Tag: US

သြဂုတ် ၁၀၊ ၂၀၁၅
M-Media

– လက်နက်မဲ့ လူမည်းလူငယ် မိုက်ကယ်ဘရောင်းအား ရဲတပ်ဖွဲ့က ပစ်သတ်မှု တစ်နှစ်ပြည့်မြောက်သည့် အထိမ်းအမှတ်အဖြစ် အမေရိကန်ပြည်ထောင်စု မစ်ဇူရီပြည်နယ်တွင် ပြုလုပ်သော ဆန္ဒပြမှုအတွင်း ဆန္ဒပြသူများနှင့် ရဲတပ်ဖွဲ့တို့ ထိပ်တိုက်တွေ့ဆုံခဲ့ပြီး ပစ်ခတ်မှုဖြစ်ပွားခဲ့သောကြောင့် လူ ၁ ဦး ဒဏ်ရာ ရရှိခဲ့သည်ဟု သိရသည်။

ဖာဂူဆန်မြို့ရှိ အခင်းဖြစ်ပွားခဲ့သော နေရာတွင် ဆန္ဒပြသူများက စုပြုံပိတ်ဆို့ကာ လမ်းတစ်လျှောက်ရှိ ပြတင်းပေါက်များအား ရိုက်ခွဲဖျက်ဆီးခဲ့ကြပြီး အဆိုပါလူအုပ်ကြီးအား ရဲတပ်ဖွဲ့က လူစုခွဲရန် ကြိုးစားစဉ် ပစ်ခတ်မှု ဖြစ်ပွားခဲ့ခြင်းဖြစ်သည်။

မိုက်ကယ်ဘရောင်းကွယ်လွန်မှု ၁ နှစ်ပြည့်အထိမ်းအမှတ်အဖြစ် ဆောင်ရွက်သည့် အဆိုပါ ဆန္ဒပြပွဲကို ယမန်နေ့က ၀မ်းနည်းခြင်းအထိမ်းအမှတ် တစ်မိနစ်တာ ငြိမ်သက်ပြီးနောက် ငြိမ်းချမ်းစွာ စီတန်းလမ်းလျှောက်ခြင်းဖြင် စတင်ခဲ့ခြင်းဖြစ်သည်။

နောက်ပိုင်းတွင် ဆန္ဒပြသူများမှာ ဖျက်ဆီးမှုများ ပြုလုပ်ခဲ့ပြီး စိန့်လူးဝစ်ကောင်တီ ရဲတပ်ဖွဲ့က ထုတ်ပြန်သောကြေညာချက်၌ ၎င်းတို့မှာ အဆိုပါ လူအုပ်စုကြီးအား ဖြိုခွဲရန်အတွက် အမျိုးသားတစ်ဦးအား ဖမ်းဆီးရန်ကြိုးစားစဉ် ၎င်းက စတင်ပစ်ခတ်မှုကြောင့် အပြန်အလှန် ပစ်ခတ်မှုများ ဖြစ်ပွားခဲ့ခြင်းဖြစ်သည်ဟု ဆိုသည်။

သေနတ်ဖြင့် ပစ်ခတ်ခံရသော အဆိုပါအမျိုးသားကို ဆေးရုံသို့ ပို့ဆောင်ထားပြီး စိုးရိမ်ရသည့် အနေအထားတွင် ရှိနေသည်။

ရဲတပ်ဖွဲ့မှာ အချက်များစွာ ပစ်ခတ်ခဲ့ပြီး အစောပိုင်းက လူ ၂ ဦး ဒဏ်ရာရသည်ဟု သတင်းများ ထွက်ပေါ်လာခဲ့သော်လည်း ရဲတပ်ဖွဲ့က ငြင်းဆိုခဲ့ကာ ဒဏ်ရာရရှိသူမှာ တစ်ဦးတည်းသာဖြစ်သည်ဟု ကြေညာချက်တွင် ထည့်သွင်းဖော်ပြထားသည်။

Ref: Aljazeera

သြဂုတ် ၆၊ ၂၀၁၅
M-Media

– အီရန်နျူသဘောတူညီချက်အား အထက်လွှတ်တော်က ပယ်ချယ်ပါက အရှေ့အလယ်ပိုင်းတွင် စစ်ပွဲတစ်ခု ဖြစ်လာနိုင်သည်ဟု အမေရိကန်သမ္မတ ဘာရက်အိုဘားမားက သတိပေးပြောကြားလိုက်သည်။

ရီပက်ဘလစ်ကန်ဦးဆောင်သည့် အထက်လွှတ်တော်အနေဖြင့် အဆိုပါ သမိုင်းဝင်သဘောတူညီချက်အား ပယ်ချရေး တိုက်တွန်းရန် အမေရိကန်ဂျူးများကို လှုံ့ဆော်သည့် လှုပ်ရှားမှုကို အစ္စရေးဝန်ကြီးချုပ် နေတန်ယာဟုက ယမန်နေ့တွင် စတင်ခဲ့ပြီးနောက် ၀ါရှင်တန်ရှိ တက္ကသိုလ်တစ်ခုတွင် ပြုလုပ်သော မိန့်ခွန်း၌ အိုဘားမားက ထိုကဲ့သို့ ပြောကြားခဲ့ခြင်းဖြစ်သည်။

“ဒါဟာ အင်မတန်ကောင်းတဲ့ သဘောတူညီချက်ပါ။ အစ္စရေးအစိုးရကလွဲလို့ တစ်ကမ္ဘာလုံးက နိုင်ငံတိုင်းဟာ ဒါကို ထောက်ခံခဲ့ကြပါတယ်။ ၀န်ကြီးချုပ်နေတန်ယာဟုရဲ့ တော်တော်လေး သဘောမတူညီမှုကို ကျွန်တော် အသိအမှတ်ပြုပါတယ်။ သူ့ရဲ့ ရိုးသားမှုကို ကျွန်တော် သံသယမရှိပါဘူး။ ဒါပေမယ့် သူ မှားနေတယ်လို့တော့ ကျွန်တော်ယုံကြည်ပါတယ်” ဟု အိုဘားမားက ပြောကြားခဲ့သည်။

အဆိုပါ သဘောတူညီချက်အရ အီရန်မှာ ၎င်းတို့၏ နျူကလီးယားအစီအစဉ်ကို ရပ်တန့်ပေးရမည်ဖြစ်ပြီး အပြန်အလှန်အားဖြင့် အီရန်အပေါ်ပြုလုပ်ထားသည့် စီးပွားရေး ပိတ်ဆို့မှုများကိုလည်း အနောက်နိုင်ငံများက ဖယ်ရှားပေးရမည်ဖြစ်သည်။

အိုဘားမားကမူ ဇူလိုင် ၁၄ ရက်နေ့က ရရှိခဲ့သော ထိုသဘောတူညီချက်အား ပယ်ချပါက အီရန်၏ နျူဗုံးဆီသို့သွားရာလမ်းကြောင်းမှာ အရှိန်မြင့်လာမည်ဖြစ်ပြီး၊ အီရန်အပေါ် ပိတ်ဆို့မှုများ ဖယ်ရှားပေးမည်ဟုသည့် အချက်များကို လိုက်နာရန် ငြင်းဆိုပါကလည်း ကမ္ဘာတစ်ဝှမ်းတွင် အမေရိကန်အပေါ် ယုံကြည်မှုမှာ ဆိုးဆိုးရွားရွား ထိခိုက်သွားမည်ဟု ထည့်သွင်းပြောကြားခဲ့သည်။

ထို့ပြင် ထိုသဘောတူညီချက်မှာ ခက်ခက်ခဲခဲဖြင့် ရရှိခဲ့သည့် သံတမန်ရေး ဖြေရှင်းချက်ဖြစ်ပြီး တစ်ကမ္ဘာလုံးနီးနီးက တစ်ညီတစ်ညွတ်တည်း ထောက်ခံထားသော အဆိုပါသဘောတူညီချက်ကို ပယ်ချပါက အခြားရွေးချယ်စရာ စစ်ရေးအရေးယူမှုမှာ နောက်ထပ် အထိနာစရာဖြစ်မည်ဟုလည်း အိုဘားမားက ဆိုသည်။

“အီရတ်စစ်ပွဲကို လက်မခံကြတဲ့ လူတွေတော်တော်များများကပဲ အီရန် နျူသဘောတူညီချက်ကို ဆန့်ကျင်နေကြပါတယ်” ဟု အိုဘားမားကဆိုပြီး အီရန်၏ ကာကွယ်ရေး အသုံးစားရိတ်မှာ အမေရိကန်ပင်လယ်ကွေ့နိုင်ငံများ၏ ကာကွယ်ရေးအသုံးစာရိတ်များထက် ၈ ဆ နည်းပါးသည်ဟုလည်း ထောက်ပြခဲ့သည်။

Ref: Aljazeera

သြဂုတ် ၁၊ ၂၀၁၅
M-Media

– မကြာခဏ ပြဿနာများနှင့် ရင်ဆိုင်နေရသည့် F35B တိုက်လေယာဉ်များထဲမှ ၁၀ စင်းမှာ တိုက်ပွဲဝင်ရန် အသင့်ဖြစ်နေသည်ဟု အမေရိကန်မရိန်းတပ်ဖွဲ့မှ ပြောကြားလိုက်သည်။

အဆိုပါ တိုက်လေယာဉ်များမှာ မရိန်းတပ်ဖွဲ့၏ ကိုယ်ပိုင် တိုက်လေယာဉ်များဖြစ်ပြီး စစ်သင်္ဘောနှင့် လေယာဉ်တင်သင်္ဘောများမှ ပျံတက်နိုင်ကာ ရဟတ်ယာဉ်ကဲ့သို့ ဆင်းသက်နိုင်သည့် လေယာဉ်မျိုး ဖြစ်သည်။

ထိုလေယာဉ်များ အဆင်သင့်ဖြစ်ကြောင်းကို ယမန်နေ့က ကြေညာခဲ့ခြင်းဖြစ်ပြီး ကာကွယ်ရေးဝန်ကြီးဌာန အကြီးဆုံး လက်နက်အစီအစဉ်အတွက် အဓိက သမိုင်းမှတ်တိုင်လည်း ဖြစ်သည်ဟု ပင်တဂွန်က ပြောကြားခဲ့သည်။ ထိုအစီအစဉ်အတွက် ကန်ဒေါ်လာ ဘီလီယံ ၄၀၀ နီးပါး ကုန်ကျခဲ့ပြီး လွန်ခဲ့သည့် ၁၅ နှစ်က စတင်ခဲ့ခြင်း ဖြစ်သည်။

ထို့ပြင် အသံထက်မြန်သော အမြန်နှုန်းဖြင့် ပျံသန်းနိုင်သည့် F-35 ၏ ကနဦး စစ်ဆင်နိုင်စွမ်းရှိသော ပထမဆုံး စစ်ဘက်ဌာနခွဲအဖြစ် မရိန်းတပ်ဖွဲ့က ကြေညာနိုင်ခဲ့ခြင်းလည်း ဖြစ်သည်။ မရိန်းတပ်ဖွဲ့မှာ F-35 တိုက်လေယာဉ်များ၏ B မော်ဒယ်နှင့် C မော်ဒယ် စုစုပေါင်း အစင်း ၄၂၀ ကို ၀ယ်ယူရန်လည်း စီစဉ်ထားသည်။

ပထမဆုံး F-35B လေယာဉ်အုပ်ကို ၂၀၁၇ ခုနှစ် ဇန်န၀ါရီတွင် ဂျပန်နိုင်ငံ အီဝါကူနီသို့ စေလွှတ်ရန် မရိန်းတပ်ဖွဲ့က စီစဉ်ထားသည်။ သို့သော်လည်း အဆိုပါ တိုက်လေယာဉ်များမှာ ကမ္ဘာပေါ်ရှိ မည်သည့်နေရာ၌မဆို ဖြစ်ပွားသော ပြဿနာများကို တုန့်ပြန်နိုင်သည်ဟု မရိန်းတပ်ဖွဲ့က ထည့်သွင်းပြောကြားခဲ့သည်။

လွန်ခဲ့သည့် နှစ်များအတွင်း အဆိုပါ တိုက်လေယာဉ်များမှာ ပြန်လည်ပြင်ဆင်မှုနှင့် နှောင့်နှေးမှု မြောက်များစွာ ရှိခဲ့သည်။

Ref: RT