ဧပြီ ၁၂၊ ၂၀၁၈
M-Media
– ယီမင်က ဟူသီသူပုန်တွေဟာ ဆော်ဒီအာရေဗျမြို့တော် ရီယာ့ဒ်ကို တိုက်ချင်းပစ်ဒုံးကျည်တစ်စင်း မနေ့မှာ ပစ်လွှတ်ခဲ့ပြီး ဆော်ဒီက ကြားဖြတ် ပစ်ချနိုင်ခဲ့ပါတယ်။
ဟူသီတွေ ထုတ်လွှင့်နေတဲ့ Al Masirah သတင်းဌာနက တိုက်ခိုက်မှုလုပ်ခဲ့ကြောင်း အတည်ပြုခဲ့ပြီး ဆော်ဒီကာကွယ်ရေးဝန်ကြီးဌာနကို ပစ်မှတ်ထားကာ Burkan 2-H စကဒ်ဒုံးကျည်နဲ့ ပစ်ခတ်တာလို့ ဆိုပါတယ်။
ဟူသီအဖွဲ့ရဲ့ ပြောရေးဆိုခွင့်ရှိသူ ရှာရက်ဖ် လွက္ကမန်က ယီမင်မြို့တော် ဆန်နာနဲ့ ဟူသီတွေ ထိန်းချုပ်ထားရာ အခြားဒေသတွေကို အုပ်ချုပ်နေတဲ့ ဗဟိုနိုင်ငံရေးကောင်စီ ဥက္ကဌ ဆာလေဟ် အလ်-ဆာမဒ်က ဒုံးကျည်နှစ်စတင်ကြောင်း ကြေငြာမှုနောက်ပိုင်း ဒီတိုက်ခိုက်မှု ပြုလုပ်တာလို့ ပြောကြားခဲ့ပါတယ်။
ဟူသီတွေဟာ ဆော်ဒီက နဂ်ျရန်နဲ့ ဂျီဇန်ပြည်နယ်တွေမှာရှိတဲ့ ရေနံသိုလှောင်ထားတဲ့နေရာတွေကို ဒုံးကျည်တွေနဲ့ ပစ်ခတ်တိုက်ခိုက်မှုတွေ လုပ်ခဲ့တယ်လို့လည်း Al Masirah က ထပ်မံဖော်ပြခဲ့ပါတယ်။
ယီမင်မှာ ဟူသီတွေကို တိုက်ခိုက်နေတဲ့ ဆော်ဒီဦးဆောင်တဲ့ မဟာမိတ်အဖွဲ့က ဆော်ဒီ လေကြောင်းရန် ကာကွယ်ရေးစနစ်ဟာ နိုင်ငံတောင်ပိုင်းမှာ ဒရုန်လေယာဉ်နှစ်စင်းကို ပစ်ချခဲ့တယ်လို့ မနေ့က သတင်းထုတ်ပြန်ပါတယ်။
၂၀၁၄ ခုနှစ်မှာ ဟူသီတွေသူပုန်တွေဟာ မြို့တော် ဆန်နာကို ထိန်းချုပ်ခဲ့ပြီးနောက် ပြည်တွင်းစစ် အရှိန်မြင့်လာခဲ့ပြီး ၂၀၁၅ ခုနှစ်မှာ ဆော်ဒီဦးဆောင်တဲ့ မဟာမိတ်အဖွဲ့က ယီမင်သမ္မတဟောင်း အဘ်-ရာဘူ မန်ဆူရ်ဖက်ကနေ ဒီစစ်ပွဲမှာ ပါဝင်လာခဲ့ပါတယ်။
အဲ့ဒီနောက်ပိုင်း တိုက်ခိုက်မှုတွေအတွင်း လူပေါင်း တစ်သောင်းကျော်လောက် သေဆုံးကာ၊ အနည်းဆုံး ၄ သောင်းလောက် ဒဏ်ရာရရှိခဲ့ပါတယ်။
ဆော်ဒီရဲ့ လေကြောင်းက တိုက်ခိုက်မှုကို တုန့်ပြန်တဲ့အနေနဲ့ ဟူသီသူပုန်တွေဟာ ဆော်ဒီကို ဒုံးကျည်တွေနဲ့ ပစ်ခတ်တိုက်ခိုက်ခဲ့ပြီး ဆော်ဒီအာဏာပိုင်တွေက ပြီးခဲ့တဲ့ ၃ နှစ်အတွင်း ဟူသီတွေဟာ ဒုံးကျည်ပေါင်း ၉၀ လောက်နဲ့ ပစ်ခတ်တိုက်ခိုက်ခဲ့တယ်လို့ ပြောကြားထားပါတယ်။
Ref: Aljazeera
