အမေရိကန်ရွေးကောက်ပွဲအတွက် စိတ်မပူရန် အိုဘားမားပြော

မေ ၂၅၊ ၂၀၁၆
M-Media

– မိမိနေရာအား ဆက်ခံမည့် နိုဝင်ဘာရွေးကောက်ပွဲတွင် သမ္မတလောင်းအဖြစ် ၀င်ရောက်ယှဉ်ပြိုင်နိုင်ရေး အငြင်းပွားဖွယ် မဲဆွယ်မှုများအတွက် အာရှပြည်သူများအနေဖြင့် စိတ်မပူကြရန် ဗီယက်နမ်သို့ ရောက်ရှိနေသည့် အမေရိကန်သမ္မတ ဘာရက်အိုဘားမားက ပြောကြားလိုက်သည်။

လက်ရှိအချိန် ပါတီများ၏ သမ္မတလောင်းအဖြစ် ရွေးချယ်ခံရရန်အတွက် ယှဉ်ပြိုင်မှုများတွင် ရီပက်ဘလစ်ကန်ပါတီမှ ဘီလျံနာ ဒေါ်နယ်ထရမ့်၏ လူမျိုးရေးခွဲခြားစော်ကားမှု မှတ်ချက်များကြောင့် ပြည်တွင်း၊ ပြည်ပမှ ဝေဖန်မှုများ မြင့်တက်လာခဲ့သည်။

“အခြားသူတွေဟာ ကျွန်တော်တို့ရဲ့ ရွေးကောက်ပွဲစနစ်ကိုကြည့်ပြီး ‘ဘာကြီးလဲကွာ’ လို့ ပြောကြမယ်ထင်ပါတယ်။ ဒါပေမယ့် အဆုံးမှာတော့ ကျွန်တော်တို့ဟာ အဆင်ပြေပြေ ပြီးသွားတာပါပဲ။ အမေရိကန်ပြည်သူတွေက လူတော်တွေပါ။ တစ်ခါတစ်ရံမှာ ကျွန်တော်တို့ရဲ့ နိုင်ငံရေးက ပြည်သူတွေရဲ့ စိတ်နေသဘောထားကောင်းမွန်မှုကို ဖော်ပြလေ့မရှိပါဘူး” ဟု ဟိုချီမင်းမြို့တော်ခန်းမတွင် လူငယ်ခေါင်းဆောင်များနှင့်တွေ့ဆုံစဉ် အိုဘားမားက ပြောကြားခဲ့သည်။

သို့သော်လည်း အိုဘားမားက မည်သူမည်ဝါဖြစ်သည်ဟု ထုတ်ဖော်ပြောကြားခဲ့ခြင်းမရှိချေ။ ကျောင်းသူတစ်ဦးက ဒေါ်နယ်ထရမ့်၊ ဒီမိုကရက်တစ်ပါတီမှ ဟီလာရီကလင်တန် သို့မဟုတ် ဘာနီ ဆန်းဒါးစ်တို့တွင် မည်သူက သမ္မတဖြစ်သင့်သည်ဟု မေးမြန်းရာတွင် အိုဘားမားက

“များသောအားဖြင့် နောက်ဆုံးမှာတော့ မဲပေးသူပြည်သူတွေဟာ ဆုံးဖြတ်ချက်ကောင်းကောင်းကို ချတတ်ကြပြီး ဒီမိုကရေစီဆန်ဆန် လုပ်တတ်ကြပါတယ်။ အားလုံးအဆင်ပြေသွားမှာပါ။ ကျွန်တော် ကတိပေးပါတယ်” ဟု ပြန်လည်ဖြေကြားခဲ့သည်။

အိုဘားမားမှာ ထရမ့်၏ အငြင်းပွားဖွယ် မှတ်ချက်များအတွက် ပြင်းပြင်းထန်ထန် ဝေဖန်လေ့ရှိသူလည်းဖြစ်သည်။

Ref: Channelnewsasia