ဇန်နဝါရီ ၂၂၊ ၂၀၂၀
M-Media
-အမည်မသိ အဆုတ်ရောင်ရောဂါကူးစက်မှု အရေအတွက်ဟာ ၄၄၀ အထိ မြင့်တက်လာခဲ့ပြီး သန္ဓေပြောင်းကာ ပိုမိုကူးစက်နိုင်တယ်လို့ တရုတ်အာဏာပိုင်တွေက ဒီကနေ့မှာ ပြောကြားလိုက်ပါတယ်။
နိုင်ငံအလယ်ပိုင်း ဝူဟန်မြို့ကနေ ပြီးခဲ့တဲ့နှစ်နှောင်းပိုင်းက စတင်ပြန့်နှံ့တဲ့ အဲဒီရောဂါပိုးဟာ အခုအချိန်မှာ ပြည်နယ် ၁၃ ခုကို ရောက်ရှိသွားခဲ့ပြီး သေဆုံးသူအရေအတွက်ကလည်း ၉ အဦးအထိ ရှိလာပါတယ်။
တရုတ် အမျိုးသားကျန်းမာရေးကော်မရှင်ရဲ့ တာဝန်ရှိသူ လီဘင်က ဒီရောဂါဟာ အသက်ရှုလမ်းကြောင်းကနေတစ်ဆင့် ကူးစက်တာဖြစ်ပြီး သန္ဓေပြောင်းကာ ပိုမိုပြန့်နှံ့နိုင်တယ်လို့ ဒီကနေ့မနက်ပိုင်းကပြုလုပ်တဲ့ သတင်းစာရှင်းလင်းပွဲမှာ ပြောကြားခဲ့ပါတယ်။ ရောဂါဟာ လူအချင်းချင်း ကူးစက်နိုင်တယ်လို့လည်း တရုတ်က မနေ့မှာ ထုတ်ပြန်ခဲ့ပါတယ်။
မကြာသေးခင်က တရုတ်နိုင်ငံကနေ ပြန်လာတဲ့ နိုင်ငံသားတစ်ဦးမှာ ဒီရောဂါတွေ့ခဲ့ရတယ်လို့ အမေရိကန်က မနေ့မှာ အတည်ပြုခဲ့ပြီး ထိုင်း၊ ဂျပန်နဲ့ တောင်ကိုရီးယားတို့နောက်ပိုင်း ရောဂါရောက်ရှိတဲ့ စတုတ္ထမြောက်နိုင်ငံ ဖြစ်လာပါတယ်။
တရုတ်ရဲ့ ပိုင်နက်တစ်ခုဖြစ်ပြီး ကိုယ်ပိုင်အုပ်ချုပ်ခွင့်ရထားတဲ့ မကာအိုကလည်း ရောဂါကူးစက်သူတစ်ဦး တွေ့ရှိရတယ်လို့ မနေ့မှာ ထုတ်ပြန်ခဲ့ပါတယ်။ ကာစီနိုလောင်းကစား၀ိုင်းတွေကို တရားဝင်ဖွင့်လှစ်ထားတဲ့ မကာအိုဟာ တရုတ်ခရီးသွားတွေ အသွားများတဲ့ နေရာလည်း ဖြစ်ပါတယ်။
ကမ္ဘာ့ကျန်းမာရေးအဖွဲ့ကလည်း ဒီကိစ္စနဲ့ပတ်သက်လို့ ဒီကနေ့နှောင်းပိုင်းမှာ အရေးပေါ်အစည်းအဝေး ကျင်းပဖို့ ရှိနေပါတယ်။
တရုတ်က အမည်မသိအဆုတ်ရောင်ရောဂါကို လွန်ခဲ့တဲ့ ၁၀ နှစ်ကျော်အရင်က ပြန့်နှံ့ခဲ့တဲ့ SARS ရောဂါအမျိုးအစားအဖြစ် သတ်မှတ်ထားပြီး ထိန်းချုပ်နိုင်ဖို့ လုပ်ဆောင်နေပါတယ်။
Ref: Aljazeera
