Tag: PremierLeague

သြဂုတ် ၃၁ ၊ ၂၀၁၄
M-Media

– ပရီးမီးယားလိဂ် ပွဲစဉ် ၃ ရဲ့ ၇ ပွဲကို မနေ့က ကစားခဲ့ပြီး မန်စီးတီး ပထမဆုံး ရှုံးပွဲတွေ့ခဲ့ကာ ချယ်ဆီးကတော့ အဲဗာတန်ကို ဂိုးတွေအပြန်အလှန်သွင်းပြီး အနိုင်ရခဲ့ပါတယ်။ နည်းပြသစ်နဲ့ မန်ယူကတော့ တန်းတက် ဘန်လေကို သရေကျခဲ့ပြီး ရာသီသစ်မှာ နိုင်ပွဲမရသေးပါဘူး။

ပြီးခဲ့တဲ့တစ်ပါတ်က ကစားပုံမကောင်းခဲ့ပေမယ့် အနိုင်ရအောင် ကစားနိုင်ခဲ့တဲ့ မော်ရင်ဟိုရဲ့ ချယ်ဆီး ဒီတစ်ပါတ် အဲဗာတန်အိမ်ကွင်းမှာလည်း ရုန်းကန်ခဲ့ရပေမယ့် တိုက်စစ်မှူးတွေ ဂိုးသွင်းသေချာခဲ့တာကြောင့် ၆ ဂိုး ၃ ဂိုးနဲ့ အနိုင်ရရှိခဲ့ပါတယ်။ ဒီပွဲမှာ အဲဗာတန်အသင်းက ဘောလုံးပိုင်ဆိုင်မှု တစ်ဖက်သက်အသာရခဲ့တာပါ။ ဂိုးတွေလည်းအပြန်အလှန်သွင်းခဲ့ပြီး ရရှိခဲ့ ဂိုးသွင်းခွင့် ၈ ကြိမ်မှာ ၆ လုံးသွင်းယူနိုင်ခဲ့တာကြောင့် ချယ်ဆီးတို့ အနိုင်သုံးမှတ် သေချာခဲ့တာဖြစ်ပါတယ်။ အက်သလက်တီကိုက ရောက်လာတဲ့ ဒီယေဂိုကော်စတာ မနေ့က ပွဲမှာ ၂ ဂိုး သွင်းယူပေးခဲ့ပါတယ်။

ပွဲစဉ် ၂ မှာ လီဗာပူးလ်ကိုအနိုင်ကစားပြီး ချန်ပီယံဘွဲ့ကို ကာကွယ်ဖို့အသင့်ပဲလို့ သတိပေးခဲ့တဲ့ မန်စီးတီးကတော့ အိမ်ကွင်းမှာ စတုတ်အသင်းကို အံအားသင့်ဖွယ် ရှုံးနိမ့်ခဲ့ပါတယ်။ ခြေစွမ်းပိုင်းမှာ အသာရခဲ့ပြီး ဘောလုံးပိုင်ဆိုင်မှုပိုင်းမှာလည်း တစ်ဖက်သတ်ဖိကစားခဲ့တဲ့ မန်စီးတီးတို့ ဂိုးမသွင်းနိုင်တာဟာ တိုက်စစ်အားနည်းမှုကြောင့်လို့ ပြောလို့ရသလို စတုတ်နောက်တန်း ကောင်းမွန်တာကြောင့်လည်း ပါပါတယ်။ တစ်ပွဲလုံးမှာ ဂိုးသွင်းခွင့် ၃ ကြိမ်သာ ရခဲ့တဲ့ မန်စီးတီးတို့ ၅၈ မိနစ်မှာ ဒီအုဖ်ရဲ့ သွင်းဂိုးကြောင့် အိမ်ကွင်းမှာ ရှုံးနိမ့်ခဲ့တာဖြစ်ပါတယ်။ စတုတ်စီးတီးကတော့ ဒီရာသီ ပရီမီးယားလိဂ် ပထမဆုံး နိုင်ပွဲရခဲ့တာ ဖြစ်ပါတယ်။

ပြီးခဲ့တဲ့ ၂ ပွဲမှာ ၁ မှတ်သာရထားတဲ့မန်ယူကလည်း တန်းတက်ဘန်လေအသင်းကို ဂိုးသွင်းယူနိုင်ခြင်းမရှိခဲ့ဘဲ သရေတစ်မှတ်သာ ရရှိခဲ့ပါတယ်။ ဒီပွဲမှာ ဗန်ဂါလ်းဟာ သူအကြိုက်ဆုံး ၁၁ ယောက်ကို ပွဲထုတ်ခဲ့တာဖြစ်ပြီး ရီးယဲလ်က ပြောင်းလာတဲ့ ဒီမာရီယာလည်း ဒုတိယပိုင်းမှာ လူစားဝင် ကစားခဲ့ပါတယ်။

ပွဲစဉ် ၁ မှာ မန်ယူကို အနိုင်ယူနိုင်ခဲ့တဲ့ ဆွမ်ဆီးတို့ကတော့ ၀က်စ်ဘရွန်းကို နသန်ဒိုင်ယာရဲ့ သွင်းဂိုး ၂ ဂိုးနဲ့အတူ သုံးဂိုးပြတ်နဲ့ အနိုင်ရရှိခဲ့ပြီး ရာနှုန်းပြည့်အနိုင်ရလဒ်ကို ရယူထားနိုင်ခဲ့ကာ ပရီးမီးယားလိဂ်ဇယားကို ချယ်ဆီးနဲ့အတူ ဦးဆောင်ထားနိုင်ခဲ့ပါတယ်။

ပရီးမီးယားလိဂ် ပွဲစဉ် ၃ စနေနေ့ ရလဒ်များကတော့ အောက်ပါအတိုင်းဖြစ်ပါတယ်။

ဘန်လေ ၀-၀ မန်ယူ
မန်စီးတီး ၀-၁ စတုတ်
နယူးကာဆယ် ၃-၃ ခရစ္စတယ်ပဲလေ့စ်
ကျူပီအာရ် ၁-၀ ဆန်းဒါးလန်း
ဆွမ်ဆီး ၃-၀ ၀က်စ်ဘရွန်း
ဝက်စ်ဟမ်း ၁-၃ ဆောက်သက်တမ်
အဲဗာတန် ၃-၆ ချယ်ဆီး

သြဂုတ် ၂၉ ၊ ၂၀၁၄
M-Media

– အသင်း၏ အနာဂတ်အစီအစဉ်တွင် ပါဝင်နိုင်ဖွယ်မရှိသောကြောင့် တိုက်စစ်မှူးဟာနက်ဒက်ဇ်အား မန်ယူဘုတ်အဖွဲ့က အသင်းမှ ထွက်ခွာခွင့်ပေးလိုက်ပြီဟု သိရသည်။

မက္ကဆီကို လက်ရွေးစင် ဟာနန်ဒက်ဇ်အား မန်ယူ ဒုတိယဥက္ကဌ အဒ်ဝုဒ်ဝါ့က်က ယမန်နေ့ နေ့လည်ပိုင်းကတွေ့ဆုံကာ ယခုကဲ့သို့ ပြောကြားလိုက်ခြင်းဖြစ်ပြီး၊ အသင်းနှင့် လက်ရှိစာချုပ်ရှိနေသည့်အတွက် ငွေးရေးကြေးရေး ကိစ္စများကိုလည်း ဆွေးနွေးခဲ့ကြသည်။

မန်ယူမှာ ဟာနန်ဒက်ဇ်အတွက် ပြောင်းရွှေ့ကြေး ယူရို ၁၉ သန်းခန့်လိုချင်နေပြီး တနင်္လာနေ့ အပြောင်းအရွှေ့ရာသီမပိတ်မီ ရောင်းချလိုဖွယ်ရှိနေသည်။

၂၀၁၀ က အိုးထရက်ဖို့ဒ်သို့ ပြောင်းရွှေ့လာခဲ့သည့် ဖာနန်ဒက်ဇ်မှာ အသင်းတွင် ပုံမှန်နေရာ မရသော်လည်း ပါဝင်ကစားခဲ့ရသည့်ပွဲများတွင် အသင်းအတွက် အရေးပါသော ဂိုးများကို သွင်းယူပေးနိုင် ခဲ့သောကြောင့် မန်ယူ ပရိတ်သတ်များအကြားတွင် ရေးပန်းစားခဲ့သည်။

သို့သော်လည်း ပုံမှန်ပွဲထွက်ခွင့်မရသောကြောင့် ယခုနှစ်နွေရာသီတွင် ပြောင်းရွှေ့တော့မည်ဟု သတင်းများထွက်ပေါ်ခဲ့သည်။ ဟာနန်ဒက်ဇ်အား ခေါ်ယူရန် လာလီဂါကလပ် အက်သလက်တီကိုနှင့် စီးရီးအေထိပ်သီး အင်တာမီလန်အသင်းတို့က စိတ်ဝင်စားနေသည်။

သြဂုတ် ၂၈ ၊ ၂၀၁၄
M-Media

– အသင်းရှိ ဂျာမန်တိုက်စစ်မှူး ပိုဒေါစကီးမှာ ယခုနှစ်နွေရာသီတွင် အသင်းမှ ထွက်ခွာမည်မဟုတ်ဘဲ ယနေ့ညတွင် ကစားမည့် ချန်ပီယံလိဂ် ခြေစစ်ပွဲ ဒုတိယအကျော့တွင် ပါဝင်မည်ဟု အာဆင်နယ်နည်းပြ အာဆင်ဝင်းဂါးက ပြောကြားလိုက်သည်။

အသင်းမှ လွတ်လပ်စွာ ထွက်ခွာခွင့်ပြုမည်ဟု အာဆင်နယ်က စောစောပိုင်းတွင် ပိုဒေါစကီးအား ပြောကြားခဲ့ပြီး အီတလီကလပ် ဂျူဗင်တပ်စ်နှင့် ဂျာမန်ကလပ် ၀ုဖ်ဘတ်တို့က ၎င်းအား ခေါ်ယူရန် စိတ်ဝင်စားနေသည်။

သို့သော်လည်း ပြင်သစ်တိုက်စစ်မှူး ဂျီရော့ဒ် ဒဏ်ရာရရှိသွားသည့်အတွက် အာဆင်ဝင်ဂါးမှာ ပိုဒေါစကီးအား လက်လွှတ်ရန် မဖြစ်နိုင်သည့် အခြေအနေသို့ ရောက်သွားခဲ့သည်။

ဝင်းဂါးမှာ တိုက်စစ်မှူးတစ်ဦးကို အပြင်းအထန်ရှာဖွေနေပြီး ဂျီရော့၏နေရာအား အစားထိုးရန်အတွက် လက်ရှိတွင် ဘာမင်ဂန်တိုက်စစ်မှူး နီကိုလာ ဇီဂစ်ကိုခေါ်ယူထားသည်။

ထို့ပြင် မိုနာကိုတိုက်စစ်မှူး ဖယ်လ်ကာအိုအား အငှားဖြင့်ခေါ်ယူရန် စိတ်ဝင်စားနေကာ၊ ပီအက်စ်ဂျီ တိုက်စစ်မှူး ကာဗာနီကိုလည်း ယူရိုသန်း ၅၀ ဖြင့် ကမ်းလှမ်းရန် စီစဉ်နေသည်။

သြဂုတ် ၂၇ ၊ ၂၀၁၄
M-Media

– မန်ယူသို့ ရောက်ရှိလာသည့် ဒီမာရီယာမှာ အသင်း၌ ချက်ချင်းအံဝင်မည်မဟုတ်ဘဲ အသင်းကစားကွက်နှင့် အထိုင်ကျရန် အချိန်ပေးရမည်ဟု မန်ယူနည်းပြ ဗန်ဂါးလ်က ပရိတ်သတ်များအား သတိပေး ပြောကြားလိုက်သည်။

အာဂျင်တိုင်း ကွင်းလယ်ကစားသမား ဒီမာရီယာမှာ ဗြိတိန် စံချိန်တင်ပြောင်းရွှေ့ကြေး ယူရို ၈၄ သန်းဖြင့် ယမန်နေ့က အိုးထရက်ဖို့ဒ်သို့ ရောက်ရှိလာခဲ့ခြင်းဖြစ်သည်။ လက်ရှိကစားကွက်အရ ဗန်ဂါးလ်မှာ ဒီမာရီယာအား အလယ်ကြောတစ်လျှောက်တွင် ကစားခိုင်းရန် ဆန္ဒရှိနေပြီး စိတ်ရှည်ရန်လိုအပ်သည်ဟု ဆိုသည်။

“ကျွန်တော်တို့ ကစားတဲ့ပုံစံကို ဒီမာရီယာက ကူညီမှာပါ။ သူဟာ ဖန်တီးနိုင်စွမ်းရှိတဲ့ ကစားသမားတစ်ယောက်ပါ။ ဒီမာရီယာနဲ့ဆိုရင် ကျွန်တော့်ရဲ့ ကစားကွက်ကို ပြောင်းလဲနိုင်မှာဖြစ်ပြီး ဘာ့ကြောင့်လဲဆိုတော့ သူဟာ တောင်ပံနဲ့ ကွင်းလယ်ကြော နှစ်နေရာစလုံးမှာ ကစားနိုင်လို့ပါပဲ” ဟု ဗန်ဂါးလ်က Sky Sports သို့ ပြောကြားခဲ့သည်။

ဒီမာရီယာမှာ မန်ယူတွင် နာမည်ကျော်ကစားသမားများ ၀တ်ဆင်ခဲ့သည် နံပါတ် ၇ ဂျာစီကို ၀တ်ဆင်သွားမည်ဖြစ်သည်။

မန်ယူမှာ ယခုနှစ်ပရီးမီးယားလိဂ် ၂ ပွဲကစားပြီးချိန်တွင် နိုင်ပွဲမရသေးဘဲ ၁ မှတ်သာရရှိထားပြီး ယမန်နေ့က ကစားခဲ့သော လိဂ်ဖလားပြိုင်ပွဲ ဒုတိယအဆင့်တွင်လည်း အသင်းငယ် MK Dons ကို ၄ ဂိုး ဂိုးမရှိဖြင့် ရှုံးနိမ့်ကာ ပြိုင်ပွဲမှ ထွက်ခဲ့ရသည်။

သြဂုတ် ၂၆ ၊ ၂၀၁၄
M-Media

– တိုက်စစ်မှူး ဘာလော့တယ်လီမှာ အသင်းမှထွက်ခွာရန် အချိန်ကျပြီဖြစ်ပြီး ၎င်း၏ ထွက်ခွာမှုက အားလုံးအတွက် အကျိုးဖြစ်ထွန်းစေခဲ့သည်ဟု အေစီမီလန်အသင်း၏ စီအီးအို အက်ဒရီယာနို ဂီလာနီက ပြောကြားလိုက်သည်။

ဘာလော့တယ်လီအား ယူရိုသန်း ၂၀ ဖြင့် ခေါ်ယူရန် လီဗာပူးလ်မှ သဘောတူညီမှု ရရှိခဲ့ပြီး အပြောင်းအရွှေ့ကိစ္စမှာ ယနေ့တွင် ပြီးဆုံးခဲ့သည်။ ဂီလာနီက ဘာလော့တယ်လီမှာ အသင်းတွင် ရှိနေရန် ၉၉ ရာခိုင်နှုန်း သေချာသည်ဟု စောစောပိုင်းက ပြောကြားခဲ့သော်လည်း၊ ယခုကဲ့သို့ ရောင်းချရခြင်းမှာ အားလုံး ကောင်းဖို့အတွက်သာဖြစ်သည်ဟု ၀န်ခံခဲ့သည်။

“ဘာလော့တယ်လီ။ မီလန်နဲ့ လီဗာပူးလ်တို့ အားလုံးရဲ့ အကျိုးအတွက် ချခဲ့တဲ့ ဆုံးဖြတ်ချက်ပါပဲ” ဟု ဂီလာနီက  Millannews သတင်းဌာနသို့ ပြောကြားခဲ့သည်။

မီလန်နည်းပြ အင်ဇာဂီကမူ ဘာလော့တယ်လီအား ဆုံးရှုံးရခြင်းမှာ ကစားသမားကောင်း တစ်ဦး ဆုံးရှုံးရခြင်းဖြစ်သည်ဟု ပြောကြားခဲ့သည်။ မီလန်မှာ တိုက်စစ်နေရာဖြည့်တင်းရန် အတွက် ရိုမားနှင့် ပေါ်တိုအသင်းတို့မှ တိုက်စစ်မှူးများကို စောင့်ကြည့်နေပြီး ဂီလာနီကလည်း ရှေ့တန်းကစားသမား တစ်ဦးဝယ်ယူရန်မှာ အသင်းအတွက် ဦးစားပေးဖြစ်သည်ဟု ပြောကြားခဲ့သည်။

ဘာလော့တယ်လီကမူ အမှားတစ်ခုကြောင့် ထွက်ခွာသွားခဲ့ရသည့် အင်္ဂလန်သို့ ပြန်လည်ရောက်ရှိခဲ့သည့် အတွက် ပျော်ရွှင်မိကြောင်း၊ လီဗာပူးလ်အသင်းအား ချန်ပီယံလိဂ်အောင်ပွဲသို့ ခေါ်ဆောင် သွားချင်ကြောင်း စသဖြင့် စာချုပ်ချုပ်ဆိုသည့် အခမ်းအနားပြီးတွင် ပြောကြားခဲ့သည်။