ရန်ကုန်၊ မေ ၁၅
The Voice Weekly မှ ကူးယူ ဖော်ပြသည်။
.
အစိုးရသစ်လက်ထက်တွင် လူမှုကွန်ယက် စာမျက်နှာများပေါ်၌ ဘာသာရေး အမုန်းစကား ဖြန့်ဝေသူများကို ထိထိရောက်ရောက် ဖော်ထုတ် အရေးယူနိုင်မည့် ဥပဒေတစ်ရပ် ရေးဆွဲမည်ဖြစ်ကြောင်း သာသနာရေးနှင့် ယဉ်ကျေးမှု ဝန်ကြီးဌာန ပြည်ထောင်စုဝန်ကြီး သူရဦးအောင်ကိုက ပြောကြားသည်။
.
မေလ ၁၅ ရက်နေ့က ရန်ကုန်တိုင်းဒေသကြီး မရမ်းကုန်းမြို့နယ်ရှိ သာသနာရေးနှင့် ယဉ်ကျေးမှုဝန်ကြီးဌာရုံးခွဲတွင် ဘာသာပေါင်းစုံ ချစ်ကြည် ညီညွတ်ရေးအဖွဲ့(ဗဟို)နှင့် တွေ့ဆုံစဉ် ပြည်ထောင်စုဝန်ကြီးက ယင်းသို့ ပြောဆိုခြင်းဖြစ်ကြောင်း အစည်းအဝေး တက်ရောက်သူများထံမှ သိရသည်။
.
ဘာသာရေး အမုန်းတရား လှုံ့ဆော်မှုများကို လူမှုကွန်ယက်နှင့် အခြားနယ်ပယ်များတွင် တွေ့မြင်နေရပြီး ယင်းလှုံ့ဆော်မှုများကို ထိထိရောက်ရောက် ဟန့်တားနိုင်မည့် ဥပဒေတစ်ရပ် ရေးဆွဲရန် လိုအပ်သောကြောင့် ဥပဒေ ပညာရှင်များနှင့် ဘာသာရေး အသင်းအဖွဲ့များက ဥပဒေ ရေးဆွဲမှုတွင်ပါဝင်ရန် ပြည်ထောင်စုဝန်ကြီးက ဖိတ်ခေါ်ကြောင်း အဆိုပါပွဲသို့ တက်ရောက်ခဲ့သူ ဘာသာပေါင်းစုံ ချစ်ကြည် ညီညွတ်ရေးအဖွဲ့ (ဗဟို)အလုပ်အမှုဆောင် ဦးကျော်ငြိမ်းက ပြောကြားသည်။
.
“သူ့အနေနဲ့ ဒီလိုဥပဒေမျိုး ရေးဆွဲဖို့ လိုပါတယ်၊ ဘာသာပေါင်းစုံ အဖွဲ့တွေနဲ့ ဥပဒေပညာရှင်တွေက ရေးဆွဲတင်ပြမယ်ဆိုရင်လည်း အစိုးရအဖွဲ့ကို တင်ပြနိုင်ပါတယ်ဆိုပြီး ဖိတ်ခေါ်ပြောဆိုသွားပါတယ်”ဟု ၎င်းက ပြန်လည်ရှင်းပြသည်။
.
ယင်းသို့ အစိုးရသစ် လက်ထက်တွင် အမုန်းစကား ဖြန့်ဝေမှုများကို ထိန်းသိမ်းမည့် ဥပဒေတစ်ရပ်ရေးဆွဲရန် စီစဉ်နေခြင်းနှင့်ပတ်သက်ပြီး တရားလွှတ်တော် ရှေ့နေ ဦးကိုနီက “ဘာသာရေးနဲ့ပတ်သက်ပြီး စော်ကားပြောဆိုတာတွေကို ဥပဒေက တိုက်ရိုက် ပြဋ္ဌာန်းထားတာ မရှိဘူး၊ သွယ်ဝိုက်ပြီး တရားစွဲ နေရတာပေါ့၊ မြန်မြန်ဆန်ဆန်နဲ့ ထိထိရောက်ရောက်ရှိဖို့ ဒီဥပဒေက တကယ်ကို လိုအပ်ပါတယ်” ဟု ထောက်ပြပြောဆိုသည်။
အလားတူ ခေတ်အဆက်ဆက် ဖွဲ့စည်းပုံ အခြေခံ ဥပဒေများတွင် ယင်းကဲ့သို့ ဘာသာရေးတစ်ခုအပေါ် နှိမ့်ချပြောဆိုမှုများနှင့် ပတ်သက်၍ ဥပဒေတစ်ခု ရေးဆွဲပြဋ္ဌာန်းနိုင်သည်ဟု ပြဋ္ဌာန်းထားသော်လည်း အစိုးရအဆက်ဆက်မှ ရေးဆွဲရန် ပျက်ကွက်ခဲ့ကြောင်း ၎င်းက သုံးသပ်ပြောဆိုသည်။
.
ယင်းသို့ ဘာသာရေး အမုန်းစကား ဖြန့်ဝေသူများကို ထိရောက်စွာ အရေးယူနိုင်မည့် ဥပဒေသည် မည်သည့် ဘာသာကိုမဆို မခွဲခြားဘဲ အညီအမျှ အကာအကွယ် ပေးနိုင်သည့် သမာသမတ်ကျသော ဥပဒေတစ်ခုဖြစ်ရန် လိုအပ်ကြောင်း လူ့အခွင့်အရေးတက်ကြွလှုပ်ရှားသူ ညီမျှခြင်းမြန်မာ Equality Myanmar မှ ဒါရိုက်တာ ဦးအောင်မျိုးမင်းက အကြံပြု ပြောဆိုသည်။
.
“တစ်ပြေးညီမျှတတဲ့ ဥပဒေ ဖြစ်သင့်ပါတယ်၊ ဘာသာရေးမီးက တော်တော်ဆိုးပါတယ်”ဟု ၎င်းက ထောက်ပြပြောဆိုသည်။
.
နိုင်ငံတော်သမ္မတဟောင်း ဦးသိန်းစိန် အစိုးရလက်ထက် ဖြစ်ပွားခဲ့သော ဘာသာရေး၊ လူမျိုးရေး၊ ပဋိပက္ခဖြစ်စဉ် အများစုတွင် ဒေသတစ်ခုမှ တစ်ခုသို့ မပြန့်ပွားစေရေးအတွက် အချိန်မီ ထိန်းသိမ်းနိုင်ရန် ခက်ခဲခြင်းမှာ လူမှုကွန်ယက် စာမျက်နှာများမှတစ်ဆင့် အမုန်းစကားများ ပါဝင်သော ကောလာဟလ ဖြန့်ဝေမှုသည်လည်း အကြောင်းရင်း တစ်ရပ်ဖြစ်ကြောင်း နိုင်ငံတကာ လူ့အခွင့်အရေး စောင့်ကြည့် အဖွဲ့အစည်းများက ဝေဖန်ခဲ့ကြသည်။
https://www.facebook.com/thevoiceweekly/posts/1150103595009898
Leave a Reply
You must be logged in to post a comment.