မေ ၃၀၊ ၂၀၂၀
M-Media
-အစ္စလာမ်သာသနာကို စတင်တည်ထောင်သူ တမန်တော် မုဟမ္မဒ် တည်ဆောက်ခဲ့တဲ့ မဒီနာက ‘မစ်တ်ဂျစ်ဒ်နဗဝီ’ ဗလီဝတ်ကျောင်းတော်ကို တနင်္ဂနွေနေ့ကနေစပြီး ဖွင့်ပေးတော့မယ်လို့ ဆော်ဒီအာဏာပိုင်တွေက ဒီကနေ့မှာ ကြေငြာလိုက်ပါတယ်။
Covid-19 ပြန့်နှံ့မှုကြောင့် တိုင်းပြည်ကို ၂ လတာ တံခါးပိတ်ကာ ရွေ့လျားသွားလာမှုကန့်သတ်မိန့် ထုတ်ပြန်ခဲ့ပြီးတဲ့နောက် မြင့်မြတ်ရာနေရာတွေတည်ရှိရာ မက္ကာမြို့ကလွဲပြီး နိုင်ငံတစ်ဝှမ်းက ဗလီတွေကို မေလ ၃၁ ရက်နေ့ကနေ စတင်ဖွင့်ပေးဖို့ ဆော်ဒီက ပြင်ဆင်နေတာပါ။
အစ္စလာမ်သာသနာမှာ ဒုတိယအမြင့်မြတ်ဆုံး ဗလီဝတ်ကျောင်းတော်ဖြစ်တဲ့ ‘နဗဝီ’ ဗလီဝတ်ကျောင်းတော်လည်း ဖွင့်ပေးမယ့်အထဲမှာ ပါဝင်ပါတယ်။
ဆော်ဒီ အစ္စလာမ့်ရေးရာဝန်ကြီးဌာနဝန်ကြီး အဘ်ဒူလတစ်ဖ် ဘင် အဘ်ဒူလ်အဇစ် အလ်-ရှိခ်က ဖွင့်ပေးဖို့အတွက် ပြင်ဆင်မှုတွေ လုပ်ဆောင်ခဲ့ပြီး ဗလီတွေဟာ အကောင်းဆုံးအနေအထားမှာ ရှိနေတယ်လို့ ပြောကြားခဲ့ပါတယ်။
ဗလီတွေကို ဖွင့်လှစ်ပေးခဲ့ပေမယ့် ဝတ်ပြုဆုတောင်းသူတွေဟာ အစိုးရက ထုတ်ပြန်ထားတဲ့ ကိုဗစ်ကာကွယ်ရေး စည်းမျဉ်းစည်းကမ်းတွေကို လိုက်နာရမှာ ဖြစ်ပါတယ်။
Ref : Arab News
