ဇူလိုင် ၆၊ ၂၀၁၇
M-Media
– အမေရိကန်ပြည်ထောင်စု ဗာဂျီးနီးယားပြည်နယ် ပရင့်စ်ဝီလီယံကောင်တီက အစ္စလာမ်ဘာသာဝင်တွေရဲ့ ဘာသာရေးတာဝန်တွေ ထမ်းဆောင်ဖို့အတွက် ဗလီဝတ်ကျောင်းတော်တစ်လုံးကို မကြာခင်မှာ စတင်ဆောက်လုပ်တော့မယ်လို့ သိရပါတယ်။
ကောင်တီအစိုးရက ခွင့်ပြုချက်ပေးခဲ့ပြီးတဲ့နောက် ၁၄ ဧကရှိတဲ့ မြေပေါ်မှာ ဆောက်လုပ်သွားမှာဖြစ်ပြီး ဂိန်းစ်ဗီလီနဲ့ ဘရစ္စတိုးတို့က အစ္စလာမ်ဘာသာဝင် ၂၀၀ အတွက် ရည်ရွယ်တာ ဖြစ်ပါတယ်။
ဗလီဝတ်ကျောင်းတော် ဆောက်လုပ်ရေးအတွက် အလှူငွေကောက်ခံတာ၊ ဆောက်လုပ်ရေးပါမစ်လျှောက်တာနဲ့ လုပ်ငန်းစတင်မှာတွေကြောင့် ဆောက်လုပ်ရေး ပထမဆင့်လုပ်ငန်းတွေဟာ ၁ နှစ်ကနေ ၂ နှစ်လောက်အထိ ကြာမြင့်နိုင်ပါတယ်။
“ဒါက ကျွန်တော်တို့မွတ်စလင်လူ့အဖွဲ့အစည်းကို အားတက်စေပါတယ်။ လူ့အဖွဲ့အစည်းမှာ ပါဝင်ခွင့်ရပြီး၊ သာတူညီမျှ ဆက်ဆံခံရတယ်လို့လည်း ခံစားရပါတယ်” လို့ ဂိန်းစ်ဗီလီ မွတ်စလင်အသင်းရဲ့ ဘုတ်အဖွဲ့ဝင်ဖြစ်သူ ဒေါက်တာ ဆယဒ် မူရ်တာဇာက ပြောကြားခဲ့ပါတယ်။
လက်ရှိ ဂိန်းစ်ဗီလီက မွတ်စလင်တွေဟာ ၀တ်ပြုရာနေရာမရှိတာကြောင့် သောကြာနေ့ စုပေါင်းဝတ်ပြုမှုအတွက် ဟော်တယ် အစည်းအဝေးခန်းမကို ငှားရမ်းအသုံးပြုရသလို၊ ကလေးတွေကို အစ္စလာမ့်အခြေခံဓမ္မတွေ သင်ကြားပေးဖို့အတွက် အစိုးရစာသင်ကျောင်းကို အသုံးပြုနေရပါတယ်။
ဗလီဝတ်ကျောင်းတော်ကို ဘေးနှစ်ဖက်မှာ အဆောက်အဦးနှစ်ခုထားပြီး အလယ်က ၀တ်ပြုဖို့ ဟောခန်းမအဖြစ် တည်ဆောက်သွားမှာပါ။ ပထမအဆင့်အနေနဲ့ လူ ၁၅၀ ကနေ ၂၀၀ ဆန့်တဲ့ ဟောခန်းမတစ်ခုနဲ့ တနင်္ဂနွေနေ သင်တန်းအတွက် စာသင်ခန်း ၁၀ ခန်းကို အရင်ဆုံး တည်ဆောက်သွားမှာဖြစ်ပြီး စီမံကိန်းပြီးစီးဖို့အတွက် ၅ နှစ်ကနေ ၈ နှစ်အထိ ကြာနိုင်တယ်လို့ မူရ်တာဇာက ပြောကြားခဲ့ပါတယ်။
ဒီဗလီဝတ်ကျောင်းတော်ကို လှုမှုစင်တာတစ်ခုအနေနဲ့လည်း အသုံးပြုသွားမှာဖြစ်ပါတယ်။
မူရ်တာဇာကတော့ လာမယ့် ၅ နှစ်ကနေ ၁၀ နှစ်အတွင်း ဗလီဝတ်ကျောင်းတော် အသင်းဝင်အရေအတွက်ဟာ တိုးတက်လာမယ်လို့ မျှော်လင့်နေပါတယ်။
Ref: Fauquier.com
