ဒီဇင်ဘာ ၁၅၊ ၂၀၁၉
M-Media
-တောင်တရုတ်ပင်လယ်အတွင်း တရုတ်နိုင်ငံရဲ့ လုပ်ရပ်တွေဟာ အရှေ့တောင်အာရှက တစ်ခြားနိုင်ငံတွေအပေါ် ခြိမ်းခြောက်မှု၊ အနိုင်ကျင့်မှု ဖြစ်နေတယ်လို့ အမေရိကန်ရေတပ်ရဲ့ ပစိဖိတ်တပ်ဖွဲ့အကြီးအကဲ ဗိုလ်ချုပ် ဂျွန် အကီလီနိုက ပြောကြားလိုက်ပါတယ်။
တရုတ်ဟာ တောင်တရုတ်ပင်လယ်က ဧရိယာအများအပြားကို ပိုင်ဆိုင်တယ်လို့ ပြောကြားထားပြီး ဗီယက်နမ်၊ ဖိလစ်ပိုင်နဲ့ မလေးရှားတို့အပါအဝင် အခြားနိုင်ငံတော်တော်များများနဲ့ ပိုင်ဆိုင်မှု အငြင်းပွားနေတာပါ။ အဲဒီ ရေလမ်းကြောင်းဟာ ကမ္ဘာ့ကုန်သွယ်ရေးအတွက် အရေးပါသလို၊ သဘာ၀သယံဇာတ ကြွယ်၀တဲ့နေရာလည်း ဖြစ်ပါတယ်။
သောကြာနေ့က ထိုင်းနိုင်ငံ ဘန်ကောက်မြို့မှာပြုလုပ်တဲ့ အကျဉ်းရုံးသတင်းစာရှင်းလင်းပွဲမှာ ဗိုလ်ချုပ် အကီလီနိုက တောင်တရုတ်ပင်လယ်အတွင်း တရုတ်က ကျွန်းတုတွေတည်ဆောက်ပြီး ဗုံးကြဲလေယာဉ်တွေ အတက်အဆင်းလုပ်တာ၊ လေယာဉ်ပစ်ဒုံးခွင်းစနစ်၊ သင်္ဘောဖျက်ဒုံးခွင်းစနစ်တွေ တပ်ဆင်တာ၊ ရေဒါစနစ်တွေတပ်ဆင်တာ စတဲ့လုပ်ရပ်တွေကို ထောက်ပြခဲ့ပါတယ်။
ဒီလုပ်ရပ်တွေဟာ စစ်ရေးအင်အားကို မြင်အောင်ပြသပြီး ဒေသတွင်းက အခြားနိုင်ငံတွေအပေါ် ဖိအားပေး၊ အနိုင်ကျင့်တာဖြစ်တယ်လို့လည်း အကီလီနိုက ထည့်သွင်းပြောဆိုပါတယ်။ ဒေသတွင်း နိုင်ငံအားလုံးက နိုင်ငံတကာဥပဒေတွေကို လိုက်နေတဲ့အတိုင်း တရုတ်ကလည်း လိုက်နာဖို့ ဗိုလ်ချုပ်က တိုက်တွန်းဆော်ဩခဲ့ပါတယ်။
တရုတ်နဲ့ အခြားနိုင်ငံတွေ အငြင်းပွားနေတဲ့ တောင်တရုတ်ပင်လယ်လမ်းကြောင်းမှာ အမေရိကန်ဟာ မကြာခင်ဆိုသလို ကင်းလှည့်မှုတွေလုပ်ဆောင်နေပြီး လွတ်လပ်စွာ ရေကြောင်းသွားလာမှုကို ကာကွယ်ဖို့ဖြစ်တယ်လို့ ဆိုပါတယ်။
ပစိဖိတ်ရေတပ်ဗိုလ်ချုပ် အကီလီနိုက တောင်တရုတ်ပင်လယ်လုံခြုံရေးအတွက် ဒေသတွင်းနိုင်ငံတွေရဲ့ ပူးပေါင်းဆောင်ရွက်မှုနဲ့အတူ အမေရိကန်ရဲ့ အခန်းကဏ္ဍကလည်း အရေးပါတယ်လို့ ရှုမြင်ကြောင်း ထည့်သွင်း ပြောကြားခဲ့ပါတယ်။
Ref: Aljazeera
