ထို့ပြင် ဟဂ်ျဘုရားဖူး ခရီးစဉ်သွားရာတွင် အချို့သော ကုမ္ပဏီများ၏ မသမာမှုကြောင့် ဟဂ်ျဗီဇာ မရရှိခြင်း၊ လေကြောင်းခရီးစဉ် မစီစဉ်ပေးနိုင်ခြင်းတို့ကြောင့် (၂၀၁၁) ခုနှစ်တွင် ဟာဂျီလောင်း (၂၀၀၀)ဦးခန့် ဟဂ်ျသွားခွင့် မရရှိခဲ့ကြောင်း၊ ယခုနှစ်မှာတော့ အလားတူဖြစ်စဉ်များ မရှိကြောင်း သိရသည်။
ယခင်က ဟဂ်ျဘုရားဖူးခရီးစဉ်သွားရာတွင် သာသနာရေး ၀န်ကြီးဌာနမှစေလွှတ်သော ဟာဂျီလောင်းများမှာ အဆင်ပြေမှုများရှိခဲ့ပြီး နိုင်ငံတော်အစိုးရက အစ္စလာမ်ဘာသာဝင် အများကြည်ညို လေးစားသည့် ပုဂ္ဂိုလ်များ၊ ဘာသာရေးခေါင်းဆောင်များ၊ အသိပညာရှင်၊ အတတ်ပညာရှင်များ စသည်ဖြင့် ပါဝင်သော ဟဂ်ျမစ်ရှင်၊ ဟဂ်ျကော်မတီ စသည်ဖြင့် ဖွဲ့စည်းစေလွှတ်ခဲ့ပါသည်။
Photo (Peace Forall Faceboook)
ယခုနောက်ပိုင်းတွင် သာသာနာရေးဝန်ကြီးဌာန၏လမ်းညွှန်မှု၊ အစ္စလာမ်ဘာသာရေးအဖွဲ့ကြီး(၅)ဖွဲ့မှ ဦးဆောင်မှုတို့ဖြင့် ဟဂ်ျခရီးစဉ် အဆင်ပြေအောင် ဆောင်ရွက်ပေးခဲ့မှုများ ရှိသော်လည်း မလိုလားအပ်သော ပြသနာ အချို့ ပေါ်ပေါက်ခဲ့မှုများလည်း ရှိသည်။ တဖက်မှာလည်း ဟဂ်ျခရီးစဉ်ကူညီအရေး အဖွဲ့ချုပ်မှ နစ်နာခဲ့သော ဟာဂျီများအတွက် ကူညီဆောင်ရွက် ပေးနေကြောင်း သိရသည်။
မြန်မာနိုင်ငံသား အစ္စလာမ် ဘာသာဝင်များကမူ အမိနိုင်ငံတော် အတွက်လည်း ဂုဏ်သိက္ခာရှိစေရန် ဟဂ်ျဘုရားဖူး သွားရာတွင် အဆင်ပြေစွာသွားနိုင်ရန် နိုင်ငံတော်အဆင့် ဟဂ်ျမစ်ရှင် အဖွဲ့ကြီး တစ်ဖွဲ့ပေါ်ပေါက်လာရန် ဆန္ဒရှိကြောင်း တင်ပြလိုက်ရပါသည်။
Leave a Reply
You must be logged in to post a comment.