Tag: EPL

မတ် ၅၊ ၂၀၁၅
M-Media

– ယနေ့မနက် ဆွမ်ဆီးအား အနိုင်ရခဲ့သည့် မိမိအသင်းမှာ ချန်ပီယံလိဂ်ဝင်ခွင့်အတွက် အသက်ရှိနေသေးသည်ဟု စပါးနည်းပြ ပိုချက်တီနိုက ပြောကြားလိုက်သည်။

ထိုပွဲတွင် စပါးမှာ အကြိတ်အနယ်ကစားခဲ့ရကာ နေဆာချဒ်လီ၊ ရွိုင်ယန် မာဆန်နှင့် အန်ဒရို့စ် တောင်းဆန်တို့၏ ဂိုးများဖြင့် ဆွမ်ဆီးအား ၃ ဂိုး ၂ ဂိုးဖြင့် အနိုင်ရခဲ့သည်။ ထိုပွဲမှာ ချယ်ဆီးအား လိဂ်ဖလားဖိုင်နယ်တွင် ရှုံးနိမ့်ခဲ့ရသည့် စပါးအသင်းအတွက် အရှုံးကို ကုစားနိုင်သည့် ပွဲလည်းဖြစ်ခဲ့ပြီး ပိုချက်တီနိုကမူ အသင်း၏ ကစားပုံကို ချီးကျူးခဲ့သည်။

“ဒီနေ့ညမှာတော့ ကျွန်တော်တို့ဟာ (ချန်ပီယံလိဂ်အတွက်) ဆက်လက်အသက်ရှိနေပြီး ဆက်လက်တိုးတက်နေတယ်ဆိုတာကို သက်သေပြနိုင်ခဲ့ပါတယ်။ ကျွန်တော်တို့ တစ်ဆင့်ချင်းသွားဖို့လိုပြီး ကျွန်တော်တို့ရဲ့အဆင့်ကို မြှင့်ဖို့အတွက် ဆက်လက်ကြိုးစားသွားဖို့လည်း လိုပါတယ်။ အဲဒီနောက်မှာတော့ စောင့်ကြရမှာပေါ့ဗျာ” ဟု ပိုချက်တီနိုက သတင်းထောက်များအား ပြောကြားခဲ့သည်။

ထိုပွဲမှာ ပြိုင်ပွဲအားလုံး၌ နောက်ဆုံး ၆ ပွဲတွင် စပါးအသင်း၏ ပထမဆုံးနိုင်ပွဲဖြစ်ပြီး ပိုချက်တီနိုကမူ ကစားသမားများမှာ အနိုင်နှင့်ထိုက်တန်ပြီး အရေးပါသော ၃ မှတ်ဖြစ်ကြောင်း ထပ်လောင်းပြောကြားခဲ့သည်။စပါးမှာ လက်ရှိအချိန်တွင် ရမှတ် ၄၇ မှတ်ဖြင့် အဆင့် ၇ နေရာတွင်ရှိနေကာ အဆင့် ၄ မှ မန်ယူနှင့် ၆ မှတ်ကွာဟနေသည်။

Ref: Goal.com

မတ် ၄၊ ၂၀၁၅
M-Media

– မန်စီးတီးအသင်း၏ နည်းပြနေရာတွင် တည်မြဲရေးအတွက် မိမိအနေဖြင့် ဖလားရရန် မလိုအပ်ဟု နည်းပြ ပယ်လီဂရီနီက ပြောကြားလိုက်သည်။

ပြီးခဲ့သည့် ပရီးမီးယားလိဂ်ပွဲတွင် လီဗာပူးလ်အား ၂ ဂိုး ၁ ဂိုးဖြင့် ရှုံးနိမ့်ခဲ့ပြီးနောက် တစ်ပွဲကစားရန် ကျန်ရှိနေသည့် ထိပ်ဆုံးမှ ချယ်ဆီးနှင့် ၅ မှတ်ကွာသွားခဲ့ကာ ချန်ပီယံဘွဲ့ ကာကွယ်ရေး ရည်မှန်းချက်မှာ ပြိုပျက်လုနီးပါး ဖြစ်ခဲ့သည်။

ထို့ပြင် ချန်ပီယံလိဂ် ပထမအကျော့တွင်လည်း ဘာစီလိုနာအသင်းအား ရှုံးနိမ့်ခဲ့သောကြောင့် နောက်တစ်ဆင့်တက်ရန် ခက်ခဲပြီး ဖလားလက်မဲ့ရာသီအဖြစ် ရင်ဆိုင်ရရန် နီးစပ်နေသောကြောင့် နည်းပြပယ်လီဂရီနီမှာ ဘိုင်ယန်နည်းပြ ဂွာဒီယိုလာနှင့် အစားထိုးခံရတော့မည်ဟု သတင်းများက ဖော်ပြနေကြသည်။

သို့သော်လည်း ပယ်လီဂရီနီကမူ မိမိအနေဖြင့် စိုးရိမ်မှုမရှိဘဲ မိမိဖိအားရှိသည့်အချိန်မှာ အသင်း၏ စွမ်းဆောင်ရည် အကောင်းဆုံးမရှိသည့် အချိန်သာဖြစ်သည်ဟု ပြောကြားခဲ့သည်။

“ကျွန်တော့်ရဲ့ ဖလားအရေအတွက်နဲ့ပတ်သက်လို့တော့ ဖိအား ဘယ်တုန်းကှ မရှိခဲ့ပါဘူး။ ကျွန်တော် ဖိအားရှိတဲ့အချိန်က ကျွန်တော်ကစားချင်တဲ့ပုံစံအတိုင်း အသင်းက မကစားတဲ့အချိန်မှာပါ။ ကျွန်တော်ထပ်ပြောရရင် စာချုပ်လက်မှတ်ထိုးတဲ့အချိန်မှာ တစ်နှစ်တစ်လုံး ဖလားရရမယ်။ ငါးနှစ်မှာ ဖလားငါးလုံး ရရမယ်ဆိုတာမျိုး ကျွန်တော့်ကို ပြောမထားပါဘူး။ ဖလားဆိုတာ အရေးပါပေမယ့် အရမ်း အရေးပါတာမျိုးတော့ မဟုတ်ပါဘူး” ဟု ပယ်လီဂရီနီက ပြောကြားခဲ့သည်။

မန်စီးတီးမှာ ပရီးမီးယားလိဂ်ပွဲစဉ်အဖြစ် ယနေ့ညတွင် လက်စတာစီးတီးနှင့် ကစားရမည်ဖြစ်ပြီး ပယ်လီဂရီနီကမူ မိမိတို့အသင်းတွင် ဒဏ်ရာရသူမရှိဟု ပြောကြားခဲ့သည်။

Ref: Goal.com

မတ် ၄၊ ၂၀၁၅
M-Media

– ယနေ့နံနက်က ၀က်စ်ဟမ်းအသင်းအား အနိုင်ရခဲ့ခြင်းမှာ ဇနီးဖြစ်သူ သန်းထီပေါက်သည်ထက် ပိုမိုအရေးပါသည်ဟု ခံစားမိခဲ့ကြောင်း အက်စတွန်ဗီလာနည်းပြ တင်ရှားဝုဒ်က ပြောကြားလိုက်သည်။

ဗီလာပက်ခ်တွင် ကစားခဲ့သည့် အဆိုပါပွဲတွင် အက်စတွန်ဗီလာမှာ ခရစ္စတီယန် ဘန်တီကီ၏ နောက်ဆုံးမိနစ်ပင်နယ်တီနှင့် ၀က်စ်ဟမ်းအား ၂ ဂိုး ၁ ဂိုးဖြင့် အနိုင်ရရှိခဲ့ပြီး စပါးနည်းပြဟောင်း တင်ရှားဝုဒ် ဗီလာအား ကိုင်တွယ်ပြီးနောက် ပထမဆုံးနိုင်ပွဲလည်းဖြစ်ခဲ့သည်။

ပွဲချိန်အတွင်း ရှားဝုဒ်မှာ အလွန်စိတ်လှုပ်ရှားခဲ့ပြီး ဆုတောင်းမှုအမျိုးမျိုးကိုလည်း ပြုလုပ်ခဲ့ကာ နောက်ဆုံး မိနစ် ပင်နယ်တီဝင်သွားချိန်တွင် အလွန်အမင်း အောင်ပွဲခံခဲ့သည်။

“မယုံကြည်နိုင်လောက်စရာဖြစ်ပြီး အနိုင်ရတဲ့အတွက် ထူးခြားတဲ့ ခံစားမှုလည်း ဖြစ်ခဲ့ပါတယ်။ ကျွန်တော့်ဇနီးက သူထီထိုးလာပြီး ဒီထီပေါက်ရင် စတာလင်ပေါင် ၅၄ သန်းလောက်ရမယ်လို့ ပြောခဲ့ပါတယ်။ ကျွန်တော်ကတော့ ‘ငါ အနိုင် ၃ မှတ်ကို ပိုလိုလားပြီး အဲဒီသန်းထီပေါက်သလိုပဲ’ လို့ ပြန်ပြောခဲ့ပါတယ်” ဟု ရှားဝုဒ်က BT Sport သို့ ပြောကြားခဲ့သည်။

ထိုပွဲမှာ ရှားဝုဒ်၏ တတိယမြောက်ပွဲဖြစ်ပြီး ပထမ ၂ ပွဲတွင်မူ အရှုံးနှင့်သာ ရင်ဆိုင်ခဲ့ရသည်။ ရှားဝုဒ်က မိမိတို့အသင်းမှာ ပထမ ၂ ပွဲတွင် မကောင်းခဲ့ကြောင်း၊ သို့သော်လည်း ယနေ့တွင် ကစားပုံ တိုးတက်ခဲ့ပြီး ပိုမိုတိုးတက်ရန် လိုအပ်ကြောင်း ထပ်လောင်းပြောကြားခဲ့သည်။

ယခုပွဲအနိုင်မှာ တန်းဆင်းဇုန်နားရောက်နေသည့် အက်စတွန်ဗီလာအတွက် အရေးပါသည့် နိုင်ပွဲလည်းဖြစ်သည်။

Ref: Dailymail

မတ် ၂၊ ၂၀၁၅
M-Media

– ဒီတစ်ပတ်ပရီးမီးယားလိဂ်မှာ လီဗာပူးလ်တို့ဟာ ထိပ်တန်းအဆင့် ပြန်ရောက်လာပြီဆိုတာကို ပြသနိုင်ခဲ့ပြီး အာဆင်နယ်၊ မန်ယူတို့လည်း မျက်နှာပန်းလှခဲ့ကြပါတယ်။

ဒီတစ်ပတ်ရဲ့ Match of The Week ဖြစ်တဲ့ လီဗာပူးလ်နဲ့ မန်စီးတီးတို့ပွဲမှာ ရော်ဂျာရဲ့လီဗာပူးလ် ထိုက်ထိုက်တန်ထန် အနိုင်ရခဲ့ပါတယ်။ ပထမပိုင်းမှာ ပွဲဟာ တော်တော်လေးမြိုင်ခဲ့ပြီး ဟန်ဒါဆန်က ပွဲအစ ၁၁ မိနစ်မှာပဲ ဦးဆောင်ဂိုး သွင်းပေးနိုင်ခဲ့ပါတယ်။ အိမ်ရှင် လီဗာပူးလ်တို့ ကစားပုံ ညက်ညောခဲ့ပြီး မနှစ်က ခြေစွမ်းနီးနီး ဒီပွဲမှာ ပြန်လည်ပြသနိုင်ခဲ့ပါတယ်။ လီဗာပူးလ်ရဲ့ ဦးဆောင်ဂိုးကို ၂၅ မိနစ်မှာ ဇက်ကိုက သူ့ရဲ့ အလုံး ၅၀ မြောက် ပရီးမီးယားလိဂ်ဂိုးနဲ့ ပြန်ချေပနိုင်ခဲ့ပါတယ်။ ဒါပေမယ့် ၇၅ မိနစ်မှာ ဖီလစ်ပီ ကော်တင်ညိုရဲ့ အင်မတန်လှပတဲ့ ဂိုးကိုတော့ မန်စီးတီးတို့ ပြန်လည်ချေပနိုင်ခြင်းမရှိဘဲ အန်ဖီးလ်ကနေ အမှတ်ဗလာနဲ့ အိမ်ပြန်ခဲ့ရပါတယ်။

ချန်ပီယံလိဂ်မှာ စိတ်ပျက်ခဲ့ရမှုကို အာဆင်နယ်တို့ အဲဗာတန်ကို အနိုင်ယူပြီး ပြန်လည်ကုစားနိုင်ခဲ့ပါတယ်။ ဒါပေမယ့် လွယ်လွယ်ကူကူ အနိုင်ရတာမျိုးမဟုတ်ဘဲ အဲဗာတန်ရဲ့ ထိုးဖောက်မှုကို အာဆင်နယ်နောက်တန်း တည်တည်ငြိမ်ငြိမ်နဲ့ ကာကွယ်နိုင်လို့သာ အနိုင် ၃ မှတ်သေချာခဲ့တာပါ။ အာဆင်နယ်အတွက် အနိုင်ဂိုးတွေကို တိုက်စစ်မှူး ဂျရူးနဲ့ ရိုစစ္စကီးတို့က သွင်းပေးခဲ့တာဖြစ်ပြီး ဒီ ၂ ဂိုးစလုံးကို အိုဇေးလ်က ဖန်တီးပေးခဲ့တာဖြစ်ပါတယ်။

မန်ယူကလည်း ရူနီရဲ့ သွင်းဂိုး ၂ ဂိုးနဲ့အတူ ဆန်းဒါးလန်းကို အနိုင်ရခဲ့ပါတယ်။ ဒီဂိုးတွေဟာ ရူနီရဲ့ ၈ ပွဲဆက် ဂိုးမိုခေါင်မှုကို အဆုံးသတ်နိုင်ခဲ့တာလည်း ဖြစ်ပါတယ်။ ဒုတိယပိုင်း နောက်ဆုံးမိနစ်တွေမှာ မန်ယူတိုက်စစ်ရဲ့ တိုးဖောက်တိုက်စစ်ဆင်မှုတွေကို ဆန်းဒါးလန်းဂိုးသမား ပန်သီလီမန် အကောင်းဆုံး ကာကွယ်နိုင်ခဲ့တာကြောင့် မန်ယူတို့ နောက်ထပ် ဂိုးမရခဲ့တာဖြစ်ပါတယ်။ ဒီပွဲမှာ ဗန်ဂါးလ်က ဒီမာရီယာကို မထည့်ခဲ့ဘဲ ပုံမှန်ခြေစွမ်းရဖို့ အချိန်ယူရဦးမယ်လို့ ပွဲအပြီးမှာ ပြောခဲ့ပါတယ်။

နယူးကာဆယ်ကတော့ စစ်စီရဲ့ ၃၇ မိနစ်ဂိုးနဲ့ အိမ်ကွင်းမှာ အက်စတွန်ဗီလာကို အနိုင်ရခဲ့ပြီး ဗီလာနည်းပြသစ် တင်ရှားဝုဒ်ရဲ့ ၂ ပွဲဆက် ရာနှုန်းပြည့်အရှုံးလည်း ဖြစ်ခဲ့ပါတယ်။

ဆောက်သက်တမ်ကတော့ အဝေးကွင်းမှာ ၀က်စ်ဘရွန်းကို ပွဲအစ ၂ မိနစ်ဂိုးနဲ့ ရှုံးနိမ့်ခဲ့ရပြီး ခရစ္စတယ်ပဲလေ့စ်က အဝေးကွင်းမှာ ၀က်စ်ဟမ်းကို ၃ ဂိုး ၁ ဂိုးနဲ့ အနိုင်ရခဲ့ပါတယ်။ ဒီအနိုင်ဟာ အလန်ပါဂျူး တာဝန်ယူပြီးတဲ့နောက်ပိုင်း ၅ ပွဲမြောက် အဝေးကွင်းနိုင်ပွဲဖြစ်ခဲ့ပြီး ရာနှုန်းပြည့် အဝေးကွင်းနိုင်ပွဲလည်း ဖြစ်ပါတယ်။

ဒီတစ်ပတ် ပရီးမီးယားလိဂ်ရဲ့ ရလဒ်များကတော့ အောက်ပါအတိုင်း ဖြစ်ပါတယ်။

ဝက်စ်ဟမ်း ၁-၃ ခရစ္စတယ်ပဲလေ့စ်
ဘန်လေ ၀-၁ ဆွမ်ဆီး
မန်ယူ ၂-၀ ဆန်းဒါးလန်း
နယူးကာဆယ် ၁-၀ အက်စတွန်ဗီလာ
စတုတ် ၁-၀ ဟားလ်စီးတီး
ဝက်စ်ဘရွန်း ၁-၀ ဆောက်သက်တမ်
လီဗာပူလ်း ၂-၁ မန်စီးတီး
အာဆင်နယ် ၂-၀ အဲဗာတန်

မတ် ၁၊ ၂၀၁၅
M-Media

– အာဆင်နယ်နည်းပြအဖြစ် မိမိမှာ ဖိအားများကို ခံစားနေရသည်ဟု နည်းပြ၀င်းဂါးက ၀န်ခံလိုက်ပြီး ကျန်ရှိသည့် ရာသီ လက်ကျန်ပွဲများအတွက် မိမိတို့အသင်း၏ အိမ်ကွင်းပုံစံက အရေးပါသွားမည်ဟု ပြောကြားလိုက်သည်။

ပြီးခဲ့သည့် ဗုဒ္ဓဟူးနေ့ ချန်ပီယံလိဂ် ၁၆ သင်းအဆင့် ပထမအကျော့တွင် အာဆင်နယ်မှာ အိမ်ကွင်း၌ မိုနာကိုအသင်းအား ၃ ဂိုး ၁ ဂိုးဖြင့် ရှုံးနိမ်ခဲ့ပြီးနောက် ၀င်းဂါးအပေါ် ဝေဖန်မှုအသံများမှာ ပိုမိုကျယ်လောင်လာခဲ့ပြီး ထိုအရှုံးကလည်း ချန်ပီယံလိဂ်မှ ထွက်ခွာရရန် နီးစပ်ခဲ့သည်။

“(အခြားနည်းပြတွေလိုပဲ) ကျွန်တော်လည်း ဖိအားတွေ ရှိနေပါတယ်။ ပွဲတွေကို အနိုင်ကစားချင်ပြီး (မိုနာကိုနဲ့ပွဲမှာ) အနိုင်မရခဲ့တာက အလွန် စိတ်ပျက်စရာကောင်းခဲ့ပါတယ်။ ဒါပေမယ့် ဒါဟာ ကစားပွဲရဲ့ အစိတ်အပိုင်းပါပဲ။ (ချန်ပီယံလိဂ်မှာ) လွန်ခဲ့တဲ့လေးနှစ်စလုံး တိုးတက်မှုမရှိတာ မှန်ပါတယ်။ ပြီးတော့ ဒါကြောင့်ပဲ ဗုဒ္ဓဟူးနေ့က ဒီရလဒ်ဟာ စိတ်ပျက်စရာပါ” ဟု ၀င်းဂါးက ပြောကြားခဲ့သည်။

အာဆင်နယ်မှာ ပရီးမီးယားလိဂ်အဖြစ် ယနေ့တွင် အဲဗာတန်နှင့် ကစားရမည်ဖြစ်ပြီး ယခုနှစ်တွင် အသင်းအနေဖြင့် အောင်မြင်မည်လားဟု မေးမြန်းခဲ့ရာ ၀င်းဂါးက “ရာသီကုန်တဲ့အထိ စောင့်ကြတာပေါ့။ ကျွန်တော်တို့အခု ၄၈ မှတ် ရနေတယ်။ ရာသီကုန်တဲ့အထိ ကြည့်ရပါမယ်” ဟု ပြန်လည်ဖြေကြားခဲ့သည်။

Ref:Goal.com