Category: က်န္းမာေရးႏွင့္ေဆးပညာ

မတ် ၂၁၊ ၂၀၂၀
M-Media

– ၂၀၁၉ ခုနှစ် ဒီဇင်ဘာက တရုတ်နိုင်ငံကနေ စတင်ပြန့်နှံ့ခဲ့တဲ့ COVID-19 ဗိုင်းရပ်စ်ကြောင့် ကမ္ဘာတစ်ဝှမ်း သေဆုံးသူအရေအတွတ်ဟာ မတ်လ ၂၁ ရက်နေ့မှာ ၁၁၀၀၀ ကျော်လာခဲ့ပြီး ကူးစက်ခံရသူကတော့ ၂၇၇၀၀၀ ​ထောင်ကျော် ရှိလာပါတယ်။ အဲဒီအထဲမှာ ပြန်ကောင်းသွားသူကတော့ ၈၈၀၀၀ ကျော် ရှိ​ခဲ့ပါတယ်။

– အီတလီမှာ မနေ့ကတစ်နေ့တည်း သေဆုံးသူ ၆၂၇ ဦး ရှိခဲ့ပြီး ဗိုင်းရပ်စ်ဒဏ်ခံရတဲ့ ၄ ပတ်အတွင်း တစ်နေ့တာ သေဆုံးမှု အမြင့်ဆုံးလည်း ဖြစ်ပါတယ်။ စုစုပေါင်းသေဆုံးသူ ၄၀၃၂ ဦးရှိလာပြီး ဗိုင်းရပ်စ်စပြန့်ရာ တရုတ်နိုင်ငံထက် ပိုများသွားတာပါ။

– အီရန်နိုင်ငံမှာတော့ မနေ့က ၁၂၃ ဦး ထပ်မံသေဆုံးခဲ့ပြီး စုစုပေါင်း ၁၅၅၆ ဦး ရှိလာတာပါ။ ကူးစက်သူအရေအတွက်ကတော့ ၂၀၆၁၀ ရှိလာပါတယ်။

– ဥရောပနိုင်ငံတွေမှာလည်း ဗိုင်းရပ်စ်ကူးစက်မှု၊ သေဆုံးမှုတွေ မြင့်တက်လာပါတယ်။ စပိန်မှာ သေဆုံးသူ ၁၃၀၀ ကျော်လာသလို၊ နယ်သာလန်မှာလည်း မနေ့ကတစ်ရက်တည်း လူ ၃၀ သေဆုံးတာကြောင့် သေဆုံးသူ ၁၃၆ ဦး ရှိလာပါတယ်။ ကူးစက်ခံရသူတွေကတော့ စပိန်မှာ ၂၄၉၂၆ ဦးနဲ့ နယ်သာလန်မှာ ၃၆၃၁ ဦးဖြစ်ပါတယ်။ဆွစ်ဇာလန်နိုင်ငံမှာ သေဆုံးသူ ၅၆ ဦး၊ ကူးစက်သူ ၆၁၀၀ ရှိနေပြီး၊ ၅၂၁ ဦး ကူးစက်ခံထားရတဲ့ ဖင်လန်နိုင်ငံမှာ မနေ့က ပထမဆုံး လူသေဆုံးမှု ဖြစ်ခဲ့ပါတယ်။ ဂျော်ဂျီယာနိုင်ငံမှာတော့ ဗိုင်းရပ်စ်ကူးစက်မယ့် အန္တရာယ်ကြောင့် အစိုးရက အရေးပေါ် အခြေအနေ ကြေငြာလိုက်ပါတယ်။ ပေါ်တူဂီနိုင်ငံမှာ သေဆုံးသူက ၂ ဆတိုးတာ ၁၂ ဦးအထိ ရှိလာပြီး၊ ကူးစက်သူက ၁၂၈၀ အထိ ရှိလာပါတယ်။

– အာဖရိကနိုင်ငံတွေမှာလည်း ကူးစက်မှုတွေ၊ သေဆုံးမှုတွေ ဖြစ်လာပါတယ်။ ကွန်ဂိုနိုင်ငံမှာ မနေ့က ပထမဆုံး လူသေဆုံးမှုဖြစ်ခဲ့ပြီး ကူးစက်သူ ၅ ဦး ရှိခဲ့ပါတယ်။ ဒါ့ကြောင့် စုစုပေါင်း ကူးစက်ခံရသူ ၂၃ ဦး ရှိလာတာပါ။ ဘာကီနာဖာဆိုမှာ အစိုးရဝန်ကြီး ၄ ဦး ဗိုင်းရပ်စ်ကူးစက်ခံခဲ့ရပြီး စုစုပေါင်း ၆၄ ဦးရှိလာတာပါ။ သေဆုံးသူကတော့ ၂ ဦး ရှိနေပါတယ်။ အာဖရိကတိုက် အစွန်က ကျွန်းနိုင်ငံငယ် မောရေးရှပ်စ်မှာလည်း မနေ့က ပထမဆုံး သေဆုံးမှု ဖြစ်ခဲ့ပါတယ်။ အန်ဂိုလာနိုင်ငံမှာ ပထမဆုံး ကူးစက်သူ ၂ ဦးကို မနေ့မှာ တွေ့ခဲ့ရပါတယ်။

– အရှေ့အလယ်ပိုင်းမှာတော့ ယူအေအီးနိုင်ငံမှာ မနေ့က ပထမဆုံး လူ ၂ ဦး သေဆုံးခဲ့ပါတယ်။ ကူဝိတ်နိုင်ငံမှာ ကူးစက်သူ ၅ ဦး ပြန်ကောင်းသွားတာကြောင့် စုစုပေါင်း ကူးစက်သူအရေအတွက် ၂၇ ဦးသာ ရှိပါတော့တယ်။ အိုမန်နိုင်ငံမှာ မနေ့က ၄ ဦး ထပ်မံကူးစက်ခဲ့ပြီး စုစုပေါင်းကူးစက်သူ ၅၂ ဦး ရှိလာကာ ပြန်လည်သက်သာသူက ၁၃ ဦးရှိပါတယ်။

– စင်ကာပူနိုင်ငံမှာ ထပ်မံကူးစက်ခံရသူ ၄၇ ဦးရှိပြီး စုစုပေါင်း ၄၃၂ ဦး ရှိလာတာပါ။ ဒီကနေ့မနက်က လူ ၂ ဦးသေဆုံးခဲ့ပြီး COVID-19 ကြောင့် ပထမဆုံး သေဆုံးမှုလည်း ဖြစ်ပါတယ်။

– မလေးရှားနိုင်ငံမှာ ကိုရိုနာဗိုင်းရပ်စ်သစ်ကြောင့် စနေနေ့မှာ လူ ၄ ဦး သေဆုံးခဲ့ပြီး စုစုပေါင်း သေဆုံးသူ ၈ ဦးအထိ ရှိလာပါတယ်။ ကူးစက်မှုတော့ ပြီးခဲ့တဲ့ ၂၄ နာရီအတွင်း ၁၅၃ ဦးရှိခဲ့ပြီး စုစုပေါင်းကူးစက်သူ ၁၁၈၃ ဦးအထိ မြင့်တက်လာတာ ဖြစ်ပါတယ်။

– အင်ဒိုနီးရှားနိုင်ငံမှာ မနေ့က သေဆုံးသူ ၆ ဦးရှိပြီး၊ ကူးစက်ခံရသူကတော့ ၈၁ ဦး ရှိပါတယ်။ ဒါ့ကြောင့် စုစုပေါင်း ကူးစက်သူအရေအတွက် ၄၅၀ နဲ့ သေဆုံးသူ ၃၈ ဦးအထိ ရှိလာတာပါ။

– ပါလက်စတိုင်းမှာ မနေ့က ထပ်မံကူးစက်သူ ၄ ဦးရှိပြီး စုစုပေါင်း ကူးစက်သူ ၅၂ ဦးအထိ ရှိလာတာဖြစ်ပါတယ်။

Ref: Aljazeera

(ဓာတ်ပုံ – မတ်လ ၂၁ ရက်နေ့အထိ ကမ္ဘာတစ်ဝှမ်း ကူးစက်မှု)

မတ် ၁၉၊ ၂၀၂၀
M-Media

• COVID-19 ဗိုင်းရပ်စ် ပြန်နှံ့မှုကို တားဆီးနိုင်ဖို့အတွက် ကမ္ဘာ့နိုင်ငံတွေဟာ တစ်နိုင်ငံလုံး ဒါမှမဟုတ် ဒေသတစ်ချို့ကို တံခါးပိတ်တာ၊ ပြည်ဝင်ခွင့်ကန့်သတ်တာ၊ လေယာဉ်ပျံသန်းမှု ပိတ်ပင်တာ၊ သွားလာလှုပ်ရှားမှု ကန့်သတ်တာတွေကို ပိုမိုတိုးမြှင့် လုပ်ဆောင်လာကြပါတယ်။
• အီတလီနိုင်ငံမှာ COVID-19 ကြောင့် ဗုဒ္ဓဟူးနေ့မှာ ၄၇၅ ဦး သေဆုံးခဲ့ပြီး ဒါဟာ တစ်ရက်တာကာလမှာ သေဆုံးမှုနှုန်းအမြင့်ဆုံးဖြစ်ပါတယ်။ ဒါ့ကြောင့် သေဆုံးသူအရေအတွက်ဟာ ၂၉၇၈ ဦး ရှိလာခဲ့ပြီး ကူးစက်မှုကလည်း ၃၅၇၁၃ ဦး ရှိလာပြီဖြစ်ပါတယ်။ တနင်္ဂနွေနေ့က အီတလီမှာ သေဆုံးသူ ၃၆၈ ဦး ရှိခဲ့ပြီး ဒါဟာ တစ်ရက်တာ ဒုတိယအမြင့်ဆုံး ဖြစ်ပါတယ်။ လူဦးရေ သန်း ၆၀ လောက်ရှိတဲ့ အီတလီနိုင်ငံကို အာဏာပိုင်တွေက ပြီးခဲ့တဲ့ ၂ ပတ်အရင်ကတည်းက တံခါးပိတ်ထားခဲ့တာပါ။ အီတလီမှာ COVID-19 ကြောင့် သေဆုံးသူဟာ ကမ္ဘာ့မှာ သေဆုံးမှုစုစုပေါင်းရဲ့ ၃၄.၂ ရာခိုင်နှုန်းအထိ ရှိလာတာ ဖြစ်ပါတယ်။
• ကမ္ဘာတစ်ဝှမ်းက လူပေါင်းသောင်းချီ ပါဝင်မယ့် အစ္စလာမ်ဘာသာရေးအခမ်းအနားတစ်ခုကို ရပ်ဆိုင်းဖို့အတွက် အင်ဒိုနီးရှားအာဏာပိုင်တွေက ပွဲစီစဉ်သူတွေနဲ့ ညှိနှိုင်းနိုင်ခဲ့ပါတယ်။ကမ္ဘာ့ အစ္စလာမ်သာသနာပြုလှုပ်ရှားမှု Tablighi Jama’ ရဲ့ အာရှဆိုင်ရာ တွေ့ဆုံပွဲ Ijtima Asia ကို နိုင်ငံအရှေ့ပိုင်း မာကက်ဆာမြို့မှာ မတ်လ ၁၉ ရက်နေ့ကနေ ၂၂ ရက်နေ့အထိ ကျင်းပဖို့ စီစဉ်ထားတာပါ။ အင်ဒိုနီးရှားနဲ့ ကမ္ဘာတစ်ဝှမ်းက အစ္စလာမ်ဘာသာဝင် သောင်းချီတက်ရောက်မယ်လို့ ခန့်မှန်းထားပြီး ဒီပွဲကနေတစ်ဆင့် COVID-19 ဗိုင်းရပ်စ် ပြန့်နှံမှု အကြီးအကျယ်ဖြစ်ပွားနိုင်တယ်ဆိုတဲ့ စိုးရိမ်မှုတွေလည်း မြင့်တက်လာခဲ့ပါတယ်။ အစပိုင်းမှာ စီစဉ်ထားတဲ့အတိုင်း ပွဲကို ကျင်းပမယ်လို့ ပွဲစီစဉ်သူတွေက ထုတ်ပြန်ခဲ့ပေမယ့် နောက်ပိုင်းမှာတော့ အာဏာပိုင်တွေက ကြားဝင်ညှိနှိုင်းကာ ပွဲကို ရပ်ဆိုင်းဖို့ ဖျောင်းဖြနိုင်ခဲ့ပါတယ်။ ဖေဖော်ဝါရီလနှောင်းပိုင်း မလေးရှားက လူပေါင်း ၁၆၀၀၀ လောက် တက်ရောက်ခဲ့တဲ့ ဒီလိုအခမ်းအနားတစ်ခုကနေ လူရာနဲ့ချီ ဗိုင်းရပ်စ်ကူးစက်ခဲ့ပြီး စင်ကာပူ၊ ဘရူးနိုင်း၊ ဗီယက်နမ်နဲ့ ကမ္ဘောဒီးယားနိုင်ငံတွေက ဒီအခမ်းအနား တက်ရောက်သူတွေပါ ကူးစက်ခံခဲ့ရပါတယ်။နောက်ဆက်တွဲအဖြစ် မလေးရှားဟာ နိုင်ငံကို မတ်လကုန်အထိ ၂ ပတ်ကြာတံခါးပိတ်ကာ ကာကွယ်တားဆီးရေးလုပ်ငန်းတွေကို လုပ်ဆောင်နေရပါတယ်။
• လက်ရှိ ကမ္ဘာတစ်ဝှမ်းမှာ ပြန့်နှံ့နေတဲ့ COVID-19 ဗိုင်းရပ်စ်ဟာ လေထဲမှာ ၃ နာရီလောက် ရှင်သန်နိုင်ပြီး ပလက်စတစ်နဲ့ သံတွေပေါ်မှာ ၃ ရက်လောက်အထိ ရှင်သန်နိုင်တယ်လို့ အမေရိကန် အမျိုးသားကျန်းမာရေးအင်စတီကျုရဲ့ လေ့လာမှုမှာ တွေ့ခဲ့ရပါတယ်။ ကြေးပြားအပေါ်မှာ ၄ နာရီလောက် ရှင်သန်နိုင်သလို၊ စက္ကူပေါ်မှာတော့ ၂၄ နာရီ ရှင်သန်နိုင်တယ်လို့ လေ့လာမှုက ဆိုပါတယ်။ အမေရိကန် ရောဂါထိန်းချုပ်ရေးနှင့် ကာကွယ်တားဆီးရေးစင်တာက ကိုရိုနာဗိုင်းရပ်စ်ဟာ များသောအားဖြင့် နှာချေ၊ ချောင်းဆိုးမှုကနေ ထွက်လာတဲ့ အရည်အစက်လေးတွေကြောင့် ကူးစက်တာဖြစ်ပြီး၊ ဗိုင်းရပ်စ်ရှိတဲ့အရာတွေကို ကိုင်ကာ ပါးစပ်၊ နှာခေါင်းနဲ့ မျက်လုံးတွေကို ထိတွေ့ရာကနေလည်း ကူးစက်နိုင်တယ်လို့ ထုတ်ပြန်ထားပါတယ်။

Ref: Aljazeera