ဖဖော်ဝါရီ ၁၈၊ ၂၀၁၆
M-Media
– တောင်တရုတ်ပင်လယ်အတွင်းရှိ ပိုင်ဆိုင်မှုအငြင်းပွားနေသည့် ကျွန်းတွင် လက်နက်များချထားသည်ဆိုသည့် သတင်းအား တရုတ်နိုင်ငံက ယနေ့တွင် အတည်ပြုခဲ့ပြီး၊ မဟာဗျူဟာကျသည့်ဒေသတွင် ထိုသို့ စစ်ရေးပြင်ဆင်မှုအတွက် အမေရိကန်နိုင်ငံခြားရေးဝန်ကြီးက ရှုတ်ချလိုက်သည်။
ပါရာဆဲလ်ကျွန်းစုရှိ ကျွန်းတစ်ကျွန်းတွင် တရုတ်က ၈ လုံးပစ်ခတ်နိုင်သည့် ဒုံးကျည်ပစ်စင် ၂ ခုနှင့် ရေဒါစနစ်တစ်ခုတို့ကို ချထားသည်ဟု အမေရိကန်နှင့် ထိုင်ဝမ်တို့က ယခုရက်ပိုင်းအတွင်း ပြောကြားခဲ့ပြီးနောက် တရုတ်က ယနေ့တွင် ထိုကဲ့သို့ အတည်ပြုခဲ့ခြင်းဖြစ်သည်။
အဆိုပါ ပါရာဆဲလ်ကျွန်းစုကို ထိုင်ဝမ်နှင့် ဗီယက်နမ်တို့ကလည်း ပိုင်ဆိုင်ကြောင်း ကြေငြာထားသည်။ တရုတ်ကာကွယ်ရေးဝန်ကြီးဌာနကမူ မိမိတို့မှာ ထိုကျွန်း၌ လက်နက်များကို တပ်ဆင်ထားသည်မှာ ကြာမြင့်နေပြီဖြစ်သည်ဟု ကွန်မြူနစ်ပါတီနှင့် နီးစပ်သည့် Global Times သတင်းစာသို့ ပြောကြားခဲ့သည်။ သို့သော်လည်း မည်သည့် လက်နက်ဖြစ်သည်ကို ထုတ်ဖော်ပြောဆိုခြင်း မပြုခဲ့ပေ။
ထို့ပြင် အနောက်တိုင်းမီဒီယာများမှာ တရုတ်နိုင်ငံ၏ ခြိမ်းခြောက်မှုဆိုသည့် ဓာတ်ပြားဟောင်းကို ပြန်ဖွင့်ခြင်းသာဖြစ်သည်ဟု ၀န်ကြီးဌာနက ထည့်သွင်းပြောကြားခဲ့သည်။
Ref: Channelnewsasia
