ဧပြီ ၇၊ ၂၀၂၁
M-Media
-ရန်ကုန်မြို့က တရုတ်အထည်ချုပ်စက်ရုံတစ်ခု ဒီနေ့မနက်ပိုင်းမှာ မီးလောင်ခဲ့တယ်လို့ တရုတ်နိုင်ငံပိုင် CGTN က ဖော်ပြပါတယ်။
စက်ရုံတာဝန်ရှိသူက မီးဟာ ဝင်ပေါက်ကနေ စလောင်ခဲ့တာဖြစ်ပြီး ဓာတ်ဆီအနံ့တွေလည်း ရတဲ့အတွက် ရှို့မီးဖြစ်နိုင်တယ်လို့ ပြောကြားခဲ့ကြောင်း၊ စုံစမ်းစစ်ဆေးမှုတွေ လုပ်ဆောင်နေကြောင်းလည်း CGTN က ထည့်သွင်း ဖော်ပြထားပါတယ်။
မီးဟာ ဒီနေ့မနက် ၅ နာရီ ၃၅ မိနစ်ကနေ ၆ နာရီ ၅၅ မိနစ်အထိ လောင်ခဲ့တာဖြစ်ပြီး ဆုံးရှုံးမှုတန်ဖိုး ယွမ် ၈ သန်းခန့် ရှိတယ်လို့လည်း ဆိုပါတယ်။
ဖေဖော်ဝါရီ ၁ ရက်နေ့ အာဏာသိမ်းပြီးနောက်ပိုင်း စစ်ကောင်စီတပ်ဖွဲ့တွေရဲ့လက်ချက်ကြောင့် နိုင်ငံတစ်ဝှမ်း သေဆုံးသူ အရပ်သားအရေအတွက်ဟာ ၆၀၀ နား ကပ်နေပြီဖြစ်ပါတယ်။
ပြီးခဲ့တဲ့လတုန်းကလည်း ရန်ကုန်မြို့ လှိုင်သာယာမြို့နယ်က တရုတ်စက်ရုံတစ်ချို့ မီးလောင်ခဲ့ပြီး အဲဒီအချိန်တုန်းက ဆန္ဒပြ ပြည်သူတွေက ရှို့တာဖြစ်ကြောင်း၊ ကျူးလွန်သူတွေကို အရေးယူဖို့နဲ့ ဆုံးရှုံးမှုကို ပြန်လည်ပေးလျော်ဖို့ စစ်ကောင်စီကို တိုက်တွန်းကြောင်း တရုတ်အစိုးရက ကြေငြာချက် ထုတ်ခဲ့ပါတယ်။
စစ်ကောင်စီက လူတစ်ချို့ကို ဒီမီးရှို့မှုမှာ ပါဝင်တယ်လို့စွပ်စွဲကာ ထောင်ဒဏ် နှစ် ၂၀ စီ ချမှတ်ခဲ့ပါတယ်။
စစ်ကောင်စီရဲ့ အကြမ်းဖက်မှုကြောင့် ပြည်သူလူထု သေဆုံးမှုကိုတော့ တရုတ်အစိုးရရဲ့ ကြေငြာချက်မှာ ထည့်သွင်းဖော်ပြခြင်း မရှိပါဘူး။
Ref: CGTN