Tag: China

သြဂုတ် ၂၊ ၂၀၂၃

M-Media 

-နျူကလီးယားလက်နက်တွေကို စီမံကွပ်ကဲနေတဲ့ တပ်ဖွဲ့ရဲ့ ခေါင်းဆောင်နှစ်ယောက်ကို တရုတ်သမ္မတ ရှီကျင့်ဖျင်က ဖယ်ရှားပြီး အစားထိုး ခန့်အပ်ခဲ့ပါတယ်။ 

တရုတ်ပြည်သူ့လွတ်မြောက်ရေးတပ်ရဲ့ ဒုံးကျည်တပ်ဖွဲ့ ခေါင်းဆောင် ဗိုလ်ချုပ် လီယီချိုနဲ့ သူ့လက်ထောက်တို့ဟာ လူမြင်ကွင်းကနေ လအတော်ကြာ ပျောက်နေခဲ့တာပါ။ 

သူတို့နေရာကို ရေတပ် ဒုတိယအကြီးအကဲဟောင်း ၀မ်ဟိုဘင်၊ ကွန်မြူနစ်ပါတီ ဗဟိုကော်မတီ၀င် ရွှီဇီရှန်းတို့နဲ့ အစားထိုးလိုက်ကြောင်း ပြီးခဲ့တဲ့ရက်ပိုင်းမှာ သတင်းထွက်လာပါတယ်။ 

ဒါဟာ တရုတ်စစ်တပ် ခေါင်းဆောင်ပိုင်းမှာ ၁၀ စုနှစ်တစ်ခုအတွင်း စီစဥ်ထားခြင်းမရှိဘဲ အံ့အားသင့်ဖွယ် ပြောင်းလဲမှု ဖြစ်ပါတယ်။ 

တရုတ်သမ္မတ ရှီကျင့်ဖျင်က သူ့ရဲ့အာဏာကို ပြိုင်ဖက်ကင်း စုစည်းနိုင်အောင် ကြိုးစားမှုတစ်ခုလို့ ကျွမ်းကျင်သူတွေက သုံးသပ်ပါတယ်။ 

ဗိုလ်ချုပ် လီယီချိုနဲ့ သူ့ရဲ့လက်ထောက်၊ ဒုံးကျည်တပ်ဖွဲ့ရဲ့ ဒုတိယအကြီးအကဲဟောင်းတို့ဟာ ခြစားမှု တိုက်ဖျက်ရေး ကော်မရှင်ရဲ့ စုံစမ်းစစ်ဆေးမှုကို ခံနေရတယ်လို့ South China Morning Post က ပြီးခဲ့တဲ့တစ်ပတ်မှာ ဖော်ပြပါတယ်။ 

သမ္မတရှီက ပါတီဟာ စစ်တပ်အပေါ် အကြွင်းမဲ့ ခေါင်းဆောင်နိုင်ရေး ကိစ္စနဲ့ပတ်သက်ပြီး ပြဿနာရှိနေတဲ့အတွက် ဒါကို ဖြေရှင်းဖို့ လိုအပ်နေကြောင်း ပြီးခဲ့တဲ့လက ပြုလုပ်တဲ့ အစည်းအ၀ေးတစ်ခုမှာ ပြောကြားခဲ့ပါတယ်။ 

Ref: BBC

ဇူလိုင် ၁၁၊ ၂၀၂၃

M-Media 

-တရုတ်နိုင်ငံတောင်ပိုင်းက မူကြိုတစ်ခုမှာ မနေ့က ဓားထိုးမှု ဖြစ်ပွားခဲ့ပြီး ကလေးငယ်တွေအပါအ၀င် လူ ၆ ဦး သေဆုံးခဲ့ပါတယ်။ 

ပြီးခဲ့တဲ့ ဆယ်စုနှစ်တွေအတွင်း ကလေးငယ်တွေကို ပစ်မှတ်ထား တိုက်ခိုက်မှု တရုတ်နိုင်ငံမှာ မြင့်တက်လာပြီး၊ လူ့အဖွဲ့အစည်းအပေါ် မုန်းတီးမှုက ဒီလိုကျူးလွန်ရတဲ့ နောက်ကွယ်က အကြောင်းအရင်းဖြစ်တယ်လို့ ကျွမ်းကျင်သူတွေက သုံးသပ်ပါတယ်။ 

ဂွမ်ဒုန်ပြည်နယ်က မနေ့က တိုက်ခိုက်မှုဟာ လက်စားချေမှုဖြစ်တယ်လို့ တရုတ်ဆိုရှယ်မီဒီယာတွေမှာ ရေးပါတယ်။ သေဆုံးသွားသူတွေထဲက လူကြီးတစ်ဦးဟာ အရင်က သားဖြစ်သူကို ကားနဲ့ တိုက်ခဲ့တဲ့အတွက် အဖေက လက်တုန့်ပြန်တာလို့ ဆိုပါတယ်။ 

၁၉၉၀ ပြည့်နှစ်နောက်ပိုင်း တရုတ်နိုင်ငံမှာ ကလေးငယ်တွေ မတော်တဆဖြစ်သေဆုံးမှု၊ အကြမ်းဖက်တိုက်ခိုက်ခံရမှုတွေ မြင့်တက်လာပါတယ်။ 

၂၀၀၁ ခုနှစ် နိုင်ငံတောင်ပိုင်း ကျန်းရှီးပြည်နယ်က ကျောင်းတစ်ခုမှာ ပေါက်ကွဲမှုဖြစ်ပြီး ကလေးငယ် ၄၁ ဦး သေဆုံးခဲ့ပါတယ်။ ကျောင်းက မီးပန်းစက်ရုံလည်း တွဲဖွင့်ထားကာ ကလေးငယ်တွေကို အလုပ်ခိုင်းပါတယ်။ သိုလှောင်ထားတဲ့ မီးပန်းတွေ ပေါက်ကွဲခဲ့တာဖြစ်ပြီး ကလေးငယ်တွေအပေါ် လုပ်အားခေါင်းပုံဖြတ်မှုကို တစ်နိုင်ငံလုံက ၀ေဖန်ပြစ်တင်ခဲ့ပါတယ်။ 

၂၀၁၀ ခုနှစ်မှာ တရုတ်နိုင်ငံတစ်၀ှမ်း ဓားထိုးတိုက်ခိုက်မှုတွေ ဖြစ်ပွားခဲ့ပြီး ကလေးငယ် ၁၇ ဦး သေဆုံးခဲ့ပါတယ်။ ဒီတိုက်ခိုက်မှုတွေဟာ ကလေးငယ်တွေကို အဓိက ပစ်မှတ်ထားတာပါ။ 

အဲဒီအချိန်က တရုတ်၀န်ကြီးချုပ် ၀မ်ကျားပေါင်ဟာ တိုက်ခိုက်မှုဖြစ်တဲ့ နေရာတစ်ခုကို သွားရောက်ခဲ့ပြီး စာသင်ကျောင်းတွေမှာ လုံခြုံရေးတိုးမြှင့်ဖို့၊ ဒီတိုက်ခိုက်မှုတွေ ဖြစ်စေတဲ့ လူ့အဖွဲ့အစည်းအတွင်း မကျေနပ်မှုတွေကို ဖြေရှင်းဖို့ တိုက်တွန်းခဲ့ပါတယ်။ 

နောက်ကွယ်က အကြောင်းအရင်း

——————-

တိုက်ခိုက်မှုတွေကို အမျိုးသားတွေက ကျူးလွန်ကြတာပါ။ 

၂၀၁၈ ခုနှစ်မှာ နိုင်ငံအနောက်တောင်ပိုင်း ယူနန်ပြည်က ကျောင်းတစ်ခုမှာ အမျိုးသားတစ်ဦးက လောင်ကျွမ်းတဲ့ ဓာတုဆေးရည်တွေနဲ့ ပက်ဖြန်းတိုက်ခိုက်မှုတစ်ခု ဖြစ်ပါတယ်။ သေဆုံးသူ မရှိပေမယ့် ကလေးငယ် ၅၀ ဆေးကုသမှု ခံယူခဲ့ရပြီး တစ်ချို့ ဆိုးဆိုးရွားရွား ထိခိုက်ခဲ့ပါတယ်။ 

ကျွမ်းကျင်သူတွေက အမျိုးသားတွေဟာ လူ့အဖွဲ့အစည်းအပေါ် မုန်းတီး၊ မကျေမနပ်ဖြစ်လာတဲ့အခါ သူ့ပတ်၀န်းကျင်က လူတွေ ထိခိုက်ခံစားရအောင် ဒီလိုတိုက်ခိုက်မှုတွေ လုပ်တတ်ကြတယ်လို့ ပြောပါတယ်။ 

တရုတ်လူ့အဖွဲ့အစည်းမှာ ပြီးခဲ့တဲ့ နှစ် ၂၀ လောက်အတွင်း လူမှုစီးပွားရေးမှာ ကြီးကြီးမားမား ပြောင်းလဲမှုတွေ ဖြစ်ခဲ့ပါတယ်။ အပြောင်းအလဲကြောင့် ဆင်းရဲချမ်းသာ ကွာဟာမှုလည်း မြင့်တက်လာပါတယ်။ 

လက်ရှိ တရုတ်လူ့အဖွဲ့အစည်းမှာ အမျိုးသားတွေ ကားမရှိရင် ရည်စားမရ၊ အိမ်မရှိရင် မိန်းမမရဆိုတဲ့ နောက်ပြောင်ကျီစယ်မှုတွေပါ ဖြစ်လာပါတယ်။ 

ကိုဗစ်ကပ်ရောဂါက ဒီအခြေအနေကို ပိုဆိုးစေခဲ့ပြီး အလုပ်လက်မဲ့ရာခိုင်နှုန်းက ၂၀ ရာခိုင်းနှုန်းအထိ ရောက်လာပါတယ်။ 

ကျွမ်းကျင်သူတွေကတော့ နိုင်ငံအတွင်း ဆင်းရဲချမ်းသာမှုကွာခြားချက်ကို မလျှော့ချနိုင်ဘူးဆိုရင် လူ့အဖွဲ့အစည်းကို ထိခိုက်စေတဲ့ ဒီလိုတိုက်ခိုက်မှုတွေ ပိုမိုအဖြစ်များလာနိုင်တယ်လို့ သုံးသပ်ကြပါတယ်။ 

 Ref: BBC 

မေ ၁၉၊ ၂၀၂၃

M-Media 

-မော်တော်ကား ထုတ်လုပ်တင်ပို့ရောင်းချမှုမှာ ဂျပန်ကို ကျော်တက်နိုင်ပြီလို့ တရုတ်က ကြေငြာပါတယ်။ 

အခုနှစ် ပထမ ၃ လပတ်အတွင်း တရုတ်ဟာ ကမ္ဘာတစ်၀ှမ်း ကားအစီးရေ ၁.၀၇ သန်း တင်ပို့နိုင်ခဲ့ပြီး၊ ၂၀၂၂ ခုနှစ် ပထမ ၃ လပတ်ထက် ၅၈ ရာခိုင်နှုန်း ပိုမိုမြင့်တက်လာတာပါ။ 

ဂျပန်ကတော့ ဇန်န၀ါရီကနေ မတ်လကုန်အထိ ကားအစီးရေ ၉ သိန်းခွဲသာ တင်ပို့ထားပါတယ်။ 

ကမ္ဘာတစ်၀ှမ်း လျှပ်စစ်ကား ၀ယ်လိုအား များလာတာ၊ ရုရှားကို ကားရောင်းချမှု မြင့်တက်လာတာတို့က တရုတ်ကို ကမ္ဘာ့ထိပ်တန်း ကားတင်ပို့တဲ့နိုင်ငံ ဖြစ်လာစေတာ ဖြစ်ပါတယ်။ 

၂၀၂၂ ခုနှစ်အတွင်း တရုတ်ဟာ ကားအစီးရေ ၃.၂ သန်း တင်ပို့ရောင်းချနိုင်ခဲ့ပြီး ကမ္ဘာ့ ဒုတိယ ကားတင်ပို့မှုအများဆုံးဖြစ်တဲ့ ဂျာမနီကို ကျော်တက်နိုင်ခဲ့ပါတယ်။

Ref: BBC