တီဘီကာကွယ်ဆေးကို COVID-19 ကုသရာတွင် စမ်းသပ်အသုံးပြုမည်

မတ် ၃၁၊ ၂၀၂၀
M-Media

-တီဘီရောဂါ ကာကွယ်ဆေး Bacillus Calmette-Guerin (BCG) ကို ကိုရိုနာဗိုင်းရပ်စ် တိုက်ဖျက်ရေး အလားအလာရှိတဲ့ဆေးအဖြစ် သတ်မှတ်ကာ ဩစတေးလျသိပ္ပံပညာရှင်တွေက ဧပြီလ ၆ ရက်နေ့မှာ စတင် စမ်းသပ်တော့မှာ ဖြစ်ပါတယ်။

“ဘယ်ဆေးကကောင်းတယ်၊ ဘယ်ဆေးကတော့ဖြင့် ဆိုးတယ်ဆိုတာကို ၃ လလောက်အတွင်း သိရမယ်လို့ ကျွန်တော် မျှော်လင့်ပါတယ်။ ဆေးစမ်းသပ်မှုပိုင်းမှာ ​တော်တော်မြန်မြန်ဆန်ဆန်ကို ဆောင်ရွက်နေတာပါ” လို့ ဩစတေးလျအမျိုးသားတက္ကသိုလ် မျိုးရိုးဗီဇပညာရှင် ဂေတန် ဘာရ်ဂီယိုက ပြောကြားခဲ့ပါတယ်။

ကမ္ဘာတစ်ဝှမ်း လူ ၇ သိန်းကျော်ကူးစက်နေပြီး၊ ၄ သောင်းနီးပါး သေဆုံးလာတဲ့ COVID-19 ကုသဆေးနဲ့ ကာကွယ်ဆေး ရရှိဖို့အတွက် နိုင်ငံတကာသိပ္ပံပညာရှင်တွေဟာ အရင်တုန်းကထက်ပိုတဲ့ ကြိုးစားအားထုတ်မှုတွေ လုပ်ဆောင်နေပြီး၊ ဇွန်လနှောင်းပိုင်းလောက်ရောက်ရင် အဆင်သင့်ဖြစ်မယ်လို့ ခန့်မှန်းထားပါတယ်။

ဩစတေးလျနိုင်ငံ မဲလ်ဘုန်းမြို့က သုသေသနပညာရှင်တွေကတော့ လာမယ့်တစ်ပတ်ကနေစပြီး BCG ​ဆေးကို ဆရာဝန်နဲ့ သူနာပြုတွေအပါအဝင် ကျန်းမာရေးဝန်ထမ်း ၄၀၀၀ လောက်မှာ စတင်စမ်းသပ်မှာဖြစ်ပါတယ်။ စမ်းသပ်မှုမှာပါဝင်သူတွေဟာ BCG ဆေး၊ ဒါမှမဟုတ် တုပ်ကွေးပျောက်ဆေး၊ ဒါမှမဟုတ် ဆေးခုစလုံးပေါင်းစပ်ထားတာတွေ တစ်ခုခု ထိုးခံရမှာဖြစ်ပြီး ခန္ဓာကိုယ်အတွင်း ကိုယ်ခံအားပြောင်းအလဲကို သု​တေသနပညာရှင်တွေက စောင့်ကြည့်မှာဖြစ်ပါတယ်။

“အလုပ်ဖြစ်မယ်လို့ထင်လို့ ဒါကို ကျွန်တော်တို့ စမ်းသပ်တာပါ။ စမ်းသပ်မှုမှာ ဘာဖြစ်လာမလဲဆိုတာကိုပဲ ကျွန်တော်တို့ စောင့်ကြည့်ရပါမယ်” လို့ ပရော်ဖက်ဆာ ​နီဂဲလ် ကာတစ်က ပြောကြားခဲ့ပါတယ်။

ဒီကထွက်လာတဲ့ရလဒ်ကိုကြည့်ပြီး COVID-19 ရောဂါ ကူးစက်နေသူတွေမှာ ထပ်မံစမ်းသပ်မှာ ဖြစ်ပါတယ်။ ဒါပေ့မယ့် ရလဒ်ဟာ စက်တင်ဘာလောက်မှ သိရဖို့ ရှိပါတယ်။

တီဘီရောဂါ ​တိုက်ဖျက်ဖို့အတွက် ထုတ်လုပ်ထားတဲ့ BCG ဆေးကို ပြီးခဲ့တဲ့ ၁၀ နှစ်အတွင်း ကမ္ဘာတစ်ဝှမ်းက ကျောင်းသားကျောင်းသူပေါင်း သန်း ၁၃၀ လောက်ကို ထိုးနှံထားပြီး ဖြစ်ပါတယ်။ ဆေးဟာ ကလေးငယ်တွေရဲ့ ကိုယ်ခံစွမ်းအားကို ပိုမိုအားကောင်းစေပြီး၊ တိုက်ခိုက်စွမ်းအားမြင့်တဲ့ ရောဂါပိုးတွေကို ခံနိုင်ရည်ရှိအောင် ဆောင်ရွက်ပေးတယ်ဆိုတာကို တွေ့ခဲ့ရပါတယ်။

အီဘိုလာကုသရာမှာ အသုံးပြုတဲ့ remdesivir ဆေး၊ ကလိုရိုကွင်း၊ AIDS နဲ့ ငှက်ဖျားတိုက်ဖျက်ဆေးတွေကို ကမ္ဘာတစ်ဝှမ်း ကျန်းမာရေးပညာရှင်တွေက COVID-19 ကုသရာမှာ အသုံးပြုနေကြပါတယ်။

Ref: Asia Times