Tag: PremierLeague

ဒီဇင်ဘာ ၉ ၊ ၂၀၁၄
M-Media

– ဘာလိုတယ်လီကဲ့သို့ ပြဿနာမဖြစ်ပွားစေရန် အသင်းရှိ ကစားသမားများအနေဖြင့် ဆိုရှယ်မီဒီယာများ အသုံးပြုခြင်းကို ရပ်တန့်ရမည်ဟု လီဗာပူးလ်အသင်း၏ အမှုဆောင် ဥက္ကဌ အီယန် အိုရီက ပြောကြားလိုက်သည်။

ဘာလော့တယ်လီမှာ ၎င်း၏ Twitter စာမျက်နှာတွင် လူမျိုးရေးခွဲမှုကို ဆန့်ကျင်သည့် မက်ဆေ့ခ်ျ တစ်ခုကို နာမည်ကျော် ဆူပါ မာရီယိုဂိမ်းမှ ဇာတ်ကောင်ကို အသုံးပြု၍ ပြီးခဲ့သည့် ရက်အနည်းငယ် အတွင်းက ရေးသားခဲ့သည်။

သို့သော်လည်း ၎င်း၏ အဆိုပါ မက်ဆေ့ခ်ျတွင် ဂျူလူမျိုးအား အသရေ ပျက်စေသည်ဟု ယူဆနိုင်သော အသုံးအနှုန်း တစ်ခု ပါဝင်ခဲ့သောကြောင့် FA ပြီးခဲ့သည့် ရက်ပိုင်းကပင် တရားစွဲဆိုခဲ့သည်။

အိုင်ရီကမူ ဆိုရှယ်မီဒီယာ၏ ဘေးအန္တရာယ်များနှင့် ပတ်သက်၍ လီဗာပူးလ်ကစားသမားများကို သတိပေးရန် အသင်း၏ သြဇာကို အသုံးပြုကာ လုပ်သင့်လုပ်ထိုက်သည်များကို လုပ်ဆောင်ပြီးဖြစ်သည့်အတွက် ကျေနပ်သည်ဟု ဆိုသည်။

`ကျွန်တော်တို့ ကစားသမား အားလုံး ဆိုရှယ် မီဒီယာတွေနဲ့ ဝေးတာကို လိုချင်ပါတယ်။ ဘာ့ကြောင့်လဲဆိုတော့ အဲဒါဟာ တကယ့်ကို ပြဿနာကြီးပါ။ ရိုးရိုသားသားပြောရင် ဒါနဲ့ပတ်သက်ပြီး အသင်းသားတွေကို ပညာပေးဖို့ ကြိုးစားတာကလွဲလို ကျွန်တော်တို့ ဘာမှ ပိုလုပ်လို့ မရပါဘူး။ ဒါပေမယ့် တစ်ရာသီမှာ တစ်ကြိမ်လောက်တော့ တွေ့ ရတာ ပါပဲ။ အသင်းတိုင်းမှာ ပုံတစ်မျိုး မဟုတ်၊ တစ်မျိုးနဲ့ပေါ့ဗျာ´ ဟု အိုင်ရီက ဘီဘီစီ ရေဒီယိုသို့ ပြောကြားခဲ့သည်။

အဆိုပါတရားစွဲဆိုမှုအတွက် ဘာလိုတယ်လီမှာ ဒီဇင်ဘာ ၁၅ ရက်နေ့တွင် ရင်ဆိုင်ရမည်ဖြစ်သည်။

ဒီဇင်ဘာ ၉ ၊ ၂၀၁၄
M-Media

– ဆောက်သက်တမ်နှင့်ပွဲတွင် အနိုင်ရခဲ့ပြီးနောက် နောက်ဆုံး ၅ ပွဲဆက် နိုင်ပွဲရခဲ့သည့် မိမိတို့အသင်း လမ်းကြောင်းမှန်ပေါ် ပြန်ရောက်လာပြီဟု မန်ချက်စတာ ယူနိုက်တက် အသင်း၏ တိုက်စစ်မှူး ဗန်ပါစီက ပြောကြားလိုက်သည်။

ယမန်နေ့က ကစားခဲ့သည့် အဆိုပါပွဲတွင် မန်ယူက ၂ ဂိုး ၁ ဂိုးဖြင့် အနိုင်ရရှိခဲ့ပြီး ဗန်ပါစီမှာ ၂ ဂိုးစလုံးကို သွင်းယူပေးခဲ့သည်။ ထိုပွဲအနိုင်ကြောင့် မန်ယူမှာ အဆင့် ၃ နေရာသို့ ရောက်ရှိ လာခဲ့ပြီး ဗန်ပါစီကလည်း မိမိတို့အသင်းမှာ တိုးတက်လာကာ လမ်းကြောင်းမှန်ပေါ်သို့ ရောက်လာခဲ့ပြီဟု ပြောကြားခဲ့သည်။

`ဒီနေ့ကျွန်တော်တို့ အကောင်းဆုံး ကစားခဲ့တယ်လို့ မထင်ပါဘူး။ လျော့တိလျော့ရဲ အချိန်မျိုးတွေ ရှိခဲ့ပါတယ်။ ဒါပေမယ့် ကျွန်တော်တို့ ကြိုးစားယှဉ်ပြိုင် ခဲ့ပြီး ရေကုန်ရေခမ်း ပေးဆပ် ခဲ့ကြပါတယ်။ သူတို့ဟာ အသင်းကောင်းတစ်သင်းပါ။ ကျွန်တော်တို့ ဘာမျှော်လင့်လဲဆိုတာ သိခဲ့ပေမယ့် အဆုံးမှာတော့ ငါးပွဲဆက်နိုင်ပွဲရခဲ့ပြီး တိုးတက်လာပါပြီ´ ဟု ပွဲအပြီးတွင် Sky Sports သို့ ပြောကြားခဲ့သည်။

နည်းပြဗန်ဂါးလ်ကမူ မိမိတို့အသင်းမှာ ကံတရား၏ ဖေးမမှုကြောင့်သာ အနိုင်ရခဲ့ခြင်းဖြစ်သည်ဟု ပွဲအပြီး၌ ၀န်ခံခဲ့သည်။

ဒီဇင်ဘာ ၈ ၊ ၂၀၁၄
M-Media

– မန်စီးတီးအသင်းမှ မိမိကို မလိုချင်ပါက မိမိအနေဖြင့် အထုတ်အပိုးပြင်ကာ ထွက်သွားမည်ဟု မန်စီးတီးအသင်းကွင်းလယ်ကူ နာဆရီက ပြောကြားလိုက်သည်။

ပြီးခဲ့သည့်နှစ် ပရီးမီးယားလိဂ်ချန်ပီယံ မန်စီးတီးအသင်း၏ မောင်းနှင်အားဖြစ်ခဲ့သည့် နာဆရီမှာ ယခုနှစ်တွင်း မန်စီးတီးအသင်းတွင် ပုံမှန်ပါဝင်ကစားခွင့် မရဘဲ အသင်းမှ ပြောင်းရွှေ့တော့မည်ဟုလည်း သတင်းများ ထွက်ပေါ်နေသည်။

`အသင်းကနေထွက်ရမလားဆိုတာ ကျွန်တော်မသိပါဘူး။ တကယ်လို့ သူတို့(အသင်းတာဝန်ရှိတွေ) ကျွန်တော့်ဆီလာပြီး အသင်းပြောင်းဖို့ပြောရင် ကျွန်တော်သွားမှာပါ´ ဟု Beln Sports နှင့် အင်တာဗျူးတွင် နာဆရီက ပြောကြားခဲ့သည်။

မန်စီးတီးမှာ အင်္ဂါနေ့ညတွင် ရိုးမားအသင်းနှင့် ချန်ပီယံလိဂ်နောက်ဆုံးပွဲအဖြစ် ကစားရမည်ဖြစ်ပြီး အနိုင်ရမှ နောက်တစ်ဆင့်သို့ တက်ရောက်နိုင်မည်ဖြစ်သည်။ နာဆရီကမူ မိမိတို့အသင်းမှာ နောက်တစ်ဆင့်တက်ရန် အလားအလာရှိနေကြောင်း၊ ပြီးခဲ့သည့် နှစ်က ၁၆ သင်းအဆင့်တွင် ဘာစီလိုနာအား ရှုံးနိမ့်မှုအတွက် နည်းပြတွင်သာ တာဝန်ရှိသည်မဟုတ်ဘဲ ကစားသမားများတွင်လည်း တာဝန်ရှိကြောင်း ထည့်သွင်းပြောဆိုခဲ့သည်။

မန်စီးတီး ဘုတ်အဖွဲ့မှာ ချန်ပီယံလိဂ်တွင် အောင်မြင်မှုရရှိရန် ဆန္ဒအလွန်ပြင်းပြနေသောကြောင့် ရိုးမားနှင့်ပွဲရလဒ်မှာ နည်းပြပယ်လီဂရီနီ၏ ရှေ့ရေးအတွက်လည်း အကျိုးသက်ရောက်မှု ရှိမည်ဖြစ်သည်။

နိုင်ငံအသင်းမှ အနားယူခဲ့ခြင်းနှင့် ပတ်သက်၍ နာဆရီက မိမိ အသက်အရွယ်ကြောင့် အနားယူခြင်းမဟုတ်ဘဲ ပျော်ရွှင်မှုမရှိသောကြောင့်ဖြစ်သည်ဟု ထည့်သွင်းပြောကြားခဲ့သည်။

ဒီဇင်ဘာ ၈ ၊၂၀၁၄
M-Media
– ပရီးမီးယားလိဂ် ပွဲစဉ် ၁၅ ကို စနေနေ့က ၆ ပွဲကစားခဲ့ပြီး တနင်္ဂနွေနေ့မှာ ၃ ပွဲကစားခဲ့ပါတယ်။ ဒီတစ်ပတ်မှာတော့ ဇယားထိပ်ကချယ်ဆီး ပထမဆုံး ရှုံးပွဲတွေ့ခဲ့ပြီး၊ အာဆင်နယ်လည်း ရှုံးနိမ့်ခဲ့ကာ မန်စီးတီးကတော့ အခွင့်အရေးကောင်းကို အရယူနိုင်ခဲ့ပါတယ်။

အစောဆုံးကစားခဲ့တဲ့ နယူးကာဆယ်နဲ့ ချယ်ဆီးတို့ပွဲမှာ အိမ်ရှင်တို့ မနှစ်ကလိုပဲ ချယ်ဆီးကို နှိပ်ကွပ်နိုင်ခဲ့ပါတယ်။ ဒါပေမယ့် ချယ်ဆီးကသာပွဲကို အများဆုံး စိုးမိုးနိုင်ခဲ့ပြီး ဂိုသွင်းခွင့်လည်းရခဲ့ပါတယ်။ ပထမပိုင်းမှာ ၀ီလီယံ၊ ဖာဘရီဂတ်စ်တို့ အပိုင်ဂိုးသွင်းခွင့်ရခဲ့ပေမယ့် အသုံးမချနိုင်ခဲ့ပါဘူး။ အိမ်ရှင်တို့အတွက် ဦးဆောင်ဂိုးကိုတော့ ၅၇ မိနစ်မှာ အမီယိုဘီရဲ့ ဖြတ်တင်ပေးမှုကို စစ်ဆီက အကောင်းဆုံး ပိတ်သွင်းနိုင်ခဲ့တာပါ။ ဦးဆောင်ဂိုးပေးခဲ့ရပြီးနောက် ချယ်ဆီးတို့ ချေပဂိုးရရေး အသည်းအသန်ကြိုးစားခဲ့ပေမယ့် ၇၈ မိနစ်မှာ နယူးကာဆယ် ဂိုးထပ်ရခဲ့ပြီး တန်ပြန်တိုက်စစ်ကနေ မူဆာစစ်ဆိုကို ရဲ့ကန်ချက် ပြန်ထွက်လာတာကို စစ်ဆီကပဲ အဆုံးသတ်ပေးခဲ့တာပါ။ သိပ်မကြာခင်မှာပဲ နယူးကာဆယ်နောက်ခံလူ တေလာ အထုတ်ခံခဲ့ရပါတယ်။ ချယ်ဆီးအတွက် ပွဲပြီး ကာနီး ၇ မိနစ်မှာ ဒရော့ဘာက ချေပဂိုးသွင်းပေးခဲ့ပေမယ့် ပွဲအဖြေကိုတော့ ပြောင်းလဲနိုင်ခြင်း မရှိခဲ့ပါဘူး။ ဒီပွဲဟာ ၂ ပွဲဆက် နိုင်ပွဲပျောက်နေတဲ့ နယူးကာဆယ်အတွက် အဖိုးတန်နိုင်ပွဲဖြစ်ပြီး ချယ်ဆီးကတော့ ပြိုင်ပွဲ အရပ်ရပ် ၂၃ ပွဲဆက်တိုက် ရှုံးပွဲမရှိစံချိန် ကျိုးပျက်ခဲ့ရပါတယ်။

မန်စီးတီးတို့ကတော့ ချယ်ဆီးရဲ့ အရှုံးကို အကောင်းဆုံးအသုံးချနိုင်ခဲ့ပြီး အိမ်ကွင်းမှာ အဲဗာတန်ကို ယာယာတိုးယေးရဲ့ ပင်နယ်တီ ၁ လုံးတည်းနဲ့ အနိုင်ရခဲ့ပါတယ်။ ဒါပေမယ့် ကစားသွားတဲ့ ခြေစွမ်းအရ ဒီထက် ဂိုးပိုပြတ်ရမှာပါ။ မန်စီးတီးအတွက် ဆုံးရှုံးမှုတစ်ခုကတော့ အားထားရတဲ့တိုက် တိုက်စစ်မှူး အဂူရို ပွဲအစ ၇ မိနစ်မှာ ဒဏ်ရာရသွားတာပဲဖြစ်ပါတယ်။

နောက်တန်းမငြိမ်တဲ့ အာဆင်နယ်ကတော့ ရှုံးကောင်းဆဲပါပဲ။ ဒီပွဲမှာလည်း စတုတ်စီးတီးကို ပထမပိုင်းမှာပဲ ၃ ဂိုး ပေးလိုက်ရတာပါ နောက်ပိုင်းမှာ ၂ ဂိုးပြန်သွင်းနိုင်ပေမယ့် ပွဲအဖြေကိုတော့ ပြောင်းလဲနိုင်ခြင်းမရှိပါဘူး။ ၇၇ မိနစ်မှာ နောက်ခံလူ ကော်လမ် ချိန်ဘာ အနီကဒ်နဲ့ ထွက်ခဲ့ရပြီး ဒဏ်ရာရကစားသမားတွေများနေတဲ့ အာဆင်နယ်နောက်တန်းအတွက် နောက်ထပ် ထိုးနှက်ချက် တစ်ခုပါပဲ။

လီဗာပူးလ်ကလည်း အိမ်ကွင်းမှာ ကစားခဲ့ရပေမယ့် ခြေစွမ်းက စွဲမက်စရာမရှိခဲ့ဘဲ နောက်ဆုံး လေးပွဲဆက် နိုင်ပွဲပျောက်နေတဲ့ ဆန်းဒါးလန်းကို သရေသာ ကစားနိုင်ခဲ့ပါတယ်။

အဆင့် ၅ က ၀က်စ်ဟမ်းကတော့ ခြေစွမ်းမာတဲ့ ဆွမ်ဆီးကို ကာရိုးလ်ရဲ့ ဂိုး ၂ ဂိုးအပါအ၀င် ၃ ဂိုး ၁ ဂိုးနဲ့ အိမ်ကွင်းမှာ အနိုင်ယူနိုင်ခဲ့ပါတယ်။

ဇယားအောက်ဆုံးက ကျူပီအာရ်က ဘ၀တူဘန်လေကို အကြိတ်အနယ်ကစားပြီ ၂ ဂိုးပြတ်နဲ့ အနိုင်ရခဲ့ကာ အက်စတွန်ဗီလာကတော့ ရှုံးပွဲဆက်နေတဲ့ လက်စတာကို ၂ ဂိုး ၁ ဂိုးနဲ့ အနိုင်ရခဲ့ပါတယ်။

ပွဲစဉ် ၁၅ အပြီးမှာလည်း ချယ်ဆီးက ဇယားကို ဦးဆောင်နေပြီး ဒုတိယနေရာက မန်စီးတီးနဲ့ အမှတ်ကွာဟမှုကတော့ ၃ မှတ်သာ ရှိပါတော့တယ်။ ၀က်စ်ဟမ်းက အဆင့် ၃ နေရာမှာရှိနေပြီး ဆောက်သက်တမ်နဲ့ မန်ယူတို့ကတော့ ၁ ပွဲလျော့နဲ့ အဆင့် ၄၊ အဆင့် ၅ နေရာမှာ ရှိနေပါတယ်။ ပြီးခဲ့တဲ့တစ်ပတ်က အဆင့် ၉ အထိ ရောက်သွားတဲ့ နယူးကာဆယ် အဆင့် ၇ ကို တက်လာနိုင်ပြီး လီဗာပူးလ်ကတော့ အဆင့် ၉ ရောက်သွားပါတယ်။

တန်းဆင်းဇုံထဲမှာတော့ ဟားလ်စီးတီး၊ ဘန်လေနဲ့ လက်စတာတို့ အသီးသီးရှိနေပါတယ်။

ဒီတစ်ပတ် ပရီးမီးယားလိဂ် ရလဒ်များကတော့ အောက်ပါအတိုင်းဖြစ်ပါတယ်။

နယူးကာဆယ် ၂-၁ ချယ်ဆီး
ဟားလ်စီးတီး ၀-၀ ၀က်စ်ဘရွန်း
လီဗာပူးလ် ၀-၀ ဆန်းဒါးလန်း
ကျူပီအာရ် ၂-၀ ဘန်လေ
စတုတ် ၃-၂ အာဆင်နယ်
တော့တင်ဟမ် ၀-၀ ခရစ္စတယ်ပဲလေ့စ်
မန်စီးတီး ၁-၀ အဲဗာတန်
ဝက်စ်ဟမ်း ၃-၁ ဆွမ်ဆီး
အက်စတွန်ဗီလာ ၂-၁ လက်စတာ

ဒီဇင်ဘာ ၆ ၊ ၂၀၁၄
M-Media

– လူမျိုးရေးခွဲခြားခြင်းနှင့် ဂျူးဆန့်ကျင်ရေး သဘောသက်ရောက်စေမည့် မက်ဆေ့ခ်ျကို ဆိုရှယ်မီဒီယာတွင် ရေးသားခဲ့သည့်အတွက် လီဗာပူးလ်အသင်း၏ အီတလီတိုက်စစ်မှူး ဘာလော့တယ်လီအား အင်္ဂလန်ဘောလုံးအဖွဲ့ချုပ် FA မှ တရားစွဲဆိုလိုက်သည်ဟု သိရသည်

ဘာလော့တယ်လီမှာ ပြီးခဲ့သည့် ရက်ပိုင်းက ၎င်း၏ Instagram စာမျက်နှာတွင်  ဂျပန်ဂိမ်းကုမ္ပဏီတစ်ခုဖြစ်သော နီတန်းဒိုးမှ ဖန်ထီးထားသည့် စူပါမာရီယိုဇာတ်ကောင်ကို အသုံးပြု၍ လူမျိုးရေးခွဲခြားမှုကို ဆန့်ကျင်သည့် မက်ဆေ့ခ်ျအချို့ကို ရေးသားခဲ့ပြီး အဆိုပါမက်ဆေ့ခ်ျတွင် ဂျူးလူမျိုးများ ငွေမက်သည်ဟု မှတ်ယူ၍ရသော စာကြောင်းတစ်ကြောင်း ပါဝင်ခဲ့ကာ ထိုစာကြောင်းအတွက် ဝေဖန်မှုများ ခံခဲ့ရသည်။

ဘာလော့တယ်လီကမူ ၎င်း၏ မိခင်မှာ ဂျူးလူမျိုးတစ်ဦးဖြစ်ကြောင်း မိမိမှာ အများထင်သလို လူမျိုးရေးခွဲခြားကာ ရေးသားခဲ့ခြင်းမဟုတ်ကြောင်း ထိုမက်ဆေ့ခ်ျနှင့် ပတ်သက်၍ နောက်ပိုင်းတွင် ပြန်လည်တောင်းပန်ခဲ့သည်။

FA ကလည်း အဆိုပါ မက်ဆေ့ခ်ျမှာ အလွဲသုံးသော၊ စော်ကားသော၊ မသင့်လျော်သော မက်ဆေ့ခ်ျဖြစ်သည်ဟု ဖော်ပြခဲ့ပြီး FA ၏ လူမျိုးရေးခွဲခြားမှုဆိုင်ရာ စည်းမျဉ်းစည်းကမ်းများကို ချိုးဖောက်ခြင်းဖြစ်၍ တရားစွဲဆိုခဲ့ခြင်းဖြစ်သည်ဟု သတင်းထုတ်ပြန်ခဲ့သည်။

ပေါင်ခြံဒဏ်ရာကြောင့် အနားယူနေရသည့် ဘာလော့တယ်လီမှာ ထိုအမှုအား ဒီဇင်ဘာ ၁၅ ရက်နေ့တွင် ရင်ဆိုင်ရမည်ဖြစ်သည်။ ဘာလော့တယ်လီမှာ ယခင်ကလည်း လူမျိုးရေးခွဲခြားသည့် စကားများ၊ လုပ်ရပ်များကြောင့် ဝေဖန်ခံခဲ့ရသူဖြစ်သည်။