ဇွန် ၅၊ ၂၀၂၀
M-Media
- ဗျောက်အိုးတွေထည့်ထားတဲ့ နာနတ်သီးကိုစားပြီး သေဆုံးသွားတဲ့ ဆင်မအမှုကို စုံစမ်းစစ်ဆေးသွားမယ်လို့ အိန္ဒိယနိုင်ငံက မနေ့မှာ ပြောကြားလိုက်ပါတယ်။
ပြီးခဲ့တဲ့တစ်ပတ်က နိုင်ငံတောင်ပိုင်း ကီရာလာပြည်နယ်မှာ ဇီးရှိနေတဲ့ ဆင်မတစ်ကောင်ဟာ ဗျောက်အိုးထည့်ထားတဲ့ နာနတ်သီးတစ်လုံးကို စားပြီးတဲ့နောက် ပါးစပ်ထဲမှာ ဗျောက်အိုးတွေပေါက်ကွဲကာ သေဆုံးခဲ့ပါတယ်။
နှာမောင်းနဲ့ ပါးစပ်မှာ ပြင်းထန်စွာ ဒဏ်ရာရခဲ့ပြီး အနာသက်သာစေဖို့ အဲဒီဆင်မလေး ချောင်းထဲမှာ နာရီအတော်ကြာရေဆင်းစိမ်တဲ့ ဗီဒီယိုတွေ၊ ဓာတ်ပုံတွေဟာ ဆိုရှယ်မီဒီယာမှာ အလျင်အမြန် ပြန်ံနှံသွားခဲ့ပါတယ်။
နာမည်ကျော် ရုပ်ရှင်မင်းသား မင်းသမီးတွေ၊ အားကစားသမားတွေအပါအဝင် အိန္ဒိယပြည်သူတွေဟာ ဒီကိစ္စကို ထိထိရောက်ရောက် ကိုင်တွယ်အရေးယူဖို့အတွက် အစိုးရကို တောင်းဆိုခဲ့ပါတယ်။
အိန္ဒိယ သဘာ၀ပတ်ဝန်းကျင်ဆိုင်ရာဝန်ကြီး ပရာကက်ရှ် ဂျာဗာဒက်ကာက ဗဟိုအစိုးရဟာ ဒီကိစ္စကို အလေးထားပြီး စုံစမ်းစစ်ဆေးနေတယ်လို့ မနေ့က Twitter စာမျက်နှာမှာ ရေးသားခဲ့ပါတယ်။
အိန္ဒိယနဲ့ သီရိလင်္ကာနိုင်ငံတို့က ဆင်းရဲတဲ့ဒေသတွေမှာ နေအိမ်တွေ၊ လယ်ယာတွေကို တောရိုင်းတိရစ္ဆာန်တွေရဲ့ရန်ကနေ ကာကွယ်ဖို့အတွက် နာနတ်သီးလို အသီးအနှံတွေထဲမှာ မီးရှုးမီးပန်းတွေ၊ ဗျောက်အိုးတွေထည့်ကာ စိုက်ခင်းတွေမှာ ချထားလေ့ရှိပါတယ်။
ပြီးခဲ့တဲ့လတုန်းကလည်း ကီရာလာပြည်နယ်မှာ ဒီလိုအဖြစ်အပျက်မျိုးတစ်ခု ဖြစ်ခဲ့ဖူးပြီး ဆင်မတစ်ကောင်ဟာ ပါးစပ်မှာ ပြင်းထန်တဲ့ဒဏ်ရာတွေရကာ သေဆုံးခဲ့ပါတယ်။
၂၀၁၄ ခုနှစ်ကနေ ၂၀၁၉ ခုနှစ်အတွင်း တောဆင်ရိုင်းတွေရဲ့ တိုက်ခိုက်မှုကြောင့် အိန္ဒိယနိုင်ငံတစ်ဝှမ်း လူ၂၃၀၀ ကျော် သေဆုံးခဲ့ပါတယ်။ အဲဒီကာလအတွင်း ဆင်ပေါင်း ၅၁၀ လောက် သေဆုံးခဲ့ပြီး ဓာတ်လိုက်ပြီးသေဆုံးတာက ၃၃၃ ကောင်၊ အမဲလိုက်မှုနဲ့ အစာအဆိပ်ကြောင့် သေဆုံးမှုက အကောင် ၁၀၀ ကျော် ရှိပါတယ်။
Ref: CNA
