ဩဂုတ် ၂၂၊ ၂၀၂၀
M-Media
-ဂျေရုစလင်ကို မြို့တော်အဖြစ်ထားတဲ့ ပါလက်စတိုင်းနိုင်ငံ ပေါ်ပေါက်လာပြီး နောက်ပိုင်းမှသာ အစ္စရေးနဲ့ သံတမန်ဆက်ဆံရေး တည်ဆောက်သွားမယ်လို့ ဆော်ဒီအာရေဗျက ထုတ်ပြန်ပြောကြားလိုက်ပါတယ်။
ဩဂုတ်လ ၁၃ ရက်နေ့မှာ အာရပ်စော်ဘွားများပြည်ထောင်စု (ယူအေအီး)နဲ့ အစ္စရေးတို့ သံတမန်ဆက်ဆံရေး ထူထောင်ကြောင်း ကြေငြာခဲ့ပြီးတဲ့နောက် ဆော်ဒီအပါအဝင် အခြား ပင်လယ်ကွေ့နိုင်ငံတွေလည်း ယူအေအီးလမ်းစဉ်ကို လိုက်နိုင်တယ်လို့ သတင်းတွေ ထွက်ပေါ်နေတာပါ။
အမေရိကန်သမ္မတ ဒေါ်နယ်ထရမ့်က ယူအေအီးနဲ့ အစ္စရေးတို့ရရှိခဲ့တဲ့ သဘောတူညီချက်မှာ ဆော်ဒီပါဝင်လာဖို့ မျှော်လင့်တယ်လို့ ဗုဒ္ဓဟူးနေ့မှာ ပြောကြားခဲ့ပါတယ်။ ဆော်ဒီဟာ အမေရိကန်ရဲ့ အဓိက မဟာမိတ်ဖြစ်သလို ပင်လယ်ကွေ့ဒေသမှာ အစ္စရေးနဲ့ပတ်သက်တဲ့ ပေါ်လစီတွေကို ဦးဆောင်ချမှတ်သူလည်း ဖြစ်ပါတယ်။
အမေရိကန်ဆိုင်ရာ ဆော်ဒီသံအမတ်အဖြစ် တာဝန်ထမ်းဆောင်ခဲ့ဖူးပြီး၊ ဆော်ဒီထောက်လှမ်းရေးအကြီးအကဲဟောင်းလည်းဖြစ်တဲ့ မင်းသား တာကီ အလ်-ဖိုင်ဆဲလ်က လွတ်လပ်တဲ့ ပါလက်စတိုင်းနိုင်ငံ မပေါ်လာမချင်း အစ္စရေးနဲ့ ဆက်ဆံရေးထူထောင်မှာ မဟုတ်ဘူးလို့ မနေ့မှာ ပြောကြားခဲ့ပါတယ်။
“ယူအေအီးလမ်းစဉ်လိုက်လိုတဲ့ ဘယ်အာရပ်နိုင်ငံမဆို တောင်းဆိုမှု ကြီးကြီးမားမား လုပ်ဆောင်သင့်ပါတယ်။ အစ္စရေးနဲ့ အာရပ်တွေအကြား ငြိမ်းချမ်းရေးအတွက် ဆော်ဒီအာရေဗျက တောင်းဆိုမှုတစ်ခု သတ်မှတ်ထားပါတယ်။ ဒါကတော့ ကွယ်လွန်သွားတဲ့ ဘုရင်အဘ်ဒူလာ မိတ်ဆက်ခဲ့တဲ့ ဂျေရုစလင်ကို မြို့တော်ထားပြီး အချုပ်အခြာအာဏာပိုင် ပါလက်စတိုင်းနိုင်ငံ ဖြစ်ပေါ်လာရေးပါ”
ယူအေအီးဟာ အီဂျစ်နဲ့ ဂျော်ဒန်ပြီးနောက် အစ္စရေးနဲ့ ဆက်ဆံရေးထူထောင်တဲ့ တတိယမြောက် အရှေ့အလယ်ပိုင်းနိုင်ငံဖြစ်ပါတယ်။
ပါလက်စတိုင်းပိုင် အနောက်ဖက်ကမ်းက ဒေသတွေကို ပိုက်နက်ထဲထည့်သွင်းရေး အစ္စရေးရဲ့ အစီအစဉ်ကို ရပ်တန့်ရမယ်ဆိုတဲ့ တောင်းဆိုမှုနဲ့ သံတမန်ဆက်ဆံရေးတည်ဆောက်ခဲ့တဲ့ ယူအေအီးရဲ့ လုပ်ဆောင်ချက်ကို နားလည်တယ်လို့လည်း မင်းသား တာကီက ထည့်သွင်းပြောကြားခဲ့ပါတယ်။
အာရပ်လိဂ်ရဲ့ ၂၀၀၂ ခုနှစ် ကမ်းလှမ်းချက်ထဲမှာ ၁၉၆၇ ခုနှစ်က ကျူးကျော်သိမ်းပိုက်ထားတဲ့ ပါလက်စတိုင်းဒေသတွေက အစ္စရေးတပ်တွေ ရုပ်သိမ်းပေးရင် အစ္စရေးနဲ့ ပုံမှန်ဆက်ဆံရေး ပြန်လည်ထူထောင်သွားမယ်ဆိုတဲ့ အချက်တစ်ခု ပါဝင်ပါတယ်။
Ref: Aljazeera
