ဇွန်လ-၈၊ ၂၀၁၃
M-Media
သတင်း-သန့်သန့်
ရန်ကုန် ။ ။ ယခုလို မိုးရာသီကာလတွင် မသန့်ရှင်းသောရေများထိတွေ့မှုကြောင့် အရေပြားဆိုင်ရာပြဿနာများ ဖြစ်လေ့ရှိသဖြင့် ဂရုပြုသင့်ကြောင်း ကျန်းမာရေးဆရာဝန်များမှ သတိပေးပြောကြားလာပါတယ်။
မိုးရာသီကာလ မသန့်ရှင်းသောရေများကြောင့် အရေပြားဆိုင်ရာ ပြဿနာများ ဂရုပြုသင့်ကြောင်းကို ”မိုးသည်းရင် ရေမြောင်းတွေရေလျှံတာက ဖြစ်လေ့ရှိတဲ့ ရန်ကုန်ရဲ့ အစဉ်အလာလို ဖြစ်နေတယ်။ အဲဒီရေတွေထဲ ဖြတ်သန်းသွားလာပြီးရင် အရေပြားတွေယားယံတာ၊ ရှိပြီးသားဒဏ်ရာတွေ ရင်းတာ၊ တော်တော်နဲ့အနာမကျက်တာတွေ ဖြစ်တတ်ကြတယ်။ တစ်ချို့တွေဆို ရေကြည်ဖုတွေထလာတာ၊ အစက်လေးတွေပေါ်လာတာအထိ ဖြစ်တတ်ကြတယ်။ ကောင်းတာကတော့ မသန့်တဲ့ရေတွေနဲ့ထိတွေ့ပြီးရင် ရေ၊ ဆပ်ပြာနဲ့ ပြန်ပြီးဆေးကြောသင့်ပါတယ်။ ယားယံနေတယ်ဆိုရင်တော့ အရက်ပြန်လေးနဲ့ပွတ်ပေးနိုင်ပါတယ်။ လုံးဝမသက်သာဘူးဆိုရင်တော့ ဆရာဝန်နဲ့ပြသင့်ပါတယ်”ဟု မြောက်ဒဂုံမှ အထွေထွေရောဂါကု ဆရာဝန်တစ်ဦးက ပြောပါတယ်။
ရန်ကုန်မြို့လယ်ရှိအစိုးရရုံးဌာနတစ်ခုတွင် တာဝန်ထမ်းဆောင်နေသူ ကိုကျော်ဦးက ”ရုံးတက်ရုံးဆင်းချိန် မိုးကောင်းရင် မြောင်းရေလျှံတော့ လမ်းပေါ်မှာရေအပြည့်ပဲ။ အဲဒီရေတွေထဲ ဖြတ်သန်းသွားလာပြီးရင် ရုံးရောက်ရောက်၊ အိမ်ပဲပြန်ရောက်ရောက် ရေနဲ့ဆေး၊ ဆပ်ပြာနဲ့တိုက်၊ အဲဒါတောင် ယားယားနေတတ်တယ်။ ရက်ဆက်ပြီးများမိုးမိလို့ကတော့ နေလို့ကိုမရအောင်ကိုယားတာမှ ပြောဖို့တောင်မကောင်းဘူး။ မျောက်ငါးပိထိသလိုပဲ။နောက်ဆုံး ဆေးခန်းပြပြီး ဆရာဝန်ညွန်တဲ့အတိုင်း ဆေးကြောပြီးရင် အရက်ပြန်နဲ့ထပ်ပွတ်ပေးမှ ယားယံတာမဖြစ်တော့တာ။ အခုဆို မိုးတွင်းအပြင်ထွက်ရင် အရက်ပြန်ဘူးလေး သွားလေရာဆောင်သွားရတယ်”ဟု ၎င်း၏ကိုယ်တွေ့ကိုပြောသည်။
ပန်းပဲတန်းမြို့နယ်တွင်နေထိုင်သူ ဒေါ်ဝါ၀ါက ”အိမ်က ကလေးတွေကို စာလာပြပေးတဲ့ကောင်မလေးဆို(Sensitive Skin) လေ။ထိခိုက်လွယ်တဲ့အရေပြားဆိုတော့ ရေဆေး၊ ဆပ်ပြာတိုက်၊ အရက်ပြန်နဲ့ပွတ်ပြီးတာတောင် တစ်ခါတစ်လေ အပိန့်တွေထ၊အကွက်တွေပေါ်လာတတ်သေးလို့ ဆရာဝန်ပြပြီး ဆေးထိုးဆေးသောက်ထပ်လုပ်ရသေးတယ်”ဟုဆိုသည်။
အထက်ပါဆရာဝန်ကပင် ”ထိခိုက်လွယ်တဲ့အရေပြားပိုင်ရှင်တွေ။ခြေထောက်ပိုင်းမှာထိခိုက်ပွန်းပဲ့ဒဏ်ရာရှိနေသူတွေဆိုရင် ရေဆိုးရေညစ်တွေကြားဖြတ်သန်းသွားလာဖို့ သတိပြုသင့်ပါတယ်။တစ်ချို့ကူးစက်ရောဂါပိုးတွေက မသန့်တဲ့ရေကနေ အရေပြားကိုဖောက်ပြီး ကိုယ်တွင်းကိုရောက်ရှိနိုင်ပါတယ်။ဒါကြောင့် မသန့်ရှင်းတဲ့ရေတွေနဲ့ထိတွေ့ပြီးရင်တော့ သေချာဆေးကြောသင့်ပါတယ်။လိုအပ်ရင် ဆရာဝန်နဲ့ပြဖို့လည်း ၀န်မလေးသင့်ပါဘူး”ဟု မိုးရာသီကာလတွင် မသန့်ရှင်းသောရေများကြောင့် အရေပြားဆိုင်ရာ ပြဿနာများ ဂရုပြုသင့်ကြောင်းကို သတိပေးပြောကြားခဲ့ပါသည်။
Leave a Reply
You must be logged in to post a comment.