News @ M-Media

Tag: SaudiArabia

  • နေစွမ်းအင်သုံး ဓာတ်အားပေးစီမံကိန်း ၇ ခုကို ဆော်ဒီ ဖော်ဆောင်မည်

    နေစွမ်းအင်သုံး ဓာတ်အားပေးစီမံကိန်း ၇ ခုကို ဆော်ဒီ ဖော်ဆောင်မည်

    ဧပြီ ၉၊ ၂၀၂၁
    M-Media

    -နိုင်ငံတစ်ဝှမ်း နေစွမ်းအင်သုံး ဓာတ်အားပေးစနစ် စီမံကိန်း ၇ ခုကို ဖော်ဆောင်တော့မယ်လို့ ဆော်ဒီအာရေဗျနိုင်ငံက ဒီကနေ့မှာ ကြေငြာလိုက်ပါတယ်။

    နိုင်ငံအနောက်မြောက်ပိုင်းက Sakaka ဆိုလာစီမံကိန်း ဖွင့်ပွဲမှာ အိမ်ရှေ့မင်းသား မိုဟာမက် ဘင် ဆလ်မန်က စီမံကိန်းသစ်တွေကို ထပ်ကြေငြာလိုက်တာပါ။ ဒါဟာ ၂၀၃၀ ရည်မှန်းချက်မှာ ပါဝင်တဲ့ ပြည့်ဖြိုးမြဲစွမ်းအင် စီမံကိန်း တစ်စိတ်တစ်ပိုင်းလည်း ဖြစ်ပါတယ်။

    ပြီးခဲ့တဲ့တစ်တပ်မှာပဲ ဆော်ဒီဟာ စိမ်းလန်းစိုးပြေရေး စီမံကိန်းကြီးနှစ်ခုဖြစ်တဲ့ Green Initiative နဲ့ Middle East Green Initiative တို့ကို ကြေငြာခဲ့ပါသေးတယ်။

    “ရေရှည်တည်တံ့တဲ့ စွမ်းအင်စျေးကွက်မှာ လမ်းသစ်ဖောက်ပြီး လျှောက်လှမ်းနေတဲ့ ကျွန်တော်တို့ဟာ ပြည့်​ဖြိုးမြဲ စွမ်းအင်ကဏ္ဍမှာ ဦးဆောင်သူဖြစ်လာရေး ဆက်လက်ကြိုးစားသွားမှာပါ” လို့ Sakaka စီမံကိန်း ဖွင့်ပွဲအခမ်းအနားကို တက်ရောက်လာတဲ့ မင်းသား ဘင် ဆလ်မန်က ပြောကြားခဲ့ပါတယ်။

    Sakaka စီမံကိန်းဟာ ဖြည့်ဖြိုးမြဲစွမ်းအင် အသုံးပြုရေး ဆော်ဒီရဲ့ ပထမခြေလှမ်း ဖြစ်တယ်လို့လည်း သူက ဆိုပါတယ်။ Sakaka စီမံကိန်းနဲ့ သိပ်မဝေးတဲ့ ​နေရာမှာ Dumat Al-Jandal လေစွမ်းအင်သုံး ဓာတ်အားပေးစီမံကိန်းကိုလည်း ဆော်ဒီက ဖော်ဆောင်နေပါတယ်။

    Sakaka ကနေ ဓာတ်အား မီဂါဝပ် ၃၀၀ ထုတ်ပေးနိုင်မှာ ဖြစ်ပါတယ်။​ နောက်ထပ် နေစွမ်းအင်သုံး ဓာတ်အားပေး စီမံကိန်း ၇ ခုကနေ စုစုပေါင်း ဓာတ်အား မီဂါဝပ် ၃၆၀၀ လောက် ထုတ်ပေးနိုင်ဖို့ ရည်မှန်းထားပြီး ဒီပမာဏဟာ နေအိမ် ၆ သိန်းကျော်ကို ဓာတ်အားပေးနိုင်မှာဖြစ်ကာ ကာဘွန်ထုတ်လွှတ်မှု တန် ၇ သန်း လျှော့ချပေးနိုင်မှာ ဖြစ်ပါတယ်။

    Ref: Arab News

  • ကိုဗစ်ကာကွယ်ဆေးထိုးထားမှ ဥပုသ်လ အွမ္မရာ ဘုရားဖူးခရီး လာခွင့်ပြုမည်ဟု ဆော်ဒီထုတ်ပြန်

    ကိုဗစ်ကာကွယ်ဆေးထိုးထားမှ ဥပုသ်လ အွမ္မရာ ဘုရားဖူးခရီး လာခွင့်ပြုမည်ဟု ဆော်ဒီထုတ်ပြန်

    ဧပြီ ၆၊ ၂၀၂၁
    M-Media

    ပြီးခဲ့သည့်နှစ် ဟဂျ်မြင်ကွင်း

    -ကိုဗစ်ကာကွယ်ဆေး ထိုးထားတဲ့ သူတွေကိုသာ အခုနှစ် ရမ်ဇာန်ဥပုသ်လ အွမ္မရာဟ် ဘုရားဖူးခရီးစဉ် လာခွင့်ပြုမယ်လို့ ဆော်ဒီအာရဗျ ဟဂျ်နှင့် အွမ္မရာဝန်ကြီးဌာနက ထုတ်ပြန်ပါတယ်။

    အွမ္မရာဟ် ပြုလုပ်လိုသူတွေအနေနဲ့ Tawakkalna အက်ပလီကေးရှင်းကနေ စာရင်းတင်နိုင်မှာဖြစ်ပြီး ကိုဗစ်ကာကွယ်ဆေး နှစ်ကြိမ်ထိုးထားကြောင်း ဒါမှမဟုတ် ကိုဗစ်ဗိုင်းရပ်စ်ကို ခုခံနိုင်တဲ့ ကိုယ်ခံအားရှိထားကြောင်း အထောက်အထားတွေ တင်ပြရမှာ ဖြစ်ပါတယ်။

    ၁၄ ရက်ခြားပြီး နှစ်ကြိမ်ထိုးရတဲ့ ကိုဗစ်ကာကွယ်ဆေး ထိုးထားသူတွေ၊ ကိုဗစ်ကူးစက်ပြီး ပြန်ကောင်းသွားကာ ပိုးမရှိတော့တဲ့သူတွေ လျှောက်ထားနိုင်မှာ ဖြစ်ပါတယ်။

    လာမယ့်တစ်ပတ်မှာ စတင်ကျရောက်မယ့် ရမ်ဇာန်ဥပုသ်လအတွင်း မက္ကာနဲ့ မဒီနာက မြင့်မြတ်ရာ ဗလီဝတ်ကျောင်းတော်တွေမှာ ဝတ်ပြုဆုတောင်းခွင့်ပြုမယ့် လူအရေအတွက်ကို တိုးမြှင့်သွားမှာဖြစ်ပြီး ကိုဗစ် စည်းမျဉ်းစည်းကမ်းကိုတော့ တင်းတင်းကြပ်ကြပ် လိုက်နာရမယ်လို့ ဟဂျ်နှင့်အွမ္မရာဟ်ရေးရာ ဝန်ကြီးဌာနရဲ့ ကြေငြာချက်မှာ ဖော်ပြထားပါတယ်။

    လာမယ့် ၃ လအတွင်း ကျရောက်တော့မယ့် ဟဂျ်ဘုရားဖူး ကာလနဲ့ပတ်သက်ပြီး ထုတ်ပြန်ချက်မှာ ဘာမှ မဖော်ပြထားပါဘူး။ ဆော်ဒီဟာ ပြီးခဲ့တဲ့ဟဂျ်ကာလမှာ ကမ္ဘာတစ်ဝှမ်းက လူအနည်းငယ်သာ ကိုဗစ်စည်းကမ်းနဲ့အညီ ဟဂျ်ပြုခွင့်ပေးခဲ့ပြီး ခေတ်သစ်သမိုင်းမှာ လူဦးရေအနည်းဆုံးဟဂျ် ဖြစ်ခဲ့ပါတယ်။

    Ref: Aljazeera

  • အစ္စရေးနှင့် ဆက်ဆံရေးတည်ဆောက်နိုင်လျှင် ဒေသအတွက် အကျိုးရှိမည်ဟု ဆော်ဒီပြော

    အစ္စရေးနှင့် ဆက်ဆံရေးတည်ဆောက်နိုင်လျှင် ဒေသအတွက် အကျိုးရှိမည်ဟု ဆော်ဒီပြော

    ဧပြီ ၂၊ ၂၀၂၁
    M-Media

    -အစ္စရေးနဲ့ မိမိတို့ ဆက်ဆံရေးတည်ဆောက်တာဟာ ဒေသအတွက် အကျိုးရှိမှာဖြစ်တယ်လို့ ဆော်ဒီအာရေဗျ နိုင်ငံခြားရေးဝန်ကြီးက ပြောကြားလိုက်ပြီး ဒါဟာ ငြိမ်ချမ်းရေးလုပ်ငန်းစဉ် တိုးတက်မှုအအပေါ်မှာ အဓိကမူတည်တယ်လို့ ဆိုပါတယ်။

    နိုင်ငံခြားရေးဝန်ကြီး ဖိုက်ဆဲလ် ဘင် ဖာရ်ဟန် အလ် ဆာအွဒ်ဟာ CNN နဲ့ မနေ့ကလုပ်ခဲ့တဲ့ အင်တာဗျူးမှာ ဒီလိုမှတ်ချက်ပေးလိုက်တာ ဖြစ်ပါတယ်။ ဒါပေမယ့် ၁၉၆၇ ခုနှစ် နယ်နမိတ်အတိုင်း ပါ​လက်စတိုင်းနိုင်ငံ ပေါ်ပေါက်လာမှ ဆော်ဒီက အစ္စရေးနဲ့ ဆက်ဆံရေးတည်ဆောက်မယ်လို့လည်း သူက ဆိုပါတယ်။

    “ဒါဟာ စီးပွားရေးအရ၊ လူမှုရေးအရ၊ လုံခြုံရေး ရှုထောင့်အရ တော်တော်လေးကို အကူအညီဖြစ်စေမှာပါ။ ဒီဆက်ဆံရေးဖြစ်မြောက်ဖို့ ပါလက်စတိုင်းတွေ လက်ခံနိုင်ပြီး ဂုဏ်သိက္ခာရှိတဲ့၊ အချုပ်အခြာအာဏာ ပိုင်ခွင့်ရှိတဲ့ ပါလက်စတိုင်းနိုင်ငံ ဖြစ်ပေါ်လာစေမယ့် ငြိမ်းချမ်းရေးသဘောတူညီချက်တစ်ခု လိုအပ်ပါတယ်”

    ဒီသဘောထားဟာ ဆော်ဒီအာရေဗျနိုင်ငံရဲ့ အရင်ကတည်းက ထားရှိခဲ့တဲ့ သဘောထား ဖြစ်တယ်လို့လည်း နိုင်ငံခြားရေးဝန်ကြီးက ဆိုပါတယ်။

    ပြီးခဲ့တဲ့နှစ်က ယူအေအီး၊ ဘာရိန်း၊ ဆူဒန်နဲ့ မော်ရိုကိုတို့ဟာ အစ္စရေးနဲ့ ဆက်ဆံရေးထူထောင်ဖို့ သဘောတူညီခဲ့ကြပါတယ်။ အမေရိကန် ကြားဝင်ဆောင်ရွက်ပေးတဲ့ ဒီသဘောတူညီချက်ကို ‘အီဘရာဟင် သဘောတူညီချက်’ လို့လည်း ခေါ်ဆိုပါတယ်။

    အရှေ့အလယ်ပိုင်းနဲ့ အစ္စလာမ်ကမ္ဘာမှာ ဩဇာရှိတဲ့ ဆော်ဒီအာရေဗျ ဒီသဘောတူညီချက်မှာ ပါဝင်လာဖို့အတွက် အမေရိကန်က အလိုရှိနေပါတယ်။

    ပါလက်စတိုင်းကတော့ အာရပ်နိုင်ငံတွေ အစ္စရေးနဲ့ ဆက်ဆံရေးတည်ဆောက်တာဟာ သူတို့နောက်ကျောကို ဓားနဲ့ထိုးတာဖြစ်တယ်လို့ ဝေဖန်ထားပါတယ်။

    Ref: Aljazeera

  • တူရကီဒရုန်းကို ပြိုင်ဘက် ဆော်ဒီအာရေဗျက ဝယ်ယူရန် ကမ်းလှမ်း

    တူရကီဒရုန်းကို ပြိုင်ဘက် ဆော်ဒီအာရေဗျက ဝယ်ယူရန် ကမ်းလှမ်း

    မတ် ၁၇၊ ၂၀၂၁
    M-Media

    -မိမိတို့နိုင်ငံက ထုတ်လုပ်တဲ့ ဒရုန်းလေယာဉ်တွေကို ဝယ်ယူဖို့ ဆော်ဒီအာရေဗျက ကမ်းလှမ်းထားတယ်လို့ တူရကီသမ္မတ အာဒိုဂန်က ပြောကြားလိုက်ပြီး ဒါဟာ တင်းမာမှုဖြစ်နေတဲ့ နှစ်နိုင်ငံ ပြေလည်မှုလမ်းစလည်း ဖြစ်ပါတယ်။

    ၂၀၁၈ ခုနှစ် အစ္စတန်ဘူလ်က ဆော်ဒီကောင်စစ်ဝန်ရုံးမှာ ဆော်ဒီဂျာနယ်လစ် ကမားလ် ကာရှိုဂျီ အသတ်ခံရမှုအတွက် ဆော်ဒီနဲ့ တူရကီတို့အကြား တင်းမာမှုတွေ ရှိနေတာ ဖြစ်ပါတယ်။ ဒီသတ်ဖြတ်မှုကို ဆော်ဒီအိမ်ရှေ့မင်းသား မိုဟာမက် ဘင် ဆလ်မန်က စီစဉ်တာလို့ အမေရိကန်နဲ့ တူရကီတို့က စွပ်စွဲထားတာပါ။

    မနေ့က သတင်းစာရှင်းလင်းပွဲမှာတော့ အာဒိုဂန်က ဆော်ဒီဟာ တူရကီထုတ် ဒရုန်းတွေကို ဝယ်ယူဖို့ ကမ်းလှမ်းထားတယ်လို့ ထည့်သွင်းပြောကြားခဲ့ပါတယ်။ ဒါပေမယ့် ပိုင်နက်ပြဿနာရှိနေတဲ့ ဂရိနဲ့ ဆော်ဒီက စစ်ရေးလေ့ကျင့်ဖို့ စီစဉ်ထားတာကိုတော့ အာဒိုဂန်က ရှုတ်ချပါတယ်။

    “ဆော်ဒီဟာ ဂရိနိုင်ငံနဲ့ ပူးတွဲစစ်ရေးလေ့ကျင့်မှု လုပ်တယ်။ တစ်ချိန်တည်းမှာပဲ ကျွန်တော်တို့ဆီကနေ လက်နက်တပ်ဒရုန်းတွေဝယ်ဖို့ ကမ်းလှမ်းထားတယ်။ ဒီပြဿနာကို အရှုပ်မခံဘဲ အေးအေးဆေးဆေးရှင်းဖို့ ကျွန်တော်တို့ မျှော်လင့်ပါတယ်”

    ပြီးခဲ့တဲ့နှစ်က ၆ ပတ်တာကြာမြင့်ခဲ့တဲ့ အဇာဘိုင်ဂျန်-အာမေးနီးယားစစ်ပွဲမှာ တူရကီထုတ် Bayraktar TB2 ဒရုန်းတွေက နာမည်ကြီးလာတာပါ။ အာဇာဘိုင်ဂျန်ဟာ အစ္စရေးနဲ့ တူရကီထုတ် ဒရုန်းတွေအပါအဝင် အဆင့်မြင့်နည်းပညာတွေနဲ့ အာမေနီးယားကို အနိုင်ယူခဲ့ပြီး လွန်ခဲ့တဲ့ ၁၀ စုနှစ်တွေအရင်က ဆုံးရှုံးခဲ့ရတဲ့ နယ်မြေအချို့ကို ပြန်သိမ်းနိုင်ခဲ့ပါတယ်။

    Bayraktar TB2 ဒရုန်းတွေကို ဆီးရီးယားနဲ့ လစ်ဗျားတို့က စစ်ပွဲတွေမှာလည်း အသုံးပြုနေပါတယ်။

    ဆော်ဒီအာရေဗျကတော့ ဒရုန်းထုတ်လုပ်တဲ့ Vestel ကုမ္ပဏီကနေ နည်းပညာဆိုင်ရာ လွှဲပြောင်းသုံးစွဲခွင့် ရရှိထားပြီး ကိုယ်ပိုင်ဒရုန်း ထုတ်လုပ်ဖို့ စီစဉ်နေပါတယ်။

    တူရကီနဲ့ ဆော်ဒီအာရေဗျတို့ဟာ လစ်ဗျားစစ်ပွဲနဲ့ မြေထဲပင်လယ်အရှေ့ပိုင်းက နယ်မြေအငြင်းပွားမှုတွေမှာ ဆန့်ကျင်ဖက်အဖွဲ့တွေကို ထောက်ခံအားပေးနေတာ ဖြစ်ပါတယ်။

    Ref: Aljazeera

  • ဆော်ဒီအာရေဗျတွင် အမျိုးသမီးများကို စစ်မှုထမ်းခွင့် စပြု

    ဆော်ဒီအာရေဗျတွင် အမျိုးသမီးများကို စစ်မှုထမ်းခွင့် စပြု

    ဖေဖော်ဝါရီ ၂၂၊ ၂၀၂၁
    M-Media

    -ဆော်ဒီအာရေဗျစစ်တပ်မှာ အမျိုးသမီးတွေ စတင်အမှုထမ်းခွင့်ရပြီလို့ ပြည်တွင်းမီဒီယာတွေက ဒီကနေ့မှာ ဖော်ပြပါတယ်။

    စစ်တပ်က ရာထူးအစုံမှာ ဝင်ရောက်အမှုထမ်းနိုင်မှာဖြစ်ပြီး အနည်းဆုံး အထက်တန်းအဆင့်ပညာရေး ရှိရမှာ ဖြစ်ပါတယ်။ နိုင်ငံခြားသားနဲ့ လက်ထပ်ထားတဲ့ အမျိုးသမီးတွေကိုတော့ အမှုထမ်းခွင့်ပြုမှာ မဟုတ်ပါဘူး။

    ရှေးရိုးစွဲဓလေ့ထုံးတမ်းတွေကြောင့် အမျိုးသမီးတွေအပေါ် ကန့်သတ်ထားမှုတွေ ဖယ်ရှားရေး အစီအစဉ်​ကို ဆော်ဒီအစိုးရက ၂၀၁၈ ခုနှစ်မှာ စတင် ဆောင်ရွက်ခဲ့တာပါ။ အဲဒီနှစ်မှာပဲ အမျိုးသမီးတွေကို ကားမောင်းခွင့်ပြုခဲ့သလို၊ နိုင်ငံရပ်ခြားသွားရင် အမျိုးသားအုပ်ထိန်းသူတစ်ဦး လိုက်ပါရတဲ့စနစ်ကို ၂၀၁၉ ခုနှစ်မှာ ဖယ်ရှားပေးခဲ့ပါတယ်။

    အမျိုးသမီးတွေ စစ်မှုထမ်းခွင့်ပေးမယ့် အစီအစဉ်ကိုလည်း ၂၀၁၉ ခုနှစ်မှာ ကြေငြာခဲ့တာ ဖြစ်ပါတယ်။

    အိမ်ရှေ့မင်းသား မိုဟာမက် ဘင် ဆလ်မန်ဦးဆောင်တဲ့ ဆော်ဒီအစိုးရဟာ နိုင်ငံမှာ ဘက်စုံဖွံ့ဖြိုးအောင် ၂၀၃၀ ပြုပြင်ပြောင်းလဲရေး စီမံကိန်းချပြီး လုပ်ဆောင်နေတာ ဖြစ်ပါတယ်။

    အဲဒီပြုပြင်ပြောင်းလဲရေး စီမံကိန်းမှာ အမျိုးသမီးတွေရဲ့ စွမ်းဆောင်ရည် မြှင့်တင်ပေးရေးလည်း ပါဝင်ပါတယ်။ လက်ရှိ ဆော်ဒီအစိုးရဟာ အမျိုးသမီးတွေအတွက် အလုပ်အကိုင်အခွင့်အလမ်း ပိုမိုဖန်တီးပေးလာသလို နိုင်ငံရဲ့ အုပ်ချုပ်ရေး၊ ဥပဒေပြုရေးနဲ့ တရားစီရင်ရေးကဏ္ဍတွေမှာလည်း အမျိုးသမီးတွေကို ပိုမိုခန့်ထားလာပါတယ်။

    Ref: Aljazeera