ဒီဇင်ဘာ ၂၄၊ ၂၀၁၉
M-Media
-ပြီးခဲ့တဲ့နှစ် အောက်တိုဘာလက ဝါရှင်တန်ပို့စ်သတင်းထောက် ဂျမားလ်ကာရှိုဂျီ အသတ်ခံရမှုနဲ့ပတ်သက်ပြီး ဆော်ဒီက လူ ၅ ဦးကို မနေ့မှာ သေဒဏ်ချမှတ်လိုက်ပါတယ်။
ကာရှိုဂျီဟာ တူရကီနိုင်ငံ အစ္စတန်ဘူလ်မြို့က ဆော်ဒီကောင်စစ်ဝန်ရုံးမှာ အသတ်ခံလိုက်ရတာ ဖြစ်ပါတယ်။ ဆော်ဒီအစိုးရနဲ့ တော်ဝင်မိသားစုကို ဝေဖန်ရေးသားလေ့ရှိတဲ့ ကာရှိုဂျီကို သတ်ဖြတ်ဖို့ ဆော်ဒီအိမ်ရှေ့မင်းသား မိုဟာမက် ဘင် ဆလ်မန်က အမိန့်ပေးခဲ့တာလို့ သတင်းတွေထွက်ခဲ့ပေမယ့် ဆော်ဒီအစိုးရကတော့ ဒါကို ငြင်းဆိုပါတယ်။
ဒီသတ်ဖြတ်မှုနဲ့ပတ်သက်ပြီး ထောက်လှမ်းရေး ဒုတိယအကြီးအကဲ အဟ်မဒ် အလ်-အဆီရီ၊ အစ္စတန်ဘူလ် ကောင်စစ်ဝန်ရုံးက ကောင်စစ်ဝန် မိုဟာမက် အလ်-အိုတိုင်ဘီတို့အပါအဝင် လူ ၁၁ ယောက်ကို ဆော်ဒီက ဖမ်းဆီးတရားစွဲဆိုခဲ့ပါတယ်။
မနေ့က အမိန့်ချမှတ်အမှုအတွင်း ၅ ဦးကို သေဒဏ်ပေးခဲ့ပြီး၊ ၃ ဦးကို စုစုပေါင်း ထောင်ဒဏ် ၂၄ နှစ် ချမှတ်ကာ ၃ ဦးကို တရားသေလွှတ်ပေးခဲ့ပါတယ်။ သတ်ဖြတ်မှုကို ကြီးကြပ်ခဲ့တဲ့ အဟ်မဒ် အလ်-အဆီရီနဲ့ ကောင်စစ်ဝန်ဟောင်း အလ်-အိုတိုင်ဘီတို့ကတော့ သက်သေမခိုင်လုံဘူးဆိုတဲ့အချက်နဲ့ လွတ်မြောက်တဲ့အထဲမှာ ပါဝင်ခဲ့ပါတယ်။ ပြစ်ဒဏ်ချမှတ်ခံရသူတွေဟာ အယူခံဝင်နိုင်မှာ ဖြစ်ပါတယ်။
ကာရှိုဂျီအသတ်ခံရမှုဟာ ကမ္ဘာကြီးကို တုန်လှုပ်သွားခဲ့ပါတယ်။ တူရကီထောက်လှမ်းရေးက ရရှိထားတဲ့ ကောင်စစ်ဝန်ရုံး အသံမှတ်တမ်း၊ လုံခြုံရေးကင်မရာမှတ်တမ်းနဲ့ စုံစမ်းစစ်ဆေးမှု ရလဒ်အရ ကာရှိုဂျီဟာ ကြေးစားလူသတ်အဖွဲ့ရဲ့ သတ်ဖြတ်ခြင်းကို ခံခဲ့ရပြီး၊ အလောင်းကို ဖြတ်တောက်ကာ အစ္စတန်ဘူလ်က ကောင်စစ်ဝန်ရုံးအိမ်မှာ အက်စစ်ဖျော ဖျောက်ဖျက်ခဲ့တယ်ဆိုတာ ပေါ်ပေါက်လာခဲ့ပါတယ်။
ကာရှိုဂျီဝတ်ထားတဲ့အင်္ကျီကို သူနဲ့ ခန္ဓာကိုယ်ပုံစံတူသူက ဝတ်ဆင်ကာ ကောင်စစ်ဝန်ရုံးကနေ အထွက်ပြခဲ့တာကြောင့် ဒီသတ်ဖြတ်မှုဟာ သေသေချာချာ စီစဉ်ထားတာဖြစ်တယ်လို့ တူရကီ စုံစမ်းစစ်ဆေးသူတွေက ကောက်ချက်ချခဲ့ပါတယ်။
ကာရှိုဂျီသတ်ဖြတ်ခံရမှုနဲ့ပတ်သက်တဲ့ ကြားနာမှုတွေကို ဆော်ဒီအစိုးရက တခါးပိတ်ဆောင်ရွက်တာဖြစ်ပြီး တူရကီသံရုံးက တာဝန်ရှိသူတစ်ချို့နဲ့ ကာရှိုဂျီရဲ့ မိသားစုတစ်ချို့ကိုသာ တက်ရောက်နားထောင်ခွင့် ပြုခဲ့ပါတယ်။
Ref: Aljazaeera
