ဦးဝင်းတင်၏ ကျောက်ကပ်ဆေးကြော ကုသမှု အောင်မြင်စွာပြီးဆုံး

ဧပြီ ၁၉၊ ၂၀၁၄
M-Media
လမင်း

ရန်ကုန် ။     ။       ရန်ကုန်ဆေးရုံကြီး အထူးကြပ်မတ်ကုသဆောင်တွင် ဆေးကုသလျှက်ရှိနေသော ဟံသာဝတီဦးဝင်းတင်သည် ဧပြီလ ၁၈ ရက်နေ့ညက ကျောက်ကပ်ဆေးကြောကုသမှု အောင်မြင်စွာပြီးစီးခဲ့ကြောင်း သိရသည်။

ဦးဝင်းတင်၏ကျောက်ကပ်သည် ပုံမှန်အလုပ်မလုပ်နိုင်သည့်အတွက် ဆီးဆိပ်တက်ခြင်း၊ ဦးနှောက်တဖြည်းဖြည်းနဲ့ပုံမှန်အလုပ်မလုပ်ခြင်းနှင့် အခြား ကိုယ်တွင်းအဂါင်္များလုပ်ဆောင်မှုပါ ကောင်းစွာမလုပ်ဆောင်နိုင်ခြင်းတို့ကြောင့် ဆရာဝန်ကြီးများနှင့် သမားတော်ကြီးများက ကျောက်ကပ်ဆေးရန် အတွက် ကာယကံရှင်၏ဆန္ဒကိုရယူပြီး ဧပြီလ ၁၈ ရက်နေ့ ည ၇နာရီတွင် ကျောက်ကပ်ဆေးကုသခဲ့သည်။

“ဒီအတိုင်း ဘာမှမလုပ်ပဲထားရင် နောက်နေ့တွေမှာ ပိုမောလာနိုင်မယ်။ ကျောက်ကပ်ပျက်စီးတာများလာလို့လည်း ဆီးထွက်လည်းနည်းနေပြီ။ အခုလို ကျောက်ကပ်ဆေးလိုက်တော့ အရင်ထက်ပိုပြီးအများကြီးကောင်းသွားမှာပါ” ဟု မိသားစုဆရာဝန်တစ်ဦးဖြစ်သူ ဒေါက်တာမြင့်သိန်းက ရှင်းလင်း ပြောကြားသည်။

ဆရာကြီးဦးဝင်းတင်ကို ဧပြီလ ၁၈ ရက်နေ့က အမျိုးသားဒီမိုကရေစီအဖွဲ့ချုပ်ဥက္ကဌ ဒေါ်အောင်ဆန်းစုကြည်၊ ကိုမင်းကိုနိုင်၊ ဦးကိုကိုကြီးနှင့် အခြား ၈၈ မျိုးဆက်ခေါင်းဆောင်တွေက လာရောက်အားပေးကြည့်ရှုခဲ့ကြပါသည်။ ဦးဝင်းတင်နေမကောင်းဖြစ်နေသည့်အချိန်မှစတင်ကာ မြို့အနှံ့အပြားတွင် လည်း ဘဘဦးဝင်းတင်ပြန်လည်ကျန်းမာစေရန်အတွက် ဆုတောင်းပွဲများကိုလည်း ပြူလုပ်ခဲ့ကြသည်။

ကျောက်ကပ်စစ်ဆေးနေစဉ် အသက်အန္တရယ်ဆုံးရှုံးရန် ရာခိုင်နှုန်းများပြားသော်လည်း ည ၇ နာရီတွင်စတင်စစ်ဆေး ဆေးကြောခဲ့ရာ ၉ နာရီတွင် အောင်မြင်စွာပြီးဆုံးခဲ့သည်။

ဦးဝင်းတင်ကို ကျန်းမာရေးအခြေအနေစစ်ဆေးရန်အတွက် ၀ိတိုရီယဆေးရုံတွင် ဆေးကုသနေရာမှ မတ်လ ၂၉ ရက်နေ့တွင် ရန်ကုန် ပြည်သူ့ ဆေးရုံကြီးသို့ ပြောင်းရွှေ့ဆေးကုသမှုခံယူခဲ့ရသည်။