မတ် ၃၊ ၂၀၂၀
M-Media
- တရုတ်နိုင်ငံမှာ တနင်္လာနေ့က ကူးစက်မှု ၁၂၅ ခု ရှိခဲ့ပြီး ဒါဟာ အချက်အလက်တွေ စတင်ထုတ်ပြန်တဲ့ ဇန်နဝါရီလာကစလို့ တစ်ရက်အတွင်း ကူးစက်မှု အနိမ့်ဆုံး ဖြစ်ပါတယ်။ သေဆုံးသူကတော့ ၃၁ ဦး ရှိခဲ့ပါတယ်။ ဗိုင်းရပ်စ်ကင်းစင်ပြီး ဆေးရုံကနေ ဆင်းသွားရသူတွေကို လေ့လာကာ ဗိုင်းရပ်စ်ကုသဖို့၊ ကာကွယ်ဆေးထုတ်ဖို့လည်း တရုတ်အာဏာပိုင်တွေက ဆောင်ရွက်နေပါတယ်။ ရှန်ဟိုင်းမြို့နဲ့၊ နိုင်ငံတောင်ပိုင်း ဂွမ်ဒုန်းပြည်နယ်တို့က ရောဂါကူးစက်တဲ့တိုင်းပြည်တွေ၊ ဒေသတွေကနေ လာတဲ့သူတွေကို အနည်းဆုံး ၁၄ ရက် သီးသန့်ထား စောင့်ကြည့်သွားမယ်လို့ ထုတ်ပြန်လိုက်ပါတယ်။
- တောင်ကိုရီးယားမှာ မနေ့ကတစ်ရက်တည်း ကူးစက်သူ ၆၀၀ လောက်ရှိခဲ့ပြီး သေဆုံးသူက ၃ ဦး ရှိခဲ့ပါတယ်။ ဒါ့ကြောင့် စုစုပေါင်း ကူးစက်မှုဟာ ၄၈၁၂ ဦး ရှိလာပြီး တရုတ်နိုင်ငံပြင်ပမှာ အများဆုံး ကူးစက်တဲ့နိုင်ငံ ဖြစ်လာပါတယ်။ သမ္မတ မွန်ဂျယ်အင်က ကိုရိုနာဗိုင်းရပ်စ်အပေါ် စစ်ဆင်ရေးပြုလုပ်ကြောင်း ကြေငြာလိုက်ပါတယ်။ နှာခေါင်းစည်းတွေ ပြတ်လပ်မှုအတွက် မွန်က ပြည်သူတွေကို တောင်းပန်ခဲ့သလို ဆေးရုံတွေမှာ ကုတင်တွေထပ်တိုးဖို့၊ နှာခေါင်းစည်းတွေ ထပ်မံထုတ်လုပ်ဖို့လည်း အမိန့်ပေးခဲ့ပါတယ်။
- နိုင်ငံအတွင်း တနင်္လာနေ့က ကူးစက်မှု ၇ ခု ထပ်တွေ့ခဲ့တယ်လို့ မလေးရှားအစိုးရက ဒီကနေ့မှာ ထုတ်ပြန်ခဲ့ပြီး စုစုပေါင်း မလေးရှားမှာ ကူးစက်မှုဟာ ၃၆ ခုအထိ ရှိလာပါတယ်။ အဲဒီအထဲက ၂၂ ဦး ဆေးရုံကဆင်းသွားပြီ ၁၂ ဦးကတော့ ဆက်လက်ကုသမှု ခံယူနေဆဲပါ။
- ဗိုင်းရပ်စ်ကူးစက်သူ ၂ ဦး တွေ့တယ်လို့ အစိုးရက ကြေငြာပြီးနောက်ပိုင်း အင်ဒိုနီးရှားမြို့တော် ဂျကာတာမှာ စားသုံးကုန်တွေ၊ အခြေခံ လူသုံးကုန်ပစ္စည်းတွေကို ပြည်သူတွေက အလုအယက် ဝယ်ယူလာကြတာကြောင့် ကုန်ပစ္စည်း ပြတ်လပ်မှုတွေ ဖြစ်ပေါ်လာပါတယ်။
- ဗိုင်းရပ်စ်တိုက်ဖျက်ရေးအတွက် ဇီ၀လုံခြုံရေးဥပဒေကို အသုံးပြုသွားမှာဖြစ်ပြီး ရောဂါသံသယရှိသူတွေရဲ့ လှုပ်ရှားသွားလာမှုကို ကန့်သတ်သွားမယ်လို့ ဩစတေးလျနိုင်ငံက မနေ့မှာ ကြေငြာလိုက်ပါတယ်။ သတ်မှတ်ထားတဲ့ နေရာအချို့၊ ဒါမှမဟုတ် လူနာကို သီးသန့်ထားတဲ့နေရာတွေမှာ ဒီဥပဒေကို အသုံးပြုသွားမှာပါ။ နှစ်ပေါင်း ၁၀၀ ကျော် အသုံးပြုလာတဲ့ ရောဂါရှိသူများ သီးခြားခွဲထားရေး အက်ဥပဒေကို ဇီ၀လုံခြုံရေး ဥပဒေနဲ့ ဩစတေးလျက ၂၀၁၅ ခုနှစ်မှာ အစားထိုးခဲ့တာ ဖြစ်ပါတယ်။
- အချင်းချင်းတွေ့တဲ့အခါ ပါးနမ်းနှုတ်ဆက်လေ့ရှိတဲ့ ရိုးရာဓလေ့ကို ဆွစ်ဇာလန်နိုင်ငံက တားမြစ်ပိတ်ပင်လိုက်ပါတယ်။ ဆွစ်လူမျိုးတွေဟာ တွေ့ဆုံတဲ့အခါ ပါးနှစ်ဖက်ကို ၃ ကြိမ် ၃ ခါ နမ်းလေ့ရှိပါတယ်။ ကျန်းမာရေးဝန်ကြီး အလင်ဘာဆတ်က လူတစ်ဦးနဲ့တစ်ဦး ဝေးဝေးကနေ ဆက်သွယ်ပြောဆိုတာဟာ ဗိုင်းရပ်စ်ကူးစက်ပြန်နှံ့မှု နှေးကွေးစေရေး အကောင်းဆုံးနည်းလမ်း ဖြစ်တဲ့အတွက် ဒီလို တားမြစ်ရခြင်း ဖြစ်တယ်လို့ ပြောကြားခဲ့ပါတယ်။
Ref: Aljazeera
