ဇန်နဝါရီ ၁၈၊ ၂၀၂၁
M-Media

အနိုင်ရမည့်အခွင့်အရေးကို လွဲချော်သည့်အတွက် ဆိုးလ်ရှား စိတ်ပျက်နေ

မနက်က လီဗာပူးလ်နဲ့ပွဲမှာ အနိုင်ရမယ့် ဂိုးသွင်းခွင့်တွေ လွဲချော်ခဲ့တဲ့အတွက် စိတ်ပျက်ရတယ်လို့ မန်ယူနည်းပြ ဆိုးလ်ရှားက ပြောကြားလိုက်ပါတယ်။

ဒီပွဲ ဂိုးမရှိသရေကျခဲ့တာကြောင့် မန်ယူဟာ အဆင့် ၁ နေရာမှာ ဆက်ရှိနေပြီး ဒုတိယနေရာက မန်စီးတီးကို ၂ မှတ်ဖြတ်ထားပါတယ်။ လီဗာပူးလ်ကတော့ အဆင့် ၄ နေရာ​ရောက်သွားကာ မန်ယူနဲ့ ၃ မှတ်ကွာနေပါတယ်။

တစ်မှတ်ရတဲ့အတွက် ကျေနပ်ပေမယ့် တစ်ချို့ကစားသမားတွေရဲ့ ကစားပုံကို အားမရဘူးလို့လည်း ဆိုးလ်ရှားက ထည့်သွင်းပြောကြားခဲ့ပါတယ်။

လီဗာပူးလ်နည်းပြ ကလော့ပ်ကတော့ ကစားပုံက အနိုင်ရလောက်အောင် ကောင်းခဲ့ပေမယ့် ဂိုးမရတာကြောင့် မနိုင်ခဲ့ကြောင်း၊ နောက်ပွဲတွေမှာ ပိုမိုကောင်းမွန်လာဖို့ မျှော်လင့်ကြောင်း ပြောကြားခဲ့ပါတယ်။

ဘွန်ဒစ်လီဂါတွင် လီဝမ်ဒေါ့စကီး ဂိုးသွင်းစံချိန်သစ်တင်

ဘိုင်ယန်မြူးနစ်တိုက်စစ်မှူး လီဝပ်ဒေါ့စကီးမဟာ နေ့က SC Freiburg နဲ့ပွဲမှာ တစ်ဂိုးသွင်းယူခဲ့ပြီး ဘွန်ဒစ်လီဂါ ၁၆ ပွဲမှာ ၂၁ ဂိုးသွင်းယူနိုင်တဲ့ ပထမဦးဆုံးကစားသမားအဖြစ် မှတ်တမ်းဝင်ခဲ့ပါတယ်။

ရာသီအစ ၅ ပွဲမှာ ၁၀ ဂိုးသွင်းယူနိုင်တဲ့ ပထမဆုံးကစားသမားအဖြစ်လည်း အခုရာသီမှာ လီဝမ်ဒေါ့စကီးက မှတ်တမ်းရေးထိုးထားတာပါ။ လွန်ခဲ့တဲ့ ၄၉ နှစ်အရင်က ဂျရက်မူလာရဲ့ တစ်ရာသီ ဂိုး ၄၀ သွင်းခဲ့တဲ့ စံချိန်ကို ချိုးဖျက်ဖို့အတွက် လီဝမ်ဒေါ့စကီက ပစ်မှတ်ထားနေပါတယ်။

လီဝမ်ဒေါ့စကီးတစ်ယောက် ဒီနှစ်မှာ ကလပ်အသင်းနဲ့ နိုင်ငံအသင်းအတွက် စုစုပေါင်း ၂၅ ပွဲကစားပြီး ၂၆ ဂိုးသွင်းယူထားပါတယ်။

ဖီနာဘာချီသို့ပြောင်းသွားပြီဟု အိုဇေးလ်အတည်ပြု

တူရကီကလပ် ဖီနာဘာချီအသင်းကို ပြောင်းရွှေ့သွားပြီလို့ အာဆင်နယ်ကွင်းလယ်လူ မီဆုအိုဇေးလ်က အတည်ပြုပြောကြားလိုက်ပါတယ်။

အသက် ၃၂ နှစ်အရွယ် အိုဇေးလ်ဟာ အာဆင်နယ်မှာ ပါဝင်ကစားခွင့်မရတာ တစ်နှစ်နီးပါး ရှိနေပြီး ဖီနာဘာချီကို ၃ နှစ်ခွဲစာချုပ်နဲ့ ပြောင်းလာတာပါ။

မိမိဟာ ဖီနာဘာချီအသင်းရဲ့ ပရိတ်သတ်တစ်ယောက်ဖြစ်ပြီး အသင်းဂျာစီဝတ်ခွင့်ရတဲ့အတွက် ဂုဏ်ယူမိကြောင်း၊ အသင်းအတွက် တတ်နိုင်သမျှ ​ပေးဆပ်သွားမှာဖြစ်ကြောင်း အိုဇေးလ်က ထည့်သွင်း ပြောကြားခဲ့ပါတယ်။

၂၀၁၃ မှာ အသင်းစံချိန်တင်ပြောင်းရွှေ့ကြေး ပေါင် ၄၂ သန်းနဲ့ ပြောင်းလာပြီးနောက် အိုဇေးလ်ဟာ အာဆင်နယ်အတွက် ၂၅၄ ပွဲကစား ၄၄ ဂိုး သွင်းယူပေးနိုင်ခဲ့ပါတယ်။

Ref: BBC

ဇန်နဝါရီ ၁၆၊ ၂၀၂၁
M-Media

လီဗာပူးလ်နှင့်ပွဲတွင် ပရိတ်သတ်ပျော်အောင် ဖာနန်ဒက်ဇ်က လုပ်ပေးချင်နေ

လီဗာပူးလ်နဲ့ပွဲမှာ ပရိတ်သတ်တွေပျော်အောင် လုပ်ပေးချင်တယ်လို့ မန်ယူကွင်းလယ်လူ ဘရူနို ဖာနန်ဒက်ဇ်က ပြောကြားလိုက်ပါတယ်။

မန်ယူဟာ လက်ရှိမှာ ဒုတိယနေရာက လီဗာပူးလ်ကို ၃ မှတ်ဖြတ် ဦးဆောင်ထားပြီး မနက်ဖြန်ပွဲမှာသာ အနိုင်ရရင် ၆ မှတ်ဖြတ်ထားနိုင်မှာပါ။

ဖာနန်ဒက်ဇ်က ပြိုင်ဘက်အသင်း ပုခုံးချင်းယှဉ်လာတာကို ဘယ်သူကမှ မလိုလားဘူးလို့ ဆိုပါတယ်။ ပြည်တွင်းအမှတ်ပေးချန်ပီယံ ၁၉ ကြိမ်ရထားတဲ့ လီဗာပူးလ်ရဲ့စံချိန်ကို မန်ယူက အကြိမ် ၂၀ နဲ့ ချိုးဖျက်ထားတာပါ။

ဖာနန်ဒက်ဇ်က ၂၁ ကြိမ်သာဖြစ်ရင် ပိုပြီး ပျော်စရာကောင်းမယ်လို့ ထည့်သွင်းပြောဆိုခဲ့ပါတယ်။

ပီအက်စ်ဂျီနည်းပြ ပိုချက်တီနို ကိုဗစ်ကူးစက်ခံရ

ပီအက်စ်ဂျီအသင်းရဲ့ နည်းပြ မော်ရီစီယို ပိုချက်တီနိုဟာ ကိုဗစ်ကူးစက်ခံထားရပြီး လာမယ့် အမှတ်ပေးပွဲစဉ်နှစ်ခုကို လွဲချော်တော့မှာ ဖြစ်ပါတယ်။

အသက် ၄၈ နှစ်အရွယ် ပိုချက်တီနိုဟာ အခုလအစောပိုင်းက နည်းပြသစ်ဖြစ်လာတာ ဖြစ်ပြီး ၃ ပွဲမြောက်ပွဲမှာပဲ မာဆေးလ်အသင်းကို အနိုင်ကစားကာ Trophee des Champions ဖလားကို ဆွတ်ခူးနိုင်ခဲ့ပါတယ်။

အသင်းရဲ့ထုတ်ပြန်ချက်မှာတော့ ပိုချက်တီနိုဟာ သီးသန့်ခွဲနေထိုင်ကာ ဆေးကုသနေပြီး အသင်းကို လက်ထောက်နည်းပြနှစ်ဦးက ကိုင်တွယ်သွားမယ်လို့ ဖော်ပြထားပါတယ်။

အင်္ဂလန်လက်ရွေးစင်ဟောင်းရူနီ ဒါဘီကောင်တီနည်းပြ ဖြစ်လာ

မန်ယူနဲ့ အင်္ဂလန်အသင်းတို့ရဲ့ တိုက်စစ်မှူးဟောင်း ဝိန်းရူနီဟာ ဘောလုံးသမားဘ၀က အနားယူသွားပြီ ချန်ပီယံရှစ်ကလပ် ဒါဘီကောင်တီအသင်းရဲ့ နည်းပြချုပ် ဖြစ်လာပါတယ်။

၃၅ နှစ်အရွယ် ရူနီကို ၂၀၂၃ ခုနှစ်အထိ ဒါဘီက စာချုပ်ချုပ်ခဲ့တာပါ။ အသင်းဖော်ဟောင်းတွေဖြစ်တဲ့ စတီဗင်ဂျရတ်နဲ့ စကော့ပါကားတို့လည်း ဒါဘီရဲ့ အုပ်ချုပ်ရေးအဖွဲ့မှ ာပါဝင်လာပါတယ်။ ရူနီဟာ ဒါဘီမှာ ကစားသမားနည်းပြအဖြစ် ဆောင်ရွက်နေတာဖြစ်ပါတယ်။

အမြဲတမ်းနည်းပြအဖြစ် ခန့်အပ်ခံရတဲ့အတွက် ပျော်ရွှင်မိကြောင်း၊ ဂျရတ်၊ ပါကား၊ ဂျွန်တယ်ရီတို့လို အင်္ဂလန်ကစားသမားဟောင်းတွေ ပိုက်ဆံပိုရတဲ့ ဘောလုံးသုံးသပ်သူအလုပ်ထက် နည်းပြလောကထဲ ငယ်ငယ်ရွယ်ရွယ်နဲ့ ခြေစုံပစ်ဝင်လာတာကို ကျေနပ်ကြောင်း ထည့်သွင်းပြောကြားခဲ့ပါတယ်။

Ref: BBC

ဇန်နဝါရီ ၁၃၊ ၂၀၂၁
M-Media

လီဗာပူးလ်နှင့်ပွဲ ကြီးကျယ်သည့်အခိုက်အတန့်ဖြစ်မည်ဟု ပေါ့ဘာပြော

လာမယ့်တနင်္ဂနွေနေ့ လီဗာပူးလ်နဲ့ ပရီးမီးယားလိဂ်ပွဲဟာ ‘ကြီးကျယ်တဲ့အခိုက်အတန့်တစ်ခု’ ဖြစ်လာမှာဖြစ်ပြီး ဒီအတွက် စိတ်တည်တည်ငြိမ်ငြိမ်ထားကြဖို့ မန်ယူကွင်းလယ်လူ ပေါလ်ပေါ့ဘာက အသင်းဖော်တွေကို တိုက်တွန်းလိုက်ပါတယ်။

ပေါ့ဘာရဲ့သွင်းဂိုးနဲ့ မနေ့က ဘန်လေကို အနိုင်ရခဲ့တဲ့မန်ယူဟာ လီဗာပူးလ်ကို ၃ မှတ်ဖြတ်ပြီး အမှတ်ပေးဇယားကို ဦးဆောင်နိုင်ခဲ့ကာ ဒါဟာ ၈ နှစ်အတွင်း ပထမဆုံးပါ။

လာမယ့် လီဗာပူးလ်နဲ့ပွဲဟာ ကောင်းမွန်တဲ့ပွဲတစ်ပွဲဖြစ်လိမ့်မယ်လို့လည်း ပေါ့ဘာက ထည့်သွင်းပြောဆိုခဲ့ပါတယ်။

နည်းပြ ဆိုးလ်ရှားကလည်း ပြီးခဲ့တဲ့ ၃ နှစ်အတွင်း မယုံနိုင်စရာခြေစွမ်းတွေကိုပြခဲ့တဲ့ လက်ရှိချန်ပီယံ လီဗာပူးလ်နဲ့ပွဲအတွက် အဆင်သင့်ဖြစ်နေပြီလို့ ဆိုပါတယ်။

ပရီးမီးယားလိဂ်တွင် ကိုဗစ်အနားပေးမှု ရှိမည်မဟုတ်

အသင်းတစ်ချို့က ရာသီဝက် ၃ ပတ် အားလပ်ရက်ပေးဖို့ တောင်းဆိုတာကို လိုက်လျောမှာမဟုတ်ဘူးလို့ ပရီးမီးယားလိဂ် တာဝန်ရှိသူ​တွေကပြောပါတယ်။

အင်္ဂလန်မှာ ကိုဗစ်ကူးစက်မှုမြင့်လာတာကြောင့် လော့ဒေါင်းချထားသလို ပရီးမီးယားလိဂ်အသင်းတစ်ချို့မှာလည်း ကိုဗစ်ကူးစက်မှုအရေအတွက် များလာပါတယ်။

ဇွန်လမှာ ဥရောပချန်ဖလားပြိုင်ပွဲ ရှိတဲ့အတွက် ရာသီဝက် ၃ ပတ်အနားပေးလိုက်ရင် ရာသီအဆုံးသတ်ဖို့ ခက်ခဲမှာကို တာဝန်ရှိသူတွေက ထောက်ပြပါတယ်။ အစိုးရက ရပ်ခိုင်းမှသာ ရပ်သွားမယ်လို့ ဆိုပါတယ်။

အင်္ဂလန်ဘောလုံးအဖွဲ့ချုပ် FA က ကိုဗစ်ထိန်းချုပ်ရေး တင်းတင်းကြပ်ကြပ်ကိုင်တွယ်ရမယ့် စည်းမျဉ်းသစ်ကို ကလပ်အသင်းတွေထံ ပေးပို့ထားပါတယ်။

Ref: BBC

ဇန်နဝါရီ ၉၊ ၂၀၂၁
M-Media

ဦးခေါင်းထိခိုက်မှု လူစားထိုးစနစ်ကို လာမည့်လတွင် ဖီဖာက စသုံးမည်

လာမယ့်လ ကာတာနိုင်ငံမှာ ကျင်းပမယ့် ကလပ်အသင်းများ ကမ္ဘာ့ဖလားပြိုင်ပွဲမှာ ဦးခေါင်းထိခိုက်မှုအတွက် လူစားလဲမှုစနစ်ကို ကျင့်သုံးသွားမယ်လို့ ကမ္ဘာ့ဘောလုံးအဖွဲ့ချုပ် ဖီဖာက ထုတ်ပြန်လိုက်ပါတယ်။

ဦးခေါင်း ပြင်းပြင်းထန်ထန် ထိခိုက်ပြီး မှတ်ဉာဏ်ချို့ယွင်းတဲ့ ရောဂါအတွက် ဘောလုံးလောကမှာ စိုးရိမ်မှု မြင့်တက်လာခဲ့ပြီးတဲ့နောက် ဒီစနစ်ကို အကောင်အထည် ဖော်လာတာပါ။

လာမယ့်လ ပြိုင်ပွဲဟာ နိုင်ငံတကာပြိုင်ပွဲမှာ ပထမဆုံး စတင်အသုံးပြုမှုလည်း ဖြစ်ပါတယ်။ အသင်းတွေဟာ တစ်ပွဲကို ၅ ဦး လူစားဝင်ကစားနိုင်မှာဖြစ်ပြီး ​တစ်ပိုင်းကို ၃ ဦးသာ အသုံးပြုခွင့်ရမှာပါ။ဦးခေါင်းထိခိုက်မှုအတွက် လူစားထိုးမှုကိုတော့ လိုအပ်သလောက် သုံးနိုင်မှာ ဖြစ်ပါတယ်။

လာမယ့်လ ကလပ်အသင်းများ ကမ္ဘာ့ဖလားမှာ မက္ကဆီကိုက Tigres၊ အီဂျစ်က Al Ahly၊ ဂျာမနီက ဘိုင်ယန်မြူးနစ်၊ တောင်ကိုရီးယားက Ulsan၊ နယူးဇီလန်က Auckland Cityနဲ့ တောင်အမေရိက ကိုပါလီဘာတေဒိုးစ် ချန်ပီယံတို့ ယှဉ်ပြိုင်ကစားရမှာ ဖြစ်ပါတယ်။

မက်ဆီအတွက် တံခါးဖွင့်ထားသည်ဟု ပီအက်စ်ဂျီနည်းပြသစ်ပြော

မက်ဆီအပါအဝင် နာမည်ကျော်ကစားသမားအားလုံးကို မိမိတို့အသင်းက တံခါးဖွင့် ကြိုဆိုနေတယ်လို့ ပီအက်စ်ဂျီနည်းပြသစ် ပိုချက်တီနိုက ပြောကြားလိုက်ပါတယ်။

ဘာစီလိုနာက သက်တော်ရှည်ကစားသမား မက်ဆီဟာ ပီအက်စ်ဂျီ ဒါမှမဟုတ် မန်စီးတီးကိုပြောင်းတော့မယ်လို့ ပြီးခဲ့တဲ့နှစ်ကတည်းက သတင်းထွက်နေတာပါ။

ပိုချက်တီနိုကတော့ လောလောဆယ်မှာ ဒီသတင်းတွေကို ခနဘေးဖယ်ထားပြီး၊ အသင်းမှာလည်း ကြီးကျယ်တဲ့ကစားသမားတွေ ရှိနေတယ်လို့ ပထမဆုံး သတင်းစာရှင်းလင်းပွဲမှာ ပြောကြားခဲ့ပါတယ်။

စပါးအသင်းနဲ့ ပီအက်စ်ဂျီကို နှိုင်းယှဉ်မေးမြန်းရာမှာတော့ ဒီနှစ်သင်းရဲ့ အခြေအနေဟာ မတူညီဘဲ လန်ဒန်ဟာ အံ့ဩစရာ အမှတ်တရတွေ ကျန်ခဲ့ကြောင်း လောလောဆယ်မှာ ပီအက်စ်ဂျီအတွက်ပဲ အာရုံစိုက်ထားကြောင်း ပြန်လည်ဖြေကြားခဲ့ပါတယ်။

အက်စတွန်ဗီလာ၏ ယူ ၁၇ ကစားသမား ဂိုးသွင်းနိုင်သည့်အတွက် ဂုဏ်ယူ

အသင်းမှာ ပွဲထွက်ခွင့်ရပြီး ဂိုးသွင်းနိုင်တဲ့အတွက် ဂုဏ်ယူမိတယ်လို့ အက်စတွန်ဗီလာအသင်းက ၁၇ နှစ်အရွယ် လူငယ်ကစားသမား လူဝီဘယ်ရီက ပြောကြားလိုက်ပါတယ်။

အသင်းကြီးက ကစားသမားတွေ ကိုဗစ်ကူးစက်ခံနေရတာကြောင့် ဗီလာဟာ မနေ့က လီဗာပူးလ်နဲ့ FA ဖလားပွဲမှာ ယူ ၂၃ ကစားသမား ၇ ဦး၊ ယူ ၁၇ က ကစားသမား ၄ ဦးနဲ့ ပွဲထွက်ခဲ့ရပါတယ်။ ၄ ဂိုး ၁ ဂိုးနဲ့ ရှုံးနိမ့်ခဲ့ပေမယ့် လူငယ်တွေဟာ ခြေစွမ်းကောင်းတွေကို ပြသနိုင်ခဲ့ကြပါတယ်။

အသင်းအတွက် ချေပဂိုးသွင်းပေးခဲ့တဲ့ လူဝီက မိမိဂိုးသွင်းလိုက်တဲ့အချိန်မှာ တီဗီကကြည့်နေတဲ့ မိသားစုဟာ အော်ဟစ်အောင်ပွဲခံကြမှာ ဖြစ်ကြောင်း၊ ပွဲအစကနေ အဆုံးအထိ တစ်သင်းလုံး ရေကုန်ရေခမ်း ကစားပေးခဲ့ကြောင်း ထည့်သွင်းပြောဆိုခဲ့ပါတယ်။

Ref: Goal