News @ M-Media

Tag: China

  • ရေဒီယိုနှင့် လျှပ်စစ်သံလိုက်လှိုင်း ဆက်သွယ်မှုတိုင်းကို ဖမ်းယူနိုင်မည့် နည်းပညာသစ် တရုတ်ရရှိ

    ရေဒီယိုနှင့် လျှပ်စစ်သံလိုက်လှိုင်း ဆက်သွယ်မှုတိုင်းကို ဖမ်းယူနိုင်မည့် နည်းပညာသစ် တရုတ်ရရှိ

    ဖေဖော်၀ါရီ ၁၈၊ ၂၀၂၄
    M-Media

    -ရေဒီယိုနဲ့ လျှပ်စစ်သံလိုက်လှိုင်းအသုံးပြု ဆက်သွယ်မှုတိုင်းကို ဖမ်းယူနှိမ်နှင်းနိုင်မယ့် စစ်ဖက်သုံး နည်းလမ်းတစ်ခုကို တရုတ်သိပ္ပံပညာရှင်တွေက ဖော်ထုတ်နိုင်ခဲ့ပါတယ်။

    ဒီနည်းပညာကြောင့် အနာဂတ်စစ်ပွဲတွေမှာ ရန်သူတွေဟာ ဘယ်လိုနည်းလမ်းနဲ့မှ လျှို့၀ှက်ဆက်သွယ်၊ ထောက်လှမ်းမှုတွေ လုပ်ဆောင်နိုင်တော့မှာ မဟုတ်ပါဘူး။

    လျှပ်စစ်သံလိုက်လှိုင်းတွေကို အချိန်နဲ့တစ်ပြေးညီ လျင်လျင်မြန်မြန်ဖမ်းယူဖော်ထုတ်နိုင်တဲ့ အဲဒီနည်းလမ်းကို ဘေဂျင်းနည်းပညာတက္ကသိုလ် Beijing Institute of Technology က ပရော်ဖက်ဆာ ယန်ကိုင်နဲ့အဖွဲ့က ဖော်ထုတ်နိုင်ခဲ့တာဖြစ်ပါတယ်။

    ဒီနည်းသစ်ကို အသုံးပြုမယ့် ကိရိယာဟာ သေးငယ်အစွမ်းထက်ပြီး၊ စွမ်းအင်အသုံပြုမှုလည်း နည်းပါးတယ်လို့ ယန်ကိုင်က ဆိုပါတယ်။

    စစ်ပွဲလို အခြေအနေမျိုးမှာ ရေဒီယိုနဲ့ လျှပ်စစ်သံလိုက်လှိုင်း အသုံးပြု ဆက်သွယ်မှုတွေကို တစ်ချိန်တည်း ကြားဖြတ်ဖမ်းယူဖို့ဆိုရင် အလွန်များပြားတဲ့ အချက်အလက်တွေကို ကိုင်တွယ်ဆောင်ရွက်ရမှာ ဖြစ်တဲ့အတွက် မဖြစ်နိုင်ဘူးလို့ အရင်က ယူဆထားခဲ့ကြတာပါ။

    ယန်ကိုင်ဦးဆောင်တဲ့ တရုတ်သိပ္ပံပညာရှင်တွေဟာ ဒီပြဿနာကိုဖြေရှင်းဖို့အတွက် ချစ်ပ်ပြားအသစ်တွေ တီထွင်ခဲ့ပါတယ်။ အဲဒီချစ်ပ်ပြားတွေကနေ အချက်အလက်တွေကို ဖမ်းယူကာ အလွှာငယ်လေးတွေအဖြစ် ခွဲထုတ်ပြီး ကွန်ပျူတာဆီကို ပေးပို့နိုင်မှာဖြစ်ပါတယ်။

    ရေကြီယိုကြိမ်နှုန်း ၄၀ မဂ္ဂါဟက်ဇ်အောက်နဲ့ ၁၆၀ မဂ္ဂါဟက်ဇ်အထက်ဆိုရင် အရင်က ဖမ်းယူထောက်လှမ်းလို့ မရနိုင်ပေမယ့် တရုတ်ပညာရှင်တွေရဲ့ အခုနည်းသစ်က ဒီကန့်သတ်ချက်ကိုပါ ချိုးဖျက်နိုင်မှာပါ။

    ရေဒီယိုနဲ့ လျှပ်စစ်သံလိုက်လှိုင်းတွေ စစ်ထုတ်တဲ့နည်းလမ်းကိုလည်း ပရော်ဖက်ဆာ ယန်ကိုင်တို့အဖွဲ့က ပိုမိုကောင်းမွန်အောင် ပြုလုပ်နိုင်ခဲ့ပါတယ်။ သင်္ချာဆိုင်ရာ နည်းလမ်းသစ်တစ်ချို့ တီထွင် အသုံးပြုထားတဲ့အတွက် ကိုယ့်ဘက်က အသုံးပြုနေတဲ့ ရေဒီယိုလှိုင်းတွေ ထိခိုက်မှာကို မစိုးရိမ်ရတော့ပါဘူး။

    အရက်ဖက်၊ စစ်ဖက်၊ ရန်သူ၊ မိတ်ဆွေ စသဖြင့် အချက်ပြစနစ်တွေကို တစ်ချိန်တည်း ဖမ်းယူခွဲခြမ်းစိတ်ဖြာရာမှာ လက်ရှိ ရှိနေတဲ့ နည်းပညာဆိုင်ရာ အခက်အခဲကိုလည်း ဉာဏ်ရည်တုနည်းပညာ (AI) ကို အသုံးပြုပြီးဖြေရှင်းခဲ့တယ်လို့ ယန်ကိုင်က ထည့်သွင်းပြောဆိုခဲ့ပါတယ်။

    အမေရိကန်နဲ့ တရုတ်တို့အကြား အီလက်ထရောနစ်စစ်ပွဲ အားပြိုင်မှုမှာ အခုနည်းပညာကြောင့် တရုတ်ဖက်က နှာတစ်ဖျားသာသွားတယ်လို့လည်း ဆိုနိုင်ပါတယ်။

    Ref: South China Morning Post

  • တရုတ်တွင် ဖြစ်ပွားနေသည့် အဆုတ်ရောင်ရောဂါ ပြန့်နှံလာမည်ကို အမေရိကန် စိုးရိမ်နေ

    တရုတ်တွင် ဖြစ်ပွားနေသည့် အဆုတ်ရောင်ရောဂါ ပြန့်နှံလာမည်ကို အမေရိကန် စိုးရိမ်နေ

    ဒီဇင်ဘာ ၂၊ ၂၀၂၃

    M-Media 


    -တရုတ်နိုင်ငံမှာ ပြီးခဲ့တဲ့ သီတင်းပတ်ကစလို့ အဆုတ်ရောင်ရောဂါ (နမိုးနီးယား) တစ်မျိုး ပြန့်နှံ့ဖြစ်ပွားနေပြီး အမေရိကန် လွှတ်တော်အမတ်တစ်ချို့က ကိုဗစ်လို ကမ္ဘာတစ်၀ှမ်း ပြန့်နှံ့လာမှာကို စိုးရိမ်နေကြပါတယ်။ 

    ‘အဆုတ်ဖြူရောဂါ’ လို့ အမည်ပေးထားတဲ့ အဲဒီ နမိုးနီးယားဟာ ကလေးငယ်တွေမှာ အဓိက ဖြစ်ပွားနေတာပါ။ တရုတ်အစိုးရကတော့ ဒီကိစ္စကို တိတိကျကျ ထုတ်ပြန်ခြင်း မရှိသေးပါဘူး။ 

    ကမ္ဘာ့ကျန်းမာရေးအဖွဲ့ WHO က တရုတ်မှာ ဒီရောဂါ ကူးစက်ပြန့်နှံ့နေတာကို သိရှိထားပြီး တရုတ်အစိုးရထံ အချက်အလက်တွေလည်း တောင်းထားတယ်လို့ ထုတ်ပြန်ပါတယ်။ 

    အမေရိကန်နိုင်ငံရေးသမားတွေက ဒီကိစ္စကို စောစောစီးစီး ကိုင်တွယ်ဆောင်ရွက်ဖို့ ဘိုင်ဒန်အစိုးရကို တောင်းဆိုလာကြပါတယ်။ 

    အတိုက်အခံ ရီပက်ဘလစ်ကန် အမတ် ၅ ဦးက တရုတ်နိုင်ငံကလူတွေကို အမေရိကန်နိုင်ငံထဲ ၀င်ရောက်ခွင့်ပိတ်ပင်ဖို့ ဒီဇင်ဘာ ၁ ရက်နေ့မှာ သမ္မတဘိုင်ဒန်ကို တောင်းဆိုခဲ့ပါတယ်။ ရောဂါအကြောင်း တိတိကျကျ သိရှိတဲ့အချိန်အထိ ဒီလို ပိတ်ပင်ထားဖို့ လိုအပ်တယ်လို့လည်း လွှတ်တော်အမတ်တွေက ပြောပါတယ်။ 

    ကမ္ဘာကြီးကို ၂ နှစ်ကျော်လောက် နှိပ်စက်ခဲ့တဲ့ ကိုဗစ်ရောဂါ ပြန့်နှံ့မှုမှာ တရုတ်အစိုးရရဲ့ သတင်းအချက်အလက် ထိန်ချန်ထားမှုက တစ်စိတ်တစ်ပိုင်း ပါ၀င်ခဲ့တာဖြစ်ပါတယ်။ 

    Ref: Reuters 

  • မဟာတံတိုင်းတွင် ဖြတ်လမ်းဖောက်သူများကို တရုတ်အရေးယူ

    မဟာတံတိုင်းတွင် ဖြတ်လမ်းဖောက်သူများကို တရုတ်အရေးယူ


    စက်တင်ဘာ ၁၉၊ ၂၀၂၃

    M-Media 


    -နာမည်ကျော် မဟာတံတိုင်းကို ဖောက်ပြီး ဖြတ်လမ်းဖောက်တဲ့ လူ ၂ ဦးကို သြဂုတ်လနှောင်းပိုင်းမှာ ဖမ်းဆီးလိုက်တယ်လို့ တရုတ်အစိုးရက ထုတ်ပြန်ပါတယ်။ 

    နိုင်ငံအနောက်မြောက်ပိုင်း ရှန်ဇီပြည်နယ်က အသက် ၃၈နှစ်နဲ့ ၅၅ နှစ်အရွယ် အမျိုးသားနှစ်ဦး ဖြစ်ပါတယ်။

    သူတို့အလုပ်လုပ်နေတဲ့ အနီးအနားကရွာကို သွားရောက်တဲ့အခါ မဟာတံတိုင်းအတိုင်းသွားရင် ကြာနေတဲ့အတွက် ဖြတ်လမ်းတစ်ခု ဖောက်ခဲ့တာလို့ သူတို့က ထွက်ဆိုပါတယ်။

    ၁၆ ရာစု မင် မင်းဆက်လက်ထက်က တည်ဆောက်ခဲ့တဲ့ မဟာတံတိုင်းကြီးဟာ ကမ္ဘာ့အမွေအနှစ်စာရင်း၀င် အဆောက်အဦးတစ်ခု ဖြစ်ပါတယ်။ 

    မိုင်ပေါင်း ၅၅၀၀ လောက် ရှည်လျားပြီး စနစ်တကျ လက်ရာမြောက်စွာ တည်ဆောက်ထားတာပါ။ နိုင်ငံမြောက်ပိုင်းက ရန်သူတွေ ၀င်ရောက်မှုကို တားဆီးဖို့ ရည်ရွယ်ပါတယ်။ 

    ကုလရဲ့ ကမ္ဘာ့အမွေအနှစ်အဖွဲ့ ယူနက်စကိုက ဒီတံတိုင်းကြီးဟာ အရှေ့တိုင်း ယဥ်ကျေးမှုနဲ့ နော်မက်ဒစ် ယဥ်ကျေးမှုတို့ ပေါင်းစည်း ရောယှက်ရာ အမှတ်အသားတစ်ခုလို့ ကင်ပွန်းတပ်ထားပါတယ်။ 

    Ref: AP 

  • တရုတ် ကာကွယ်ရေး၀န်ကြီး ဘယ်ရောက်နေလဲ

    တရုတ် ကာကွယ်ရေး၀န်ကြီး ဘယ်ရောက်နေလဲ

    စက်တင်ဘာ ၁၅၊ ၂၀၂၃

    M-Media


    -တရုတ် ကာကွယ်ရေး၀န်ကြီး လီရှောက်ဖူဟာ ရာထူးကနေ ဖယ်ရှားခံရပြီး ကွန်မြူနစ်ပါတီရဲ့ စုံစမ်းစစ်ဆေးမှုကို ခံနေရတယ်လို့ အမေရိကန်မီဒီယာတွေက ဒီကနေ့မှာ ဖော်ပြလာကြပါတယ်။ 

    လီရှောက်ဖူကို သြဂုတ်လ ၂၉ ရက်နေ့က အာဖရိကနိုင်ငံများ လုံခြုံရေးဖိုရမ်မှာ နောက်ဆုံးတွေ့ခဲ့ရတာပါ။  

    ထောက်လှမ်းရေးရင်းမြစ်တွေအရ လီဟာ ရာထူးကနေ ဖယ်ရှားခံရပြီး၊ စုံးစမ်းစစ်ဆေးမှု ခံနေရတယ်လို့ အမေရိကန်အာဏာပိုင်တွေက ယုံကြည်ထားကြပါတယ်။ 

    ပြီးခဲ့တဲ့တစ်ပတ်လောက်က ဖမ်းဆီးခံခဲ့ရတယ်လို့ ဆိုပြီး၊ ဘာ့ကြောင့် စုံစမ်းစစ်ဆေးမှု ခံနေရလဲဆိုတာကို မဖော်ပြထားပါဘူး။ 

    အမေရိကန်အစိုးရက မီဒီယာတွေရဲ့ ဒီဖော်ပြချက်ကို တုန့်ပြန်ခြင်း မရှိပါဘူး။ 

    သမ္မတရှီကျင့်ဖျင် သံမဏိ၀ါဒနဲ့ အုပ်စိုးနေနတဲ့ တရုတ်ခေါင်းဆောင်ပိုင်းမှာ ပြီးခဲ့တဲ့လအနည်းငယ်အတွင်း အကွဲအပြဲတွေ ပိုမိုဖြစ်ပွားလာပါတယ်။  

    နိုင်ငံခြားရေး၀န်ကြီး ကျင်ဂန်ဟာ ဇူလိုင်လမှာ ရုတ်တရက် လူမြင်ကွင်းကနေ ပျောက်ဆုံးသွားပြီး နောက်ပိုင်းမှာ ရာထူးက ထုတ်ပယ်လိုက်တယ်လို့ သတင်းထွက်လာပါတယ်။ 

    နျူလက်နက်တွေကို ကိုင်တွယ်တဲ့ ဒုံးကျည်တပ်ဖွဲ့ခေါင်းဆောင်ကိုလည်း တရုတ်ကွန်မြူနစ်ပါတီက ဇူလိုင်လမှာ ဖယ်ရှားအစားထိုးခဲ့ပါတယ်။ 

    ဘာ့ကြောင့် ဒီလို ဖယ်ရှားလဲဆိုတာကို တရုတ်အစိုးရဖက်က မထုတ်ပြန်ပါဘူး။ 

    Ref: CNA 

  • ပတ်၀န်းကျင်နိုင်ငံ ပိုင်နက်များကို မိမိတို့ပိုင်အဖြစ် ဖော်ပြထားသည့် တရုတ်၏ မြေပုံအသစ်

    ပတ်၀န်းကျင်နိုင်ငံ ပိုင်နက်များကို မိမိတို့ပိုင်အဖြစ် ဖော်ပြထားသည့် တရုတ်၏ မြေပုံအသစ်

    သြဂုတ် ၃၁၊ ၂၀၂၃

    M-Media 


    (ဓာတ်ပုံ – အိန္ဒိယနှင့် တရုတ်အကြား ပိုင်နက်အငြင်းပွားမှုပြ မြေပုံ)

    -တရုတ် သဘာ၀သယံဇာတ ၀န်ကြီးဌာနက ထုတ်ပြန်တဲ့ ၂၀၂၃  မြေပုံမှာ အငြင်းပွား ပိုင်နက်တွေကို တရုတ်ပိုင်နက်အဖြစ် ထည့်သွင်း ရေးဆွဲထားတဲ့အတွက် ပတ်၀န်းကျင်နိုင်ငံတွေက ၀ေဖန်နေကြပါတယ်။ 

    အထူးသဖြင့် တောင်တရုတ်ပင်လယ်က ပိုင်နက်တွေ၊ ရုရှားနဲ့ အိန္ဒိယနယ်စပ်က ပိုင်နက်တွေ ဖြစ်ပါတယ်။ 

    တောင်တရုတ်ပင်လယ်ကိစ္စမှာ တရုတ်ဟာ မလေးရှား၊ ဗီယက်နမ်၊ ဖိလစ်ပိုင်၊ ဘရူနိုင်းတို့နဲ့ ရေပိုင်နက် အငြင်းပွားမှုတွေ ရှိနေတာပါ။ 

    မလေးရှား နိုင်ငံခြားရေး၀န်ကြီး ဇမ်ဘရီ အဘ်ဒူလ် ကာဒရ်က တရုတ်ရဲ့ အခုမြေပုံသစ်နဲ့ပတ်သက်ပြီး တရား၀င် ကန့်ကွက်သွားမယ်လို့ သြဂုတ်လ ၃၁ ရက်နေ့မှာ ထုတ်ပြန်ပါတယ်။ 

    ဖိလစ်ပိုင်ကလည်း တရုတ်ကို တရား၀င် ကန့်ကွက်ထားပြီးဖြစ်ပါတယ်။ ဖိလစ်ပိုင်ရဲ့ ပိုင်ဆိုင်မှု၊ ရေကြောင်း နယ်နမိတ်ကို တရုတ်က သူတို့ပိုင်နက်အဖြစ် မြေပုံမှာ ဖော်ပြထားတာဟာ နိုင်ငံတကာ ဥပဒေနဲ့ မကိုက်ညီဘူးလို့ ဖိလစ်ပိုင် နိုင်ငံခြားရေး၀န်ကြီးဌာနက ထုတ်ပြန်တဲ့ ကြေငြာချက်မှာ ဖော်ပြထားပါတယ်။ 

    အင်ဒိုနီးရှားဟာ တောင်တရုတ်ပင်လယ် အငြင်းပွားမှုမှာ မပါ၀င်ပါဘူး။ ဒါပေမယ့် အခု တရုတ်ရဲ့ မြေပုံအသစ်မှာ အင်ဒိုနီးရှား ရေပိုင်နက်အတွင်းရှိနေတဲ့ Natuna ကျွန်းစုတစ်ခုကို တရုတ်က သူတို့ပိုင်တယ်ဆိုပြီး ထည့်သွင်းရေးဆွဲထားပါတယ်။ 

    အင်ဒိုနိုင်ငံခြားရေး၀န်ကြီး ရတ္တနို မာဆူဒီက နယ်နမိတ်ရေးဆွဲမှုတွေဟာ နိုင်ငံတကာက  သတ်မှတ်ပြဌာန်းချက်တွေအတိုင်း ဖြစ်ဖို့ လိုအပ်တယ်လို့ ပြောကြားခဲ့ပါတယ်။

    ထိုင်၀မ်ကို တရုတ်ပိုင်အဖြစ် ထည့်သွင်းရေးဆွဲထားမှုကိုလည်း ထိုင်၀မ်ဖက်က ကန့်ကွက်ခဲ့ပါတယ်။ 

    ထိုင်၀မ်နိုင်ငံခြားရေး၀န်ကြီးဌာန ပြောရေးဆိုခွင့်ရှိသူ ဂျက်ဖ်လျူက ထိုင်၀မ်ကို တရုတ်က ဘယ်တုန်းကမှ ပိုင်ဆိုင်ခဲ့တာမဟုတ်ဘဲ ဒါကို နိုင်ငံတကာကလည်း လက်ခံထားကြောင်း တုန့်ပြန်ပြောဆိုခဲ့ပါတယ်။ 

    ပြင်းပြင်းထန်ထန်ကန့်ကွက်

    တရုတ်ရဲ့ ၂၀၂၃ မြေပုံသစ်ကို ပြင်းပြင်းထန်ထန် ကန့်ကွက်သူက အိမ်နီးချင်း အိန္ဒိယနိုင်ငံ ဖြစ်ပါတယ်။ 

    တရုတ်နဲ့ အိန္ဒိယဟာ နယ်စပ်က ကီလိုမီတာ ၃၅၀၀ လောက် ထိစပ်နေတဲ့ နေရာအတွက် ပိုင်ဆိုင်မှု အငြင်းပွားနေကြတာပါ။ 

    အိန္ဒိယနိုင်ငံ အရှေ့မြောက်ပိုင်း အရူနာချာလ် ပရာဒက်ရှ်၊ အနောက်မြောက်ပိုင်းက ကက်ရှ်မီးယားဒေသတွေမှာ ဖြစ်ပါတယ်။ ဒီအငြင်းပွားမှုအတွက် နှစ်ဖက် စစ်ပွဲဖြစ်တဲ့အထိ အခြေအနေ ဆိုးခဲ့တာပါ။ 

    အခု တရုတ်ရဲ့ မြေပုံအသစ်မှာ ဒီဒေသတွေက အငြင်းပွား ပိုင်နက် နှစ်ခုစလုံးကို တရုတ်ပိုင်အဖြစ် ဖော်ပြထားပါတယ်။ 

    အိန္ဒိယအာဏာပိုင်တွေက ဒီကိစ္စအတွက် ချက်ခြင်းပဲ ဆန့်ကျင်ကန့်ကွက်ခဲ့ပါတယ်။ အခြေအမြစ်မဲ့တဲ့ ဒီလို လုပ်ရပ်တွေဟာ နှစ်နိုင်ငံ နယ်နမိတ်ကိစ္စ အဖြေရှာမှုကို ပိုမိုရှုပ်ထွေးစေမှာဖြစ်ကြောင်း နိုင်ငံခြားရေး၀န်ကြီးဌာန ပြောရေးဆိုခွင့်ရှိသူ အရင်ဒမ် ဘဂ်ချီက ပြောပါတယ်။ 

    တရုတ်နိုင်ငံခြားရေး၀န်ကြီးဌာနက အခု မြေပုံအသစ်ကို ဓမ္မဓိဌာန်ကျကျ သုံးသပ်ဖို့၊ ချဲ့ကားမပြောဆို တုန့်ပြန်ပြောကြားခဲ့ပါတယ်။ 

    အိမ်နီးချင်းနိုင်ငံက ပိုင်နက်တွေကို သူတို့ပိုင်တယ်ဆိုပြီး မြေပုံမှာ ထည့်သွင်းရေးဆွဲမှုအတွက် တရုတ်ဟာ အရင်ကလည်း ဆန့်ကျင်ကန့်ကွက်မှုတွေကို ခံခဲ့ရပါတယ်။ 

    Ref: CNA