စက်တင်ဘာ ၂၄၊ ၂၀၁၇
M-Media
– ထရမ့်အနေဖြင့် ၎င်း၏ စစ်မက်လိုလားသော မှတ်ချက်များအတွက် သတိထားရန် မြောက်ကိုရီးယားက ပြောကြားလိုက်ပြီး မိမိတို့ခေါင်းဆောင်မှာ အမေရိကန်ပြည်မကြီးကို ရှောင်လွှဲ၍မရသည့် ဒုံးကျည်ပစ်မှတ်အဖြစ် ပြုလုပ်သွားမည်ဟု သတိပေးခဲ့သည်။
မြောက်ကိုရီးယားနိုင်ငံခြားရေးဝန်ကြီး ရီယွန်ဟွန်က ယမန်နေ့ ကုလအထွေထွေညီလာခံ မိန့်ခွန်းတွင် ထိုကဲ့သို့ ပြောကြားခဲ့ခြင်း ဖြစ်သည်။
“အချိန်အတော်ကြာ ကြိုးစားရုန်းကန်လာခဲ့ရပြီးတဲ့နောက် အခုအချိန်မှာတော့ ကျွန်တော်တို့ဟာ နျူလက်နက်ပိုင် နိုင်ငံဖြစ်မယ့် နောက်ဆုံးတံခါးပေါက်ကိုရောက်ဖို့ ခြေလှမ်းအနည်းငယ်သာ လိုပါတော့တယ်” ဟု နိုင်ငံခြားရေးဝန်ကြီးက ဆိုသည်။
အင်္ဂါနေ့က ထရမ့်၏ ကုလမိန့်ခွန်းတွင် မြောက်ကိုရီးယားနိုင်ငံကို လုံးဝ ဖျက်ဆီးပစ်မည်ဟု ခြိမ်းခြောက်ခဲ့ပြီး၊ မြောက်ကိုရီးယားခေါင်းဆောင် ကင်ဂျုံအန်ကလည်း ထရမ့်မှာ စိတ်မနှံသူဖြစ်သည်ဟု ပြန်လည် တုန့်ပြန်ခဲ့သည်။
ကြာသာပတေးနေ့က မြောက်ကိုရီးယားအပေါ် အရေးယူ ပိတ်ဆို့မှုများ ထပ်မံပြုလုပ်သည့် အမိန့်တစ်ခုကို ထရမ့်က လက်မှတ်ရေးထိုးခဲ့ပြီး ထိုလုပ်ရပ်ကို တုန့်ပြန်သောအနေဖြင့် နိုင်ငံခြားရေးဝန်ကြီး ရီဟွန်ယွန်က ရန်လိုသော အုပ်စုများက ပြုလုပ်သည့် ပြင်းထန်သော ပိတ်ဆို့မှုများကြောင့် မိမိတို့၏ ရပ်တည်ချက်ကို ပြောင်းလဲရန် စဉ်စားရတော့မည်ဖြစ်ကြောင်း၊ မြောက်ကိုရီးယား၏ ရည်ရွယ်ချက်မှာ အမေရိကန်နှင့် ပုခုံးချင်းယှဉ်ရန်ဖြစ်ပြီး ထရမ့်မှာ သေလမ်းရွေးနေခြင်းဖြစ်ကြောင်း ထည့်သွင်းပြောဆိုခဲ့သည်။
မြောက်ကိုရီးယားနှင့် တောင်ကိုရီးယားတို့ကို ပိုင်းခြားထားသော စစ်မက်ကင်းစင်ဇုံ၏ မြောက်ဖက်စွန်းစွန်းတွင် ယမန်နေ့က အမေရိကန်ဗုံးကြဲလေယာဉ်များ ပျံသန်းအင်အားပြခဲ့သည်။
Ref: Aljazeera
