News @ M-Media

ဆီးရီးယားစစ်ပွဲတွင် စပိန်နှင့် ယူကေတို့၏ ပါဝင်ရန်စီစဉ်မှုကို ပြည်သူများ ဆန့်ကျင်ဆန္ဒပြ

နိုဝင်ဘာ ၂၉၊ ၂၀၁၅
M-Media

uk

– ဆီးရီးယားရှိ IS အဖွဲ့အား လေကြောင်းမှတိုက်ခိုက်မှုတွင် ၎င်းတို့၏ နိုင်ငံများမှ ပါဝင်လာနိုင်ချေရှိသော အလားအလာကို ဆန့်ကျင်သည့်အနေဖြင့် ယူကေနှင့် စပိန်ပြည်သူများက ယမန်နေ့တွင် ဆန္ဒပြမှုများ ပြုလုပ်ခဲ့ကြသည်ဟု သိရသည်။

လန်ဒန်မြို့လယ်ကောင်တွင် ပြုလုပ်သည့် ဆန္ဒပြမှုတွင် ဗြိတိန်ပြည်သူ အနည်းဆုံး ၅၀၀၀ ခန့် ပါဝင်ခဲ့ပြီး “ဆီးရီးယားကို ဗုံးမကြဲပါနဲ့” “ကင်မရွန်းကိုဖြုတ်ချ။ ဗုံးမကြဲနဲ့” “မီးလောင်ရာလေမပင့်နဲ့” စသည့် ဆိုင်းဘုတ်များကို ကိုင်ဆောင်ကာ ဆန္ဒပြခဲ့ကြသည်။

“ဆီးရီးယားကိစ္စမှာ ပါဝင်ဖို့အတွက် ၀န်ကြီးချုပ် ဒေးဗစ်ကင်မရွန်းရဲ့ မရေရာမသေချာတဲ့ အဆိုပြုချက်တွေဟာ IS ကို အားနည်းသွားစေမှာ မဟုတ်ဘဲ ပြည်တွင်းစစ်မီးတောက်သာ ပိုပြီး တောက်လောင်သွားလိမ့်မယ်။ ဆီးရီးယား ပြည်သူတွေရဲ့ စိတ်ဆင်းရဲမှုတွေ ပိုပြီး ဆိုးသွားလိမ့်မယ်။ ပြီးတော့ အကြမ်းဖက်မှုအန္တရာယ်လည်း တိုးလာပါလိမ့်မယ်” ဟု Stop the War Coalition စစ်ဆန့်ကျင်ရေးအဖွဲ့က ပြောကြားခဲ့သည်။

လက်ရှိအချိန်တွင် ဗြိတိန်မှာ အီရတ်ရှိ IS ပစ်မှတ်များကို ဗုံးကြဲနေပြီး ၀န်ကြီးချုပ် ဒေးဗစ်ကင်မရွန်းက မိမိတို့မှာ ဆီးရီးယားရှိ IS ခြေကုပ်စခန်းများကို ပြင်သစ်နှင့် အမေရိကန်တို့မှ ဗုံးကြဲမှုတွင် ပါဝင်သွားရန် ရှိနေသည်ဟု ကြာသာပတေးနေ့က ပြောကြားခဲ့သည်။

ထိုကိစ္စအတွက် ပါလီမန်တွင် မဲခွဲမှုကို လာမည့်သီတင်းပတ်အစောပိုင်း၌ ပြုလုပ်သွားမည်ဖြစ်ပြီး စောစောပိုင်းက တွန့်ဆုတ်နေသည့် နိုင်ငံရေးသမားများမှာလည်း ပဲရစ်တိုက်ခိုက်မှုပြီးနောက် ၎င်းတို့၏ စိတ်ကို ပြောင်းလဲပစ်လိုက်ပြီဟု ယူဆမှုများ ရှိနေသည်။

madrid

မက်ဒရစ်တွင်လည်း ဆန္ဒပြ

ဆီးရီးယားပဋိပက္ခတွင် စပိန်၏ ပါဝင်မှုကို ဆန့်ကျင်ရန်အတွက် မက်ဒရစ်မြို့၌ ပြုလုပ်ခဲ့သည့် ဆန္ဒပြမှုတွင်လည်း ပြည်သူ ၅၀၀၀ ခန့် ပါဝင်ခဲ့ကြပြီး Reina Sofia ပြတိုက်အရှေ့တွင် ပြည်သူများက “စစ်ပွဲအလိုမရှိ” ဟု ကျွေးကြော်ခဲ့ကြသည်။

ဥရောပအစိုးရများက လက်နက်ဖြင့် ကြားဝင်ဆောင်ရွက်မှု အစီအစဉ်အတွက် စဉ်းစားရန် အနုပညာရှင်များက ဦးဆောင်တောင်းဆိုသည့် not in our name မေတ္တာရပ်ခံလွှာမှာ ယနေ့အချိန်အထိ အွန်လိုင်းတွင် လက်မှတ်ပေါင်း ၂၄၀၀၀ ခန့် ရရှိထားပြီး မက်ဒရစ်ရှိ ဆန္ဒပြသူများကလည်း ပါဝင်လက်မှတ်ရေးထိုးခဲ့ကြသည်။

ဒီဇင်ဘာတွင် ရွေးကောက်ပွဲအား ရင်ဆိုင်ရမည့် စပိန်ဝန်ကြီးချုပ် မာရီယာနို ရာဂျွိုင်းကလည်း မိမိမှာ ဆုံးဖြတ်ချက်ကို အလျင်စလို ချမှတ်သွားမည်မဟုတ်ဟု ပြောကြားခဲ့သည်။

“ဆုံးဖြတ်ချက်ကို ရှုထောင့်ပေါင်းစုံကကြည့်၊ အကြေအလည်သုံးသပ်ပြီးမှ ချမှတ်သွားမှာပါ“ ဟု ရာဂျွိုင်းက ပြောကြားခဲ့သည်။

Ref: Aljazeera

Comments

Leave a Reply