ဒီဇင်ဘာ ၁၄၊ ၂၀၁၅
M-Media
– အမေရိကန်သမ္မတလောင်းနေရာယှဉ်ပြိုင်နေသူနှင့် နာမည်ကြီးစီးပွားရေးလုပ်ငန်းရှင် ဒိုနယ် ထရမ့်ပ်သည် ကမ္ဘာ့မီဒီယာခေါင်းစည်းပိုင်းတွင် တစ်ကျော့ပြန် နေရာယူလာသည်။ ဤတစ်ကြိမ်တွင်တော့ “အမေရိကန်ပြည်ထောင်စုထဲသို့ မွတ်စ်လင်မ်များဝင်ရောက်ခြင်းအား အကြွင်းမဲ့ ပိတ်ပင်လိုက်ရေး” ဟူသော သူ၏အဆိုအပေါ် တုန့်ပြန်ချက်များ ဖြစ်နေပေသည်။ ထိုစကားကို သူ၏တွစ်တာအကောင့်၌ ၂၀၁၅ ဒီဇင်ဘာ ၇ ရက်က သူကိုယ်တိုင်ရေးသားခဲ့သည်။
ကနဦးပိုင်း သမ္မတလောင်းဝင်ပြိုင်နေစဉ် “အမေရိကန်ပြည်ထောင်စုကို တစ်ကျော့ပြန် ကြီးမြတ်ဂုဏ်တက်စေမည့် အစီအမံများပြုလုပ်မည်” ဟု ထူးထူးခြားခြား ကြွေးကြော်မှုကြောင့် လူအချို့မှ ၀ိုင်းရံခဲ့သော်လည်း ယခုအခါတွင် အကြီးအကျယ် ဟာသဖြစ်နေပေပြီ။ ဥပမာ – ဇူလိုင်လတုန်းက Huffington Post မှ ထရမ့်ပ်၏မဲဆွယ်ပွဲအစီအစဉ်ကို ဖျော်ဖြေရေးကဏ္ဍမှ အားဖြည့်ကူညီပေးမည်ဖြစ်ကြောင်း ဆိုခဲ့သော်လည်း ယခုရက်သတ္တပတ်၌ ကုမ္ပဏီ၏ အယ်ဒီတာချုပ်က ထိုကိစ္စအား အလျဉ်းပြုလုပ်မည်မဟုတ်ဟု ခေါင်းကြီးပိုင်းတွင် ရေးသားလိုက်သည်။
မက္ကဆီကန် ပြောင်းရွှေ့အခြေချလာသူများ၊ ၎င်းနောက် ပြိုင်ဖက်အမျိုးသမီးကိုယ်စားလှယ်၊ ၎င်း၏နောက် ယခုအခါ မွတ်စ်လင်မ်များအပေါ် အမုန်းတရားဝါဒအခြေတည်စကား ဆိုလာရာ သူ၏ကျော်ကြားမှုဂုဏ်နှင့်တွဲပြီး သမ္မတအိုဘားမား အပါအ၀င် လူမြောက်များစွာတို့မှ စိုးရိမ်မကင်း ဖြစ်သွားစေခဲ့သည်။ သမ္မတအိုဘားမားက “အမေရိကန် မွတ်စ်လင်မ်များသည် ကျွန်ုပ်တို့၏မိတ်ဆွေများ၊ အိမ်နီးချင်းများ၊ လုပ်ဖော်ကိုင်ဖက်များ၊ အားကစားသူရဲကောင်းများ ဖြစ်ကြသည်” ဟုထောက်ပြလျက် အဆိုပါအုပ်စုများဖက်လှည့်၍ ဓားစာခံပြုလုပ်လိုနေသော ထရမ့်ပ်၏ကြိုးပမ်းမှုအပေါ် ဆန့်ကျင်ပြောထုတ်လိုက်ပါသည်။
အမှန်ပင် အမေရိကန်ပြည်ထောင်စုကို ကြီးမြတ်ဂုဏ်တက်စေခဲ့သူများအနက် အမေရိကန်မွတ်စ်လင်မ်တို့သည် စံပြအဖြစ် ပါဝင်နေပါသည်။ အောက်ပါပုဂ္ဂိုလ်ငါးဦးကို ဖျော်ဖြေရေး၊ နိုင်ငံရေးနှင့် နည်းပညာကဏ္ဍတစ်ခွင်မှ ဖော်ပြထားချက်ကို ကြည့်ရှုပါလေ။
၁။ မုဟမ္မဒ် အလီ
——————
အားကစားသမိုင်းတွင် အကြီးကျယ်ဆုံး ဟဲဗီးဝိတ်တန်း လက်ဝှေ့ကစားသမားဟောင်းအဖြစ် သူ့အား အကျယ်တ၀င့် ဖော်ပြသတ်မှတ်ထားကြသည်။ BBC မှ ရာစုနှစ်၏ထိပ်တန်းဂုဏ်ရည်ရှင်အားကစားသမား ဟု အမည်ပေးထားသည်အထိဖြစ်သည်။ ကြိုးဝိုင်းထဲမှ သူ၏ ကျွမ်းကျင်လိမ္မာမှုအရည်အသွေးသာမက ပြင်ပလောကရှိ သူ၏လူမှုလုပ်ငန်းဆောင်ရွက်ချက်များကြောင့် သူ့အား ရိုသေလေးစားတန်ဖိုးထားကြသည်။
သူသည် ၁၉၇၅ ခုနှစ်တွင် အစ္စလာမ်သာသနာ(စွန္နီ)သို့ ကူးပြောင်းသက်ဝင်သည်။ ၂၀၀၁ ခုနှစ်တွင် မိမိသာသနာနှင့်ပတ်သက်ပြီး အမေရိကန်များစွာမှ အထင်လွဲမှားနေကြောင်း အော်ပရာ ၀င်းဖရေးသို့ ပြောကြားခဲ့သည်။
“အစ္စလာမ် ဆိုတဲ့ဝေါဟာရက ငြိမ်းချမ်းရေးလို့ အဓိပ္ပာယ်ထွက်ပါတယ်။ မွတ်စ်လင်မ်ဆိုတဲ့စကားလုံးက ဖန်ဆင်းရှင်ထံ မိမိကိုယ်ကိုမာန်ချအပ်နှံခြင်းလို့ အဓိပ္ပာယ်ရပါတယ်။ ဒါပေမယ့် ပုံနှိပ်ထုတ်ဝေဖော်ပြချက်များက ကျွန်တော်တို့ကို အမုန်းတရားဝါဒီတွေလို့ ထင်မြင်သွားစေပါတယ်။ ခရစ်ယာန်တွေ၊ ဟိန္ဒူတွေ၊ လူတွေအားလုံးက ကျွန်တော့်ရဲ့ညီနောင်များပါ။ ကျွန်တော်တို့က အတွေးအမြင်နဲ့ ယုံကြည်ချက် ကွဲပြားသွားတာပဲရှိပါတယ်”။
၂။ ယာစီးန် ဘေး
—————–
သူ့အား ဂရမ်မီဂီတဆု လျာထားစာရင်းဝင် ဟစ်ပ်ဟော့ အနုပညာရှင်တစ်ဦးအဖြစ် ပို၍ လူသိများကြသည်။ အမ်မီနှင့် ရွှေကမ္ဘာလုံးဆုရှင်စာရင်းဝင်စဉ်ကလည်း သိရှိသူ မနည်းလှချေ။ ဘက်စုံပါရမီရှင် အနုပညာသည်မှာ ယခုသော် သူ၏ လူမှုရေးစွမ်းဆောင်ချက်များ၊ အလားတူ ရဲတပ်ဖွဲ့ဝင်တို့၏လူမဆန်မှုနှင့် လူ့အခွင့်အရေးဆိုင်ရာ ဆောင်ရွက်ချက်များကြောင့် ကျော်ကြားနေပေသည်။
အစ္စလာမ်သာသနာသည် အမုန်းတရားနှင့် အကြမ်းဖက်ဝါဒလောဟု ဘီလ် မဟာမှ မေးမြန်းခဲ့စဉ်က သူသည် လူအများ သတိလက်လွတ်ဖြစ်နေသော အချက်နှစ်ရပ်ကို ထောက်ပြပေးခဲ့သည်။
“ဘာသာတရားတရားတိုင်းက ထွက်ပေါ်တဲ့ အကြမ်းဖက်မှုတွေ ရှိနေကြပါတယ်။ မွတ်စ်လင်မ်နဲ့ ခရစ်ယာန်များအကြား၊ ဒီမိုကရက်နဲ့ ရီပတ်ပလစ်ကန်များအကြား၊ လူဖြူနဲ့လူမည်းအကြား၊ သွေးချင်းနဲ့သွေးဝေးအကြား မတူကွဲပြားမှုအကြောင်းကြောင့် ဖြစ်လာတာမဟုတ်ပါဘူး။ အစ္စလာမ်က ခြိမ်းခြောက်မှုမဟုတ်ပါဘူး။ ချာ့ခ်ျတွေမှာ၊ ဗလီဝတ်ကျောင်းတွေမှာ၊ လေဆိပ်တွေမှာ – နေရာတိုင်းမှာ ရူးကြောင်မူးကြောင် လူတွေ ရှိနေကြတယ် မဟုတ်လား”။
၃။ ဟူးမား အာဗေဒီးန်
———————–
အမေရိကန်နိုင်ငံရေးလောကထဲတွင် မွတ်စ်လင်မ်များ မရှိသလောက်ဖြစ်သည်။ ဥပမာအားဖြင့် မွတ်စ်လင်မ် လွှတ်တော်အမတ်နှစ်ဦးသာ ရှိနေ၏။ အမျိုးသမီးဆိုလျှင် ပို၍ပင် မရှိသလောက် ရှားပါး၏။ သမ္မတလောင်းနေရာ ယှဉ်ပြိုင်နေသူ ဟီလာရီ ကလင်တန်၏ ဒုဥက္ကဋ္ဌဖြစ်သော မွတ်စ်လင်မ်အမျိုးသမီး ဟူးမား အာဗေဒီးန်မှာ သူမ၏ ယင်းသို့အောင်မြင်မှုအတွက် ထင်ရှားကျော်ကြားရခြင်းဖြစ်သည်။ ယခုသီတင်းပတ်အတွင်း ထရမ့်ပ်မှ အမေရိကန်မွတ်စ်လင်မ်တို့အပေါ်ပေးသော မှတ်ချက်များနှင့်စပ်လျဉ်း၍ သူမက “ကျွန်မက ဂုဏ်ယူစရာ မွတ်စ်လင်မ်
တစ်ဦးပါ။ ဒါပေမယ့် ကျွန်မရဲ့ မနှစ်မြို့မှုနဲ့တူညီအောင် ကျွန်မရဲ့ယုံကြည်မှုနဲ့ ထပ်တူကျစရာ မလိုပါဘူး။ ထရမ့်ပ်က ကျွန်မတို့ရဲ့ ဥပဒေကျမ်းထဲမှာ အစွန်းရောက်လူမျိုးရေးဝါဒ သွတ်သွင်းချင်နေတာပါ” ဟု တုန့်ပြန်ပြောဆိုခဲ့သည်။ သူမ၏တွစ်တာအကောင့်တွင် အောက်ပါအတိုင်း ရေးသားထားသည်။
“အသင်ဟာ ဂုဏ်ယူစရာ အမေရိကန်တစ်ဦး၊ ဂုဏ်ယူစရာ မွတ်စ်လင်မ်တစ်ဦး ဖြစ်နိုင်ပါတယ်။ ဒီတိုင်းပြည်ကြီးကို ဂုဏ်ယူစွာနဲ့ အလုပ်အကျွေးပြုနိုင်ပါတယ်။ မာနနဲ့အစွဲဆိုတာ ဒွန်တွဲနေပါတယ်”။
၎။ ဖရီးဒ် ဇကရီယာ
——————–
Time နှင့် Newsweek International ၏ အယ်ဒီတာတစ်ဦးအဖြစ် ဆောင်ရွက်နေသည့် အိန္ဒိယနွယ်ဖွား အမေရိကန်နိုင်ငံသား ဂျာနယ်လစ် ဖရီးဒ်သည် သူ၏သက်မွေးလုပ်ငန်းကြောင့် ထင်ရှားကျော်ကြားလှသည်။ သတင်းစာဆောင်းပါးဆုရှင် ဖရီးဒ်သည် ယခုအခါ CNN ၌ နိုင်ငံရေးဆိုင်ရာ သူ၏ကိုယ်ပိုင်တင်ဆက်မှု အစီအစဉ် ပြုလုပ်နေပြီး Washington Post သတင်းစာအတွက်လည်း အပတ်စဉ်ဆောင်းပါး ရေးသားနေသည်။ သူသည်လည်း ထရမ့်ပ်၏ မွတ်စ်လင်မ်ဆန့်ကျင်ရေး မီးမွှေးချက်ကို သူ့တွစ်တာအကောင့်တွင် တုန့်ပြန်ပြောဆိုထားခဲ့သည်။
၅။ စလ်မာန် ခန်း
——————
ရံပုံငွေထိန်းသိမ်းရေးကျွမ်းကျင်သူတစ်ဦးအဖြစ် လုပ်ကိုင်နေခဲ့စဉ်က စွန့်ဦးလုပ်ငန်းရှင် အမေရိကန်မွတ်စ်လင်မ် စလ်မာန် ခန်းထံ၌ အိပ်မက်တစ်ခု ရှိခဲ့၏။ သူသည် Khan Academy ကို စတင်ထူထောင်ပြီး ထိုအိပ်မက်ကို လက်တွေ့အကောင်အထည်ဖော်နိုင်ခဲ့သည်။ ၎င်း Khan Academy သည် သင်္ချာမှ ပရိုဂရမ်အထိ ပညာရပ်အမျိုးမျိုးကို အွန်လိုင်းမှ သင်ကြားနိုင်သည့်အစီအစဉ်ဖြစ်သည်။ Time မဂ္ဂဇင်းက သူ့အား ၂၀၁၂ ခုနှစ်၏ ကမ္ဘာ့သြဇာအကြီးမားဆုံးပုဂ္ဂိုလ် ၁၀၀ စာရင်းထဲ ထည့်သွင်းဖော်ပြထားသည်။
Ref : AGENDA
5 Muslims who helped make America great
ပြန်ဆိုသူ – သြရသ ရေချမ်း
