ရိုဟင်ဂျာဒုက္ခသည်များအား လူမနေသည့်ကျွန်းသို့ ပို့မည့်အစီအစဉ်ကို ဘင်္ဂလားဒေ့ရ်ှရှေ့ဆက်

ဒီဇင်ဘာ ၆၊ ၂၀၁၇
M-Media

ရိုဟင်ဂျာဒုက္ခသည်များကို ထားမည့် သန်ဂါချာကျွန်း မြင်ကွင်း

– မြန်မာနိုင်ငံက အိုးအိမ်စွန့်ခွာ ထွက်ပြေးလာရတဲ့ ရိုဟင်ဂျာဒုက္ခသည်တွေကို ဘင်္ဂလားပင်လယ်အော်က ကျွန်းတစ်ကျွန်းမှာ သွားထားမယ့် အငြင်းပွားဖွယ် အစီအစဉ်ကို ဆက်လက်ဆောင်ရွက်တဲ့အနေနဲ့ အဲဒီကျွန်းမှာ မကြာခင် အဆောက်အဦးတွေ သွားရောက်ဆောက်လုပ်တော့မယ်လို့ ဘင်္ဂလားဒေ့ရ်ှက ကြေငြာလိုက်ပါတယ်။

ကန်ဒေါ်လာ ၂၇၈ သန်း ကုန်ကျမယ့် ဒီအစီအစဉ်နဲ့ပတ်သက်ပြီး ဘင်္ဂလားဒေ့ရှ် စီမံကိန်းဝန်ကြီး မွတ်စ်တာဖာကမားလ်က ထုတ်ပြန်ရာမှာ ဘင်္ဂလားဒေ့ရ်ှရောက်နေတဲ့ တစ်သန်းလောက်ရှိတဲ့ ရိုဟင်ဂျာတွေထဲက တစ်သိန်းခန့်ကို ၂၀၁၉ ခုနှစ် နိုဝင်ဘာမှာ သန်ဂါချာဆိုတဲ့ အဲဒီကျွန်းမှာ ပထမဆုံး နေရာချပေးသွားမယ်လို့ ဆိုပါတယ်။

မြန်မာနိုင်ငံမှာ ညှင်းပမ်းနှိပ်စက်မှုတွေကြောင့် အရင်က ဘင်္ဂလားဒေ့ရ်ှဖက်ကို ရိုဟင်ဂျာ ဒုက္ခသည ၃ သိန်းလောက် ရောက်ရှိနေပြီး သြဂုတ်လနှောင်းပိုင်းက စတင်ခဲ့တဲ့ ရခိုင်ပြည်နယ်မြောက်ပိုင်းက မတည်ငြိမ်မှုတွေကြောင့် နောက်ထပ် ၆ သိန်းကျော်လောက် ထပ်မံထွက်ပြေးခဲ့ရတာပါ။

ရိုဟင်ဂျာအရပ်သားတွေအပေါ် ညှင်းပမ်း၊ နှိပ်စက်၊ သတ်ဖြတ်မှုတွေ ရှိတယ်ဆိုတဲ့ နိုင်ငံတကာရဲ့ စွဲချက်တွေကို မြန်မာအစိုးရနဲ့ စစ်တပ်တို့က ငြင်းဆိုထားပါတယ်။

ဘင်္ဂလားဒေ့ရ်ှက ရိုဟင်ဂျာဒုက္ခသည်တွေကို လက်ခံထားတဲ့အတွက် နိုင်ငံတကာက ချီးကျူးမှုတွေ ရှိနေပေမယ့် အမြဲတမ်း ရေမြုပ်လေ့ရှိတဲ့ ကျွန်းတစ်ကျွန်းမှာ သွားထားဖို့ အစီအစဉ်ကိုတော့ ကန့်ကွက်မှုတွေ ရှိနေပါတယ်။

ဒီအစီအစဉ်ကို နိုဝင်ဘာ ၂၈ ရက်နေ့မှာ ဘင်္ဂလားဒေ့ရ်ှဝန်ကြီးချုပ် ရှိခ်ဟာဆီနာက အတည်ပြုခဲ့တာဖြစ်ပြီး လူ့အခွင့်အရေးအဖွဲ့ Amnesty International က တော်တော်လေး မှားယွင်းတဲ့ ဆုံးဖြတ်ချက်လို့ ပြောကြားခဲ့ပါတယ်။

သန်ဂါချာကျွန်းဟာ ဧက ၇၄၀၀၀ လောက် ကျယ်ဝန်းပြီး ကျွန်းမကြီးနဲ့ ၃၇ မိုင်ဝေးပါတယ်။ လက်ရှိမှာ လူသူနေထိုင်ခြင်းမရှိဘဲ အမြဲတမ်းလိုလို ရေကြီးရေလျှံလေ့ရှိတဲ့ နေရာပါ။

ဝေဖန်မှုတွေရှိတာကြောင့် ဘင်္ဂလာဒေ့ရ်ှရေတပ်က လေ့လာမှုတစ်ခု ပြုလုပ်ခဲ့ပြီး ဒီကျွန်းကို ပြန်လည် ပြုပြင်တာမျိုးလုပ်ရင် လူနေထိုင်လို့ရမယ်လို့ ပြောကြားခဲ့ပါတယ်။

လက်ရှိမှာတော့ ဘင်္ဂလားဒေ့ရ်ှအစိုးရဟာ ဒီနေရာမှာ တန်းလျား ၁၅၀၀ နီးပါးနဲ့၊ ကယ်ဆယ်ရေးစခန်း ၁၂၀ လောက် ဆောက်လုပ်ဖို့ စီစဉ်ထားပါတယ်။

ဘင်္ဂလားဒေ့ရ်ှဟာ မြန်မာနဲ့ကပ်နေတဲ့ နယ်စပ်က ကူတူပါလောင် ဒုက္ခသည်စခန်းမှာ ဧက ၃၀၀၀ လောက်ကျယ်တဲ့ ဒုက္ခသည်စခန်းသစ်တစ်ခုကိုလညး ဆောက်လုပ်နေပါတယ်။

Ref: CNN