ဒီဇင်ဘာ ၃ ၊ ၂၀၁၄
M-Media
– အစ္စရေး-ပါလက်စတိုင်း ငြိမ်းချမ်းရေးနှင့်ပတ်သက်၍ နောက်ဆုံးအဆင့် ဆွေးနွေးမှုများကို ပြန်လည်စတင်ရန် ရည်ရွယ်သော ဆုံးဖြတ်ချက်မူကြမ်းကို ယခုလက အလယ်ပိုင်းတွင် ကုလ လုံခြုံရေးကောင်စီ၌ တင်သွင်းသွားမည်ဟု ကုလသမဂ္ဂဆိုင်ရာ ပါလက်စတိုင်း ကိုယ်စားလှယ်အဖွဲ့က ဒီဇင်ဘာ ၁ ရက် တနင်္လာနေ့တွင် ပြောကြားလိုက်သည်။
ပြင်သစ်နိုင်ငံမှ ဦးဆောင်တင်သွင်းမည့် အဆိုပါ ဆုံးဖြတ်ချက်မူကြမ်းမှ ငြိမ်းချမ်းရေး ရရှိရန် နောက်ဆုံးဆွေးနွေးပွဲနှင့်ပတ်သက်၍ ညှိနှိုင်းဆွေးနွေးမှုများပြုလုပ်ရန်အတွက် အချိန်ကာလတစ်ခု ထွက်ပေါ်လာနိုင်ပြီး ပါလက်စတိုင်း နိုင်ငံဖြစ်တည်လာရေးအတွက် ဒုတိယမြောက် နောက်ဆုံးကာလသတ်မှတ်ချက် ဖြစ်ပေါ်လာနိုင်သည်ဟုလည်း ပါလက်စတိုင်းကိုယ်စားလှယ် ရီယဒ် မန်ဆူရ်က ထည့်သွင်းပြောကြားခဲ့သည်။
သို့သော်လည်း အဆိုပါဆုံးဖြတ်ချက်အား အတည်ပြုရန်အတွက် ယခင်က ပါလက်စတိုင်းနှင့် ပတ်သက်သည့် ဆုံးဖြတ်ချက်များကို ဗီတိုများသုံး၍ ပယ်ချခဲ့ဖူးသည့် အမေရိကန်၏ ဆုံးဖြတ်ချက်က အခရာကျနေသည်။
အာရပ်လိဂ်၏ ထောက်ခံမှုဖြင့် ပါလစတိုင်းမှာ ဆုံးဖြတ်ချက်မူကြမ်းတစ်စောင်ကို စက်တင်ဘာလကုန်ပိုင်းတွင် လုံခြုံရေးကောင်စီ၌ တင်သွင်းခဲ့ဖူးပြီး အဆိုပါ ဆုံးဖြတ်ချက်တွင် ပါလက်စတိုင်းနယ်မြေများအား အစ္စရေးက ကျူးကျော်သိမ်းပိုက်မှုကို ၂၀၁၆ ခုနှစ် နိုဝင်ဘာလ နောက်ဆုံးထား၍ အဆုံးသတ်ရန် ဖော်ပြထားသည်။
အဆိုပါ မူကြမ်းကို အမေရိကန်နှင့် အခြားလုံခြုံရေးကောင်စီအဖွဲ့ဝင်များက ဆန့်ကျင်ခဲ့သော်လည်း ပြင်သစ်နိုင်ငံက ယခုတင်သွင်းမည့် မူကြမ်းပေါ်လာရန် နည်းလမ်းတစ်ခုဖြစ်ခဲ့သည်။
Leave a Reply
You must be logged in to post a comment.