အောက်တိုဘာ ၁၇၊ ၂၀၂၀
M-Media
-အခုနှစ် ဟဂျ်ဘုရားဖူးကာလမှာ ကိုဗစ်ကူးစက်မှု လုံး၀မရှိအောင် ဆောင်ရွက်နိုင်ခဲ့တာဟာ နည်းပညာကို အကောင်းဆုံး အသုံးချနိုင်မှုကြောင့် ဖြစ်တယ်လို့ ဆော်ဒီ ဟဂျ်နှင့် အွမ္မရာဟ်ရေးရာ ဝန်ကြီးဌာနက ပြောကြားလိုက်ပါတယ်။
နှစ်စဉ် ကမ္ဘာတစ်ဝှမ်းက အစ္စလာမ်ဘာသာဝင်သန်းချီလာရောက်ကြတဲ့ ဟဂျ်ဘုရားဖူးအစီအစဉ်ကို ဒီနှစ်မှာတော့ ကိုဗစ်ကပ်ရောဂါကြောင့် လူ ၁ သောင်းသာ ခွင့်ပြုခဲ့ပါတယ်။ ဟဂျ်ပြုမယ့်သူတွေကို ကျန်းမာရေးဆိုင်ရာ ကြိုတင်စစ်ဆေးမှုတွေ အသေးစိတ်လုပ်ခဲ့သလို ဟဂျ်ဘုရားဖူးကာလအတွင်း ကိုဗစ်ကန့်သတ်ချက်တွေကို ချွင်းချက်မရှိ လိုက်နာနိုင်အောင်လည်း ဆော်ဒီအစိုးရက စီစဉ်ပေးခဲ့ပါတယ်။
ဘုရားဖူးတွေကို စောင့်ကြည့်မှုနဲ့ ကျန်းမာရေးစောင့်ရှောက်မှုပေးရာမှာ နောက်ဆုံးပေါ် နည်းပညာတွေကို အသုံးပြုခဲ့ပါတယ်။
ဟဂျ်နှင့် အွမ္မရာရေးရာ ဝန်ကြီးဌာန ဝန်ကြီး ဒေါက်တာ မိုဟာမက် ဆာလေ ဘင် တာဟာရ် ဘန်တန်က မိမိတို့ဟာ နှစ်စဉ်နှစ်တိုင်း ဟဂျ်ဘုရားဖူးကိစ္စကို အောင်မြင်အောင် ဆောင်ရွက်နိုင်ခဲ့ပြီး အခုနှစ် ဟဂျ်ကာလဟာ မကြုံစူး စမ်းသပ်မှုတစ်ခုဖြစ်တယ်လို့ ပြောကြားခဲ့ပါတယ်။
“တစ်ကမ္ဘာလုံးက ကိုဗစ်ကပ်ရောဂါကို ရင်ဆိုင်နေတဲ့ ဒီနှစ်ဟဂျ်ကာလဟာ နည်းနည်း ထူးခြားပါတယ်။ ၂၀၂၀ ဟဂျ်ဘုရားဖူကာလမှာ ဆော်ဒီအစိုးရဟာ မကြုံစဖူး စိန်ခေါ်မှုတွေကို ရင်ဆိုင်ကြုံတွေ့ခဲ့ရပြီး ဘုရားသခင် အလိုတော်နဲ့ ဖြေရှင်းဆောင်ရွက်နိုင်ခဲ့ပါတယ်”
ကိုဗစ်ကန့်သတ်ချက်တွေနဲ့ ကိုက်ညီဖို့အတွက် မြင့်မြတ်ရာဗလီနှစ်လုံး၊ ဟဂျ်နဲ့သက်ဆိုင်တဲ့ အခြေခံအဆောက်အဦးတွေကို အဆင့်မြှင့်တင်နိုင်ခဲ့တယ်လို့လည်း ဝန်ကြီးက ထည့်သွင်းပြောကြားခဲ့ပါတယ်။
အွမ္မရာဟ် ဘုရားဖူးခရီးစဉ်ကို မတ်လကတည်းက ပိတ်ထားရာကနေ ပြီးခဲ့တဲ့လမှာ ဆော်ဒီက ကန့်သတ်ချက်နဲ့ ပြန်ဖွင့်ပေးခဲ့ပါတယ်။
Ref: Arab News
