Tag: SaudiArabia

ဇူလိုင် ၆၊ ၂၀၂၁
M-Media

-ဒေသတွင်း သယ်ယူပို့ဆောင်ရေးနဲ့ ကုန်စည်စီးဆင်းမှုမှာ အဓိကကျတဲ့ နိုင်ငံတစ်ခု ဖြစ်လာရေးအတွက် ကန်ဒေါ်လာ ၁၁၃.၃၄ ဘီလီယံ ရင်းနှီးမြှုပ်နှံသွားမယ်လို့ ဆော်ဒီအာရေဗျက ကြေငြာလိုက်ပါတယ်။

လေဆိပ်၊ ဆိပ်ကမ်း၊ ရထားလိုင်းအပါအဝင် အခြား ကြီးမားတဲ့ အခြေခံအဆောက်အဦး တည်ဆောက်ရေးစီမံကိန်းတွေ ပါဝင်မှာပါ။ ၂၀၃၀ အရောက်မှာ ဒေသတွင်းနဲ့ ကမ္ဘာ့အဆင့်မှာပါ ပို့ဆောင်ရေး အချက်အခြာနိုင်ငံတစ်ခု ဖြစ်လာဖို့ ရည်ရွယ်တာ ဖြစ်ပါတယ်။

နိုင်ငံတကာနဲ့ချိတ်ဆက်မှုမှာ ဆော်ဒီအာရေဗျဟာ ဒေသတွင်းက ယူအေအီး၊ ကာတာတို့လို နိုင်ငံတွေနဲ့ယှဉ်ရင် သိသိသာသာကို နည်းနေတာဖြစ်ပါတယ်။

အခု ပို့ဆောင်ရေးစီမံကိန်းသစ်မှာ လေကြောင်းခရီးစဉ် ၉၉ ခုကနေ ၂၅၀ အထိ ရှိလာအောင် ဆောင်ရွက်သွားမှာဖြစ်ပြီး ၂၀၁၉ ခုနှစ်က လေကြောင်းခရီးသွားလာသူအရေအတွက် ၁၀၃ သန်းရှိရာကနေ ၂၀၃၀ အရောက်မှာ ၃ ဆ သန်း ၃၃၀ လောက်ရှိဖို့ ရည်မှန်းထားပါတယ်။

ကုန်စည်တွေ လေကြောင်းနဲ့ သယ်ယူပို့ဆောင်ပေးမှု အရေအတွက်ကိုလည်း ၂၀၁၉ ခုနှစ်မှာ တန် ၉ သိန်း ရှိခဲ့ရာကနေ ၂၀၃၀ အရောက်မှာ တန်ပေါင်း ၄.၅ သန်းအထိ ချဲ့ထွင်နိုင်ဖို့ လုပ်ဆောင်သွားမှာပါ။

ဆော်ဒီအာရေဗျဟာ ၂၀၃၀ စီမံကိန်းချထားပြီး နိုင်ငံရဲ့ စီးပွားရေး၊ လူမှုရေး နယ်ပယ်စုံမှာ ဖွံ့ဖြိုးတိုးတက်အောင် ဆောင်ရွက်နေတာ ဖြစ်ပါတယ်။

Ref: Reuters

ဇွန် ၁၄၊ ၂၀၂၁
M-Media

-နိုင်ငံတစ်ဝှမ်းက အလားအလာရှိတဲ့ ကျောင်းသူကျောင်းသားတွေကို ရွေးချယ်ပြီး သီးသန့် လေ့ကျင့်သင်ကြားပေးမယ့် ပညာရေးစွမ်းရည်မြှင့်သင်တန်းကို ဆော်ဒီအာရေဗျက စတင်လိုက်ပါတယ်။

အစိုးရအကူအညီပေးရေးအဖွဲ့ဖြစ်တဲ့ ‘ပါရမီနှင့် တီထွင်ဖန်တီးမှုဆိုင်ရာ ဖောင်ဒေးရှင်း’ (Mawhiba) က ပြုလုပ်တဲ့ ဒီစွမ်းရည်မြှင့်သင်တန်းဟာ ဇွန်လ ၁၃ ရက်နေ့ကနေ ဇူလိုင် ၁ ရက်နေ့အထိ ၂၁ ရက် ကြာမြင့်မှာ ဖြစ်ပါတယ်။

ဒီအစီအစဉ်ဟာ ကမ္ဘာ့အကြီးမားဆုံး သိပ္ပံနဲ့ နည်းပညာဆိုင်ရာ စွမ်းရည်မြှင့်သင်တန်တစ်ခုလည်း ဖြစ်ပါတယ်။

နိုင်ငံတစ်ဝှမ်းက ပါရီရှိတဲ့ ကျောင်းသူ၊ ကျောင်းသား ၆ ထောင်ကို ပညာရေးဝန်ကြီးဌာနက ရွေးချယ်ပြီး တက္ကသိုလ် ၅ ခုကနေ သိပ္ပံ၊ နည်းပညာ၊ အင်ဂျင်နီယာပညာ၊ ဆေးပညာ စတဲ့ ဘာသာရပ်တွေကို သင်ကြားပို့ချပေးမှာပါ။

သင်ကြားမှုကို အွန်လိုင်းနဲ့ လူကိုယ်တိုင် ၂ ဖွဲ့ခွဲ့ထားပြီး အွန်လိုင်း သင်တန်းမှာတော့ ၂၁ ရက်တာ ကာလအတွင်း တက်ရက်ကို ၄ နာရီ စာသင်ချိန်- သတ်မှတ်ထားပါတယ်။ ၃ နာရီက ဆရာတွေ သင်ကြားမှာဖြစ်ပြီး ၁ နာရီက ကျောင်းသားတွေ လက်တွေ့ လေ့ကျင့်ရမှာပါ။

စာသင်ခန်းက လူကိုယ်တိုင်သင်ကြားမှုမှာတော့ တစ်ရက်ကို ၆ နာရီ သတ်မှတ်ထားပြီး ၄ နာရီ စာသင်ကာ ၂ နာရီ လက်တွေ့လုပ်ရမှာ ဖြစ်ပါတယ်။

ဒီစွမ်းရည်မြှင့်အစီအစဉ်ရဲ့ ဒုတိယအဆင့်က ဩဂုတ်လ ၁ ရက်နေ့ကနေ ၁၉ ရက်နေ့အထိ ဖြစ်ပါတယ်။

“ပညာရပ်ဆိုင်ရာ စွမ်းရည်မြှင့်တဲ့ ဒီအစီအစဉ်မှာ သိပ္ပံဘာသာရပ်တွေ သင်ကြားပေးတာနဲ့ လက်တွေ့ကျွမ်းကျင်မှု မြှင့်တင်ပေးတာတွေ ပါဝင်မှာပါ။ ကျောင်းသားတွေရဲ့ ကိုယ်ရည်ကိုယ်သွေးနဲ့ လူမှုဆိုင်ရာတွေ သင်ပေးမှာဖြစ်သလို၊ ၂၁ ရာစုမှာ လိုအပ်တဲ့ ကျွမ်းကျင်မှုတွေကိုလည်း လေ့ကျင့်သင်ကြားပေးမှာ ဖြစ်ပါတယ်” လို့ Mawhiba က ထုတ်ပြန်တဲ့ ကြေငြာချက်မှာ ဖော်ပြထားပါတယ်။

Ref: Arab News

ဇွန် ၁၃၊ ၂၀၂၁
M-Media

-အခုနှစ် ဟဂျ်ဘုရားဖူးကာလမှာ နိုင်ငံအတွင်းက ကိုဗစ်ကာကွယ်ဆေးထိုးထားသူ ၆ သောင်းကိုသာ ဟဂျ်ပြုခွင့်ပေးသွားမယ်လို့ ဆော်ဒီအာရေဗျအာဏာပိုင်တွေက ထုတ်ပြန်လိုက်ပါတယ်။

အဲဒီ ၆ သောင်းမှာ ဆော်ဒီနိုင်ငံသားတွေ၊ ဆော်ဒီမှာနေထိုင်နေတဲ့ နိုင်ငံခြားသားတွေ ပါဝင်မှာပါ။ ဒါပေမယ့် နိုင်ငံခြားတိုင်းပြည်တွေက လာရောက်ပြီး ဟဂျ်ပြုခွင့်ကိုတော့ ၂ နှစ်ဆက်အဖြစ် ဆက်လက် ပိတ်ပင်ထားပါတယ်။

ပုံမှန်အချိန် ဟဂျ်ဘုရားဖူးကာလမှာ ကမ္ဘာတစ်၀ှမ်းက အစ္စလာမ်ဘာသာဝင်သန်းချီ လာရောက် ဟဂျ်ပြုကြပေမယ့် ကိုဗစ်ကပ်ရောဂါကြောင့် မနှစ်က ဟဂျ်ကာလမှာ နိုင်ငံအတွင်းက လူ တစ်သောင်းကိုသာ ကိုဗစ်စည်းမျဉ်းစည်းကမ်းတွေနဲ့အညီ ဆော်ဒီအာဏာပိုင်တွေက ဟဂျ်ပြုခွင့်ပေးခဲ့ပါတယ်။

အခုနှစ် ဟဂျ်ကာလဟာ လာမယ့်ဇူလိုင်လမှာ ကျရောက်မှာ ဖြစ်ပါတယ်။

ဟဂျ်ပြုခွင့်ကို ဇွန်လ ၁၃ ရက်နေ့ကစတင်ပြီး အွန်လိုင်းကနေ လျှောက်ထားနိုင်မှာဖြစ်ပါတယ်။ ဟဂျ်ပြုမယ့်သူဟာ အသက် ၁၈ နှစ်ကနေ ၆၅ နှစ်အတွင်းရှိကာ နာတာရှည်ရောဂါ မရှိဘဲ၊ ကိုဗစ်ကာကွယ်ဆေး ၂ ကြိမ်ထိုးထားသူ၊ ဒါမှမဟုတ် ၁ ကြိမ်ထိုးထားပြီး ၁၄​ ရက်ရှိနေသူ၊ ကိုဗစ်ကူးစက်ပြီး ပြန်ကောင်းထားသူ ဖြစ်ရမှာ ဖြစ်ပါတယ်။

ဆော်ဒီ ဟဂျ်နှင့် အွမ္မရာဟ်ရေးရာဝန်ကြီးဌာနက ဘုရားဖူးတွေရဲ့ ကျန်းမာရေး၊ ဘေးအန္တရာယ်ကင်းရေးနဲ့ လုံခြုံရေးတွေကို အထူးဦးစားပေးပြီး စီစဉ်ကြပ်မတ်သွားမယ်လို့ ထုတ်ပြန်ခဲ့ပါတယ်။

Ref: Arab News

ဇွန် ၁၀၊ ၂၀၂၁
M-Media

-ဆော်ဒီအစိုးရရဲ့ အကူအညီပေးရေးအဖွဲ့ KSrelief က နိုင်ငံ ၅ ခုမှာ ဆေးဘက်ဆိုင်ရာ အကူအညီတွေ ပေးအပ်ဖို့အတွက် အလ်-ဘဆာရ် နိုင်ငံတကာဖောင်ဒေးရှင်းနဲ့ သဘောတူစာချုပ် ချုပ်ဆိုခဲ့ပါတယ်။

သဘောတူညီချက်အရ ယီမင်၊ ဘင်္ဂလားဒေ့ရှ်၊ ဆူဒန်၊ နိုက်ဂျီးရီးယားနဲ့ ပါကစ္စတန်နိုင်ငံတွေမှာ ဆော်ဒီဆရာဝန်တွေနဲ့ စေတနာ့ဝန်ထမ်းတွေဟာ ဆေးဘက်ဆိုင်ရာ အကူအညီပေးရေး စီမံကိန်း အခု ၃၀ ကို ဆောင်ရွက်သွားမှာပါ။

ဒီစီမံကိန်းမှာ ခွဲစိပ်ကုသမှု ၁၂၀၀၀ လောက် လုပ်ပေးဖို့လည်း ပါဝင်ပါတယ်။

KSrelief အဖွဲ့က တာဝန်ရှိသူ ဒေါက်တာ အကီးလ်က နိုင်ငံရဲ့ ၂၀၃၀ စီမံကိန်းမှာ ပါဝင်တဲ့ လူသားချင်းစာနာထောက်ထားမှုဆိုင်ရာ အကူအညီပေးရေးလုပ်ငန်း တိုးမြှင့်လုပ်ဆောင်ရေး မူဘောင်အတိုင်း အခု လှုပ်ရှားမှုကို ဆောင်ရွက်တာဖြစ်တယ်လို့ ပြောကြားခဲ့ပါတယ်။

Ref: Arab News