Tag: SaudiArabia

ဧပြီ ၃၀၊ ၂၀၂၁
M-Media

-မိမိတို့နိုင်ငံနဲ့ ပတ်သက်ပြီး ဆော်ဒီအာရေဗျ အိမ်ရှေ့မင်းသားရဲ့ လတ်တလောမှတ်ချက်တွေကို ကြိုဆိုတယ်လို့ အီရန်နိုင်ငံက ပြောကြားလိုက်ပါတယ်။

အီရန်နဲ့ ဆော်ဒီအာရေဗျတို့ဟာ အရှေ့အလယ်ပိုင်းက ရန်ဘက်နှစ်နိုင်ငံဖြစ်ပြီး ဒေသတွင်း ပဋိပက္ခတွေမှာ ဆန့်ကျင်ဘက် အုပ်စုတွေကို ထောက်ပံ့ပေးနေတာဖြစ်ပါတယ်။

ရှီအာဘာသာရေးခေါင်းဆောင်တစ်ဦးကို ဆော်ဒီက သေဒဏ်ပေးလိုက်မှု နောက်ဆက်တွဲ ၂၀၁၆ ခုနှစ်က အီရန်မှာ ဆန္ဒပြသူတွေ ဆော်ဒီသံရုံးကို တိုက်ခိုက်ခဲ့ပြီးတဲ့နောက် နှစ်နိုင်ငံ အဆက်အသွယ် ပြတ်တောက်သွားတာပါ။

ဒါပေမယ့် ပြီးခဲ့တဲ့လတွေအတွင်း ဆော်ဒီနဲ့အီရန်တို့ဟာ ဆက်ဆံရေးပြန်ကောင်းလာအောင် လျှို့ဝှက် ဆွေးနွေးမှုတွေ လုပ်နေတယ်လို့ သတင်းထွက်လာပါတယ်။

အင်္ဂါနေ့ အရှေ့အလယ်ပိုင်းက ရုပ်သံတစ်ခုနဲ့ အင်တာဗျူးမှာ ဆော်ဒီအိမ်ရှေ့မင်းသား မိုဟာမက် ဘင် ဆလ်မန်က အီရန်နဲ့ ဆက်ဆံရေးကောင်း တည်ဆောက်ချင်တယ်လို့ ပြောကြားခဲ့ပါတယ်။

အီရန်နိုင်ငံခြာရေးဝန်ကြီးဌာနရဲ့ ပြောရေးဆိုခွင့်ရှိသူ စအီးဒ် ခါတီဘ်ဇာဒါက ဒီလို သဘောထားပျော့ပြောင်းလာတာကို ကြိုဆိုတယ်လို့ မနေ့က တု့န်ပြန်ခဲ့ပါတယ်။

“အပြုသဘောဆောင်တဲ့ အမြင်တွေ၊ ဆွေးနွေးမှုအခြေခံတဲ့ ချဉ်းကပ်မှုမျိုးနဲ့ဆိုရင် ဒေသတွင်းနဲ့ အစ္စလာမ်ကမ္ဘာမှာ အရေးပါတဲ့ ဆော်ဒီအာရေဗျနဲ့ အီရန်တို့ဟာ ကူးလူးဆက်ဆံမှု၊ ပူးပေါင်းဆောင်ရွက်မှု စာမျက်နှာသစ် ဖွင့်လှစ်နိုင်မှာဖြစ်ပြီး မတူကွဲပြားမှုတွေကို ကျော်ဖြတ်ကာ ငြိမ်းချမ်းရေး၊ တည်ငြိမ်အေးချမ်းရေးနဲ့ ဒေသတွင်း ဖွံ့ဖြိုးတိုးတက်ရေးတို့ကို ရရှိနိုင်မှာ ဖြစ်ပါတယ်”

ကူဝိတ်၊ ကာတာ၊ အိုမန်နဲ့ အီရတ်နိုင်ငံတို့ကို သွားရောက်ခဲ့တဲ့ အီရန်နိုင်ငံခြားရေးဝန်ကြီး ဂျာဗဒ် ဇာရစ်ဖ်ကလည်း မိမိတို့ဟာ ဒေသတွင်းနိုင်ငံတွေနဲ့ နှစ်နိုင်ငံဆက်ဆံရေး ခိုင်မာအောင် တည်ဆောက်ဖို့ ကြိုးစားနေတယ်လို့ မနေ့က ပြောကြားခဲ့ပါတယ်။

Ref: Alarabiya

ဧပြီ ၁၈၊ ၂၀၂၁
M-Media

-အရှေ့အလယ်ပိုင်းက ရန်ဘက်နှစ်နိုင်ငံဖြစ်တဲ့ အီရန်နဲ့ ဆော်ဒီအာရေဗျတို့က အကြီးတန်း အစိုးရအရာရှိတွေဟာ အီရတ်နိုင်ငံမှာတွေ့ဆုံကာ သံတမန်ဆက်ဆံရေး ပြန်လည်တည်ဆောက်ဖို့ ဆွေးနွေးခဲ့ကြတယ်လို့ သိရပါတယ်။

နှစ်ဖက်ဆက်ဆံရေး ဆိုးရွားခဲ့ပြီးနောက် အီရန်နဲ့ ဆော်ဒီတို့ဟာ လွန်ခဲ့တဲ့ ၄ နှစ်က သံတမန်အဆက်အသွယ် ဖြတ်ခဲ့ကြတာပါ။

ဧပြီလ ၉ ရက်နေ့ ဘဂ္ဂဒတ်က ဆွေးနွေးပွဲဟာ ပထမဆုံးအကြိမ် တိုက်ရိုက်ဆွေးနွေးမှုဖြစ်ပြီး ယီမင်က အီရန်ကျောထောက်နောက်ခံပြုထားတဲ့ ဟူသီအဖွဲ့ ဆော်ဒီအာရေဗျ စက်ရုံတွေကို ဒုံးကျည်တွေ၊ ဒရုန်းတွေနဲ့တိုက်ခိုက်မှုအကြောင်း ပါဝင်ခဲ့တယ်လို့ ဆိုပါတယ်။

ဆော်ဒီကိုယ်စားလှယ်အဖွဲ့ကို ထောက်လှမ်းရေးအကြီးအကဲ ခါလစ် ဘင် အလီ အလ်-ဟူမိုင်ဒန်က ဦးဆောင်ပြီး နောက်ထပ်ဆွေးနွေးပွဲတွေ ထပ်လုပ်ဖို့လည်း စီစဉ်ထားတယ်လို့ အမည်မဖော်လိုတဲ့ တာဝန်ရှိသူတစ်ဦးက ပြောကြားခဲ့ပါတယ်။

ဒီကိစ္စနဲ့ပတ်သက်ပြီး နှစ်ဖက်အစိုးရက ထုတ်ပြန်တာမျိုး မရှိသေးပါဘူး။

လက်ဘနွန်က ပြည်တွင်းရုပ်သံနှစ်ခုကတော့ ဒီလိုဆွေးနွေးတာ မဟုတ်ဘူးလို့ အီရန်သတင်းရင်းမြစ်တွေကို ကိုးကားပြီး ဖော်ပြပါတယ်။

ယီမင်ပြည်တွင်းစစ်မှာ ဆော်ဒီပါဝင်နေတာကို တုန့်ပြန်တဲ့အနေနဲ့ ဟူသီအဖွဲ့ဟာ​ ဆော်ဒီက စက်ရုံတွေ၊ စစ်တပ်အဆောက်အဦးတွေကို တိုးမြှင့်တိုက်ခိုက်နေတာပါ။ အီရန်ဟာ ဟူသီတွေကို လက်နက်ထောက်ပံ့ပေးထားတယ်လို့ ဆော်ဒီအာရေဗျက စွပ်စွဲထားပါတယ်။

ယီမင်စစ်ပွဲကို အမေရိကန်က အဆုံးသတ်ချင်နေပြီး အီရတ်ဝန်ကြီးချုပ် မွတ်စ်တာဖာ အလ်-ကဒ်ဟီမီဟာ ပြီးခဲ့တဲ့လက ဆော်ဒီအာရေဗျကို သွားရောက်ကာ ဒီကိစ္စအတွက် ဆော်ဒီတာဝန်ရှိသူတွေနဲ့ ဆွေးနွေးခဲ့ပါတယ်။

Ref: Financial Times