မေ ၁၊ ၂၀၁၆
M-Media
– ဘောလ်တစ်ပင်လယ်ပြင်ပေါ်မှာ ပျံသန်းနေတဲ့ အမေရိကန် ထောက်လှမ်းရေးလေယာဉ်ကို မိမိတို့ ထိပ်တိုက် ရင်ဆိုင်ခဲ့တာဟာ မှန်ကန်တယ်လို့ ရုရှားက သောကြာနေ့မှာ ပြောကြားလိုက်ပါတယ်။
ယခုတစ်ပတ်အတွင်းမှာဖြစ်ပျက်ခဲ့တဲ့ အဲဒီအဖြစ်အပျက်မှာ ရုရှားတိုက်လေယာဉ်ဟာ အမေရိကန်ရဲ့ အဲဒီ ထောက်လှမ်းရေးလေယာဉ်အပေါ်မှာ ခေါက်တုံ့ခေါက်ပြန် လှည့်ပတ်ပျံဝဲခဲ့တာဖြစ်ပြီး ပင်တဂွန်ကတော့ ဒီလုပ်ရပ်ဟာ အန္တရာယ်ရှိပြီး ကျင့်ဝတ်ဖောက်ဖျက်တဲ့လုပ်ရပ်ဖြစ်တယ်လို့ ပြောကြားခဲ့ပါတယ်။
ရုရှားက အမေရိကန်လေယာဉ်ဟာ ဘယ်သူဘယ်ဝါလဲဆိုတာ သိရှိဖို့ အချက်ပြစနစ်ကို ပိတ်ထားခဲ့တာဖြစ်တယ်လို့ တုန့်ပြန်ပြောကြားခဲ့ပါတယ်။ အမေရိကန်နဲ့ ရုရှားတိုက်လေယာဉ်တွေ ဘောလ်တစ်ပင်လယ်ထဲမှာ ထိပ်တိုက်တွေ့ဆုံမှုဟာ ဒီတစ်ကြိမ်ဆို ဒီလအတွင်း ၂ ကြိမ်မြောက်ရှိပြီ ဖြစ်ပါတယ်။
အမေရိကန်ကတော့ ရုရှားတိုက်လေယာဉ်တွေရဲ့ ပျံသန်းမှုဟာ ရန်လိုတဲ့အနေအထား ရှိနေတယ်လို့ စွပ်စွဲပြောဆိုထားပါတယ်။ ရုရှားဘက်ကတော့ သူတို့ရဲ့လုပ်ရပ်တွေဟာ မှတ်ကန်တယ်လို့ ပြောကြားခဲ့ပါတယ်။
“ရုရှားပိုင် လေယာဉ်အားလုံးရဲ့ပျံသန်းမှုဟာ လေကြောင်းအသုံးပြုမှုဆိုင်ရာ နိုင်ငံတကာစည်းမျဉ်းစည်းကမ်းတွေနဲ့
ကိုက်ညီပါတယ်။ အမေရိကန်လေတပ်မှာ လုပ်ရမှာ နှစ်ခုပဲရှိပါတယ်၊ တစ်ခုက ကျွန်တော်တို့နယ်စပ်အနီးတစ်ဝိုက်မှာ မပျံသန်းဖုိ့နဲ့ နောက်တစ်ခုက ဘယ်သူဘယ်ဝါလဲဆိုတာ သိနိုင်ဖို့အတွက် ရေဒီယိုအချက်ပြစနစ် ဖွင့်ထားပေးဖို့ပါပဲ”” လို့ ရုရှားကာကွယ်ရေးဝန်ကြီးဌာနက ထုတ်ပြန်တဲ့ ကြေညာချက်မှာ ဖော်ပြထားပါတယ်။
နောက်ပြီး အမေရိကန်တိုက်လေယာဉ်တွေဟာ ရေဒီယိုအချက်ပြစနစ်ကိုပိတ်ပြီး ရုရှားနယ်စပ်နားချဉ်းကပ်ဖို့ အမြဲလိုလိုကြိုးစားလေ့ရှိတယ်လို့လည်း ရုရှားက ပြောကြားခဲ့ပါတယ်။ အမေရိကန်တိုက်လေယာဉ်တွေနဲ့ ရုရှားတိုက်လေယာဉ်တွေ ထိပ်တိုက်တွေ့ဆုံမှုဟာ ပြီးခဲ့ ၁၈ လအတွင်း ဘောလ်တစ်ပင်လယ်နဲ့ ယူကေရေပိုင်နက်အနီးတွေမှာလည်း ထပ်ခါတလဲလဲ ဖြစ်ပေါ်ခဲ့ပါတယ်။
Ref: BBC
