Tag: malaysia

အောက်တိုဘာ ၁၆၊ ၂၀၂၁
M-Media

-နိုင်ငံထဲဝင်ရောက်လာတဲ့ ခရီးသွားတွေအနေနဲ့ ကိုဗစ်ကာကွယ်ဆေး ၂ ကြိမ် ထိုးထားပြီးရင် ၇ ရက်သာ ကွာရန်တင်း၀င်ရတော့မယ်လို့ မလေးရှားဝန်ကြီးချုပ် အစ္စမာအီလ် ဆာဘရီ ယာကွဘ်က မနေ့မှာ ထုတ်ပြန်ပါတယ်။

အရင်က ၂ ပတ် ကွာရန်တင်းဝင်ရတာပါ။ အောက်တိုဘာ ၁၈ ရက် တနင်္လာနေ့ကနေ စတင်အကြုံးဝင်မယ့် အခု ၇ ရက် ကွာရန်တင်းဟာ နေအိမ် ဒါမှမဟုတ် ကွာရန်တင်းစင်တာ စသဖြင့် ကြိုက်ရာနေရာမှာ ဝင်နိုင်မှာဖြစ်ပါတယ်။ ကာကွယ်ဆေး လုံး၀ မထိုးရသေးသူ၊ တစ်ကြိမ်ထိုးထားပြီးသူတွေအတွက်ကတော့ ၁၀ ရက်ကွာရန်တင်း ဖြစ်ပါတယ်။

နိုင်ငံအတွင်း အရွယ်ရောက်ပြီးသူတွေရဲ့ ၉၀ ရာခိုင်နှုန်းအထိ ကာကွယ်ဆေးထိုးပြီးသွားတဲ့ မလေးရှားနိုင်ငံဟာ ပြီးခဲ့တဲ့လကစတင်ပြီး ကိုဗစ်ကန့်သတ်မှုတွေ လျော့ပေးလာတာဖြစ်ပါတယ်။

အဝေးပြေးလမ်းက နားနေရာနေရာတွေအားလုံး အောက်တိုဘာ ၁၆ ရက်နေ့ကစတင်ပြီး ဖွင့်လှစ်နိုင်တော့မှာ ဖြစ်သလို၊ Grab လို အငှားကားဝန်ဆောင်မှုတွေမှာလည်း ခရီးသည်အပြည့်တင်ဆောင်ခွင့်ရမှာ ဖြစ်ပါတယ်။

မလေးရှားက တစ်ချို့နိုင်ငံတွေက ခရီးသွားတွေကို ကွာရန်တင်းမလိုဘဲ တိုင်းပြည်ထဲဝင်ရောက်ခွင့် ပေးဖို့လည်း ပြင်ဆင်နေပါတယ်။

Ref: CNA

အောက်တိုဘာ ၁၀၊ ၂၀၂၁
M-Media

-နိုင်ငံအတွင်း ပြည်နယ်ကျော်သွားလာမှုနဲ့ နိုင်ငံသားတွေ နိုင်ငံခြားသွားလာမှုကို အောက်တိုဘာ ၁၁ ရက် တနင်္လာနေ့ကစတင်ပြီး ခွင့်ပြုပေးမယ်လို့ မလေးရှားနိုင်ငံက ကြေငြာလိုက်ပါတယ်။

မလေးရှားဟာ ကိုဗစ် ဒုတိယလှိုင်း ပြင်းထန်နေချိန် အခုနှစ် ဇန်နဝါရီလကစပြီး ပြည်နယ်ကျော်သွားလာမှုကို ပိတ်ပင်ထားတာပါ။

မလေးရှားဝန်ကြီးချုပ် အစ္စမာအီလ် ဆာဘရီရဲ့ ဒီကနေ့ ရုပ်သံမိန့်ခွန်းမှာ နိုင်ငံအတွင်း အရွယ်ရောက်ပြီးသူတွေ ကာကွယ်ဆေးထိုးနှံမှုဟာ ၉၀ ရာခိုင်နှုန်း ပြီးစီးသွားတဲ့အတွက် ကာကွယ်ဆေးထိုးထားပြီးသူတွေအနေနဲ့ ပြည်နယ်ကျော်သွားလာနိုင်ပြီလို့ ပြောကြားခဲ့ပါတယ်။

ဒါပေမယ့် ကိုဗစ်စည်းမျဉ်းစည်းကမ်းတွေကို လိုက်နာကြဖို့ ခရီးမသွားခင် ကိုဗစ် ရှိ၊ မရှိ စစ်ဆေးဖို့ဆာဘရီက တိုက်တွန်းခဲ့ပါတယ်။ ပြည်နယ်ကျော်သွားလာမှု ပိတ်ပင်စဉ်တုန်းက ရှိခဲ့တဲ့ အဝေးပြေးလမ်းက စစ်ဆေးရေးဂိတ်တွေ ရှိတော့မှာမဟုတ်ပေမယ့် ကာကွယ်ဆေး နှစ်ကြိမ်ထိုးထားလားဆိုတာကို ဆန်းစစ်မယ့် ရှောင်တခင် စစ်ဆေးမှုတွေ ရှိမယ်လို့ ဝန်ကြီးချုပ်က သတိပေးခဲ့ပါတယ်။

ကာကွယ်ဆေးနှစ်ကြိမ်ထိုးထားပြီးတဲ့ မလေးရှားနိုင်ငံသားတွေဟာ အရင်ကလို ရဲစခန်းမှာ ခွင့်ပြုချက်လျှောက်စရာ မလိုဘဲ နိုင်ငံရပ်ခြား သွားလို့ရပြီလို့လည်း ဝန်ကြီးချုပ် ဆာဘရီရဲ့ မိန့်ခွန်းမှာ ထည့်သွင်းပြောဆိုခဲ့ပါတယ်။

ဒါပေမယ့် နိုင်ငံအတွင်း ပြန်လည်ဝင်ရောက်လာတဲ့အချိန်မှာတော့ ကွာရန်တင်း ဝင်ရမှာပါ။

ကိုဗစ်ကန့်သတ်ချက်တွေကို လျှော့ပေါ့ပေးလိုက်ပေမယ့် နိုင်ငံသားတွေဟာ ကိုဗစ်နဲ့အတူ ယှဉ်တွဲနေထိုင်ရမှာဖြစ်ကြောင်း၊ ဒါ့ကြောင့် ကိုဗစ်စည်းမျဉ်းတွေကို လိုက်နာဖို့ လိုအပ်ကြောင်း ဝန်ကြီးချုပ်က သတိပေးခဲ့ပါတယ်။

ကိုဗစ်ကပ်ရောဂါ စတင်ကတည်းက မလေးရှားနိုင်ငံမှာ စုစုပေါင်း ၂.၃ သန်းလောက် ကူးစက်ခဲ့ပြီး သေဆုံးသူက ၂၇၀၀၀ ကျော် ရှိပါတယ်။

Ref: CNA

ဩဂုတ် ၁၆၊ ၂၀၂၁
M-Media

-မလေးရှားမှာ အစိုးရအဖွဲ့တစ်ခုလုံး ဒီကနေ့မနက်ပိုင်းမှာ နှုတ်ထွက်သွားပြီးတဲ့နောက်၊ ဘုရင်က ဝန်ကြီးချုပ်ဟောင်း မုဟ်ယစ်ဒင်ယာစင်ကို အိမ်စောင့်အစိုးရဝန်ကြီးချုပ်ခန့်ပြီး တိုင်းပြည်ကို ဆက်လက် အုပ်ချုပ်ခိုင်းခဲ့ပါတယ်။

ဝန်ကြီးချုပ် သက်တမ်း ၁၇ လသာရှိသေးတဲ့ မုဟ်ယစ်ဒင်ယာစင်ကို သူ့ရဲ့ ညွန့်ပေါင်းအစိုးရမှာ ပါဝင်တဲ့ ပါတီတစ်ချို့က မထောက်ခံတော့ဘူးလို့ ထုတ်ဖော်ပြောကြားခဲ့ပြီးတဲ့နောက် အခုလို ရာထူးကနေ နှုတ်ထွက်ခဲ့တာ ဖြစ်ပါတယ်။ ကိုဗစ်ကပ်ရောဂါကို ကိုင်တွယ်မှုနဲ့ပတ်သက်ပြီး မုဟ်ယစ်ဒင်အစိုးရဟာ ဝေဖန်ခံနေရတာပါ။

မလေးရှားနန်းတော်က ထုတ်ပြန်တဲ့ ကြေငြာချက်မှာ ဝန်ကြီးချုပ် မုဟ်ယစ်ဒင်ယာစင်နဲ့ အစိုးရအဖွဲ့တစ်ခုလုံး နှုတ်ထွက်စာကို လက်ခံရရှိခဲ့ပြီး တနင်္လာ​နေ့ကစလို့ အကျုံးဝင်ပြီလို့ ဖော်ပြထားပါတယ်။

“ဝန်ကြီးချုပ်သစ် မခန့်အပ်နိုင်သေးခင်မှာ တန်ဆရီ မုဟ်ယစ်ဒင် ဘင် မိုဟာမက် ယာစင်ကိုပဲ အိမ်စောင့်အစိုးရ ဝန်ကြီးချုပ်အဖြစ် ထမ်းဆောင်ဖို့ ဘုရင်မင်းမြတ်က သဘောတူခဲ့ပါတယ်”

ကိုဗစ်ကပ်ရောဂါအခြေအနေကြောင့် ရွေးကောက်ပွဲကျင်းပဖို့ မဖြစ်နိုင်သေးဘူးလို့လည်း နန်းတော်ရဲ့ ကြေငြာချက်ထဲမှာ ထည့်သွင်းဖော်ပြထားပါတယ်။

အာဏာရလိုသူတွေရှိနေ

ဘုရင်နဲ့တွေ့ပြီး ညနေပိုင်း တိုင်းပြည်ကို ပြောတဲ့မိန့်ခွန်းမှာတော့ လွှတ်တော်အမတ်အများစုရဲ့ ထောက်ခံမှု မရတော့တဲ့အတွက် အခုလို နှုတ်ထွက်ရတာဖြစ်တယ်လို့ ပြောကြားခဲ့ပါတယ်။

သူ့ရဲ့ ညွန့်ပေါင်းအစိုးရ Perikatan Nasional (PN) ဆက်လက်ရပ်တည်နိုင်ရေးအတွက် အတိုက်အခံပါတီတွေနဲ့ ပူးပေါင်းဆောင်ရွက်ဖို့ နည်းလမ်းအမျိုးမျိုးနဲ့ ကြိုးပမ်းခဲ့ပေမယ့် အာဏာရလိုသူတွေ ရှိတာကြောင့် မအောင်မြင်ခဲ့ဘူးလို့လည်း မုဟ်ယစ်ဒင်က ဆိုပါတယ်။

“ပြည်သူတွေရဲ့ ဘ၀၊ အသက်မွေးဝမ်းကြောင်းမှုတွေထက် အာဏာရရေးကိုသာ ပိုပြီးစိတ်ဝင်စားတဲ့ လောဘတက်ပါတီတွေရှိတာကြောင့် ဒီကြိုးပမ်းမှု မအောင်မြင်ခဲ့ပါဘူး”

တရားရေးကိုမျက်ကွယ်ပြု၊ ဖွဲ့အစည်းပုံအခြေခံဥပဒေကို ကျောခိုင်း၊ မူဘောင်စည်းမျဉ်းတွေကို ကျော်ပြီး အာဏာဆက်ယူထားလို့ရပေမယ့် ဒါမျိုးမလုပ်ခဲ့ဘူးလို့လည်း မုဟ်ယစ်ဒင်က ထည့်သွင်းပြောဆိုခဲ့ပါတယ်။

အတိုက်အခံခေါင်းဆောင် အန်ဝါရ်အီဘရာဟင်က မုဟ်ယစ်ဒင်ရဲ့ နှုတ်ထွက်မှုကြိုဆိုခဲ့ပြီး တိုင်းပြည်အပြောင်းအလဲအတွက် လမ်းကြောင်းတစ်ခု ဖွင့်ပေးလိုက်တာဖြစ်တယ်လို့ Facebook အကောင့်မှာ ရေးသားခဲ့ပါတယ်။

အိမ်စောင့်အစိုရဖြစ်လာတဲ့အတွက် မုဟ်ယစ်ဒင်အစိုးရဟာ အရင်တာဝန်တွေကို အရှိန်အဟုန်မပြတ် ဆက်လက်ဆောင်ရွက်သွားနိုင်ပေမယ့် ဥပဒေရေးရာကိစ္စတွေ၊ နိုင်ငံတော်မူဝါဒတွေ၊ တိုင်းပြည်အတွက် အရေးပါတဲ့ ဆုံးဖြတ်ချက် ချမှတ်မှုတွေမှာ အာဏာအကန့်အသတ် ရှိလာမှာ ဖြစ်ပါတယ်။

မလေးရှားဘုရင်ဟာ နိုင်ငံရေးပါတီခေါင်းဆောင်တွေကို မနက်ဖြန်မှာတွေ့ဆုံဖို့ ခေါ်ယူထားပြီး တိုင်းပြည်အနာဂတ်ကို ဆွေးနွေးကြမှာ ဖြစ်ပါတယ်။

Ref: CNA