ဧပြီ ၆၊ ၂၀၂၁
M-Media
-သမ္မတဟောင်းလက်ထက်က မီဒီယာလွတ်လပ်ခွင့် ပိတ်ပင်ထားတာကို တန်ဇန်းနီးယားသမ္မတသစ် ဆာမီယာ ဆူလူဟူ ဟာဆန်က ဒီကနေ့မှာ ဖယ်ရှားပေးလိုက်ပါတယ်။
သမ္မတဟောင်း ဂျွန် မာဂူဖူလီ လက်ထက်မှာ တန်ဇန်းနီးယားရဲ့ မီဒီယာလွတ်လပ်ခွင့်ဟာ အောက်ဆုံးအထိ ထိုးကျခဲ့ပြီး သတင်းစာတွေ၊ သတင်းဝဘ်ဆိုက်တွေကို ပိတ်ပင်တာ၊ ဂျာနယ်လစ်တွေကို ဖမ်းဆီးထောင်ချတာတွေ လုပ်ဆောင်ခဲ့တာပါ။
အသက် ၆၁ နှစ်အရွယ် မာဂူဖူလီဟာ မတ်လအတွင်း နှလုံးရောဂါနဲ့ ကွယ်လွန်သွားခဲ့ပြီးတဲ့နောက် ဒုတိယသမ္မတ ဖြစ်တဲ့ ဆာမီယာက သမ္မတသစ် ဖြစ်လာတာ ဖြစ်ပါတယ်။
“မီဒီယာတွေကို ပိတ်ပင်ထားတယ်ဆိုတာ ကျွန်မကြားတယ်။ သူတို့ကို ပြန်ဖွင့်ပေးလိုက်ပါတယ်။ စာနယ်ဇင်းလွတ်လပ်ခွင့် ပိတ်ပင်ထားတယ်လို့ အပြောခံရမှာကို ကျွန်မတို့ မလိုလားပါဘူး။ မီဒီယာတွေကို အင်အားသုံးပြီး အဓမ္မ ပိတ်ပစ်တာမျိုး ကျွန်မတို့ လုပ်ဆောင်မှာမဟုတ်ဘူး။ ဥဒေကို လေးစားလိုက်နာဖို့ကိုတော့ ကျွန်မတို့ ဆောင်ရွက်သွားမှာပါ” လို့ သမ္မတ ဆာမီယာက မြို့တော် ဒါရ် အက် စလာမ်မှာလုပ်တဲ့ အစိုးရအဖွဲ့အစည်းအဝေးမှာ ပြောကြားခဲ့ပါတယ်။
လူ့အခွင့်အရေး တက်ကြွလှုပ်ရှားသူတွေက သမ္မတသစ်ရဲ့ ဒီဆောင်ရွက်မှုကို ကြိုဆိုခဲ့ပြီး၊ စာနယ်ဇင်းလွတ်လပ်ခွင့်ကို ကန့်သတ်ပိတ်ပင်တဲ့ ဥပဒေတွေကို ပြင်ဆင်ဖို့လည်း တိုက်တွန်းခဲ့ပါတယ်။
Ref: Reuters