ဥရောပမှ ဗြိတိန် ခွဲထွက်ပြီးနောက် စကော့တလန်က ဗြိတိန်မှခွဲထွက်ရေး ပြင်ဆင်လာ

ဇွန် ၂၄၊ ၂၀၁၆
M-Media

– ဗြိတိန်အနေဖြင့် ဥရောပမှခွဲထွက်ရေး ပြည်သူ့ဆန္ဒခံယူပွဲပြုလုပ် ဆုံးဖြတ်ခဲ့ပြီးနောက် မိမိတို့ကလည်း ဗြိတိန်မှခွဲထွက်ကာ လွတ်လပ်ရေးယူရန်အတွက် ဒုတိယအကြိမ်မြောက် ပြည်သူ့ဆန္ဒခံယူပွဲပြုလုပ်ရန် အလားအလာမှာ များလာခဲ့ပြီဟု စကော့တလန်ဝန်ကြီးချုပ် နီကိုလာ စတာရ်ဂျီယွန်က ယနေ့တွင် ပြောကြားလိုက်သည်။

ယမန်နေ့က ပြုလုပ်ခဲ့သည့် ဗြိတိန်၏ ဆန္ဒမဲပေးမှုရလဒ်အရ ခွဲထွက်ရေးဘက်က ၅၂ ရာခိုင်နှုန်း၊ ခွဲမထွက်ရေးဘက်က ၄၈ ရာခိုင်နှုန်း မဲရရှိခဲ့ပြီး ခွဲထွက်ရေးမှာ အတည်ဖြစ်ခဲ့သည်။

စကော့ဝန်ကြီးချုပ်ကမူ မိမိတို့နိုင်ငံအနေဖြင့် မိမိတို့ဆန္ဒမပါဘဲ ဥရောပသမဂ္ဂမှ ခွဲထွက်ရခြင်းမှာ ဒီမိုကရေစီနည်းအရ လက်မခံနိုင်ဖွယ်ရာဖြစ်သည်ဟု ပြောကြားခဲ့သည်။ ထို့ပြင် မိမိတို့အစိုးရမှာ ဗြိတိန်မှခွဲထွက်ရေး ပြည်သူ့ဆန္ဒခံယူနိုင်မည့် ဥပဒေတစ်ခုကို ပြင်ဆင်ရန် စတင်သွားမည်ဟုလည်း ၎င်းက ထပ်လောင်းပြောကြားခဲ့သည်။

ဗြိတိန်အနေဖြင့် ဥရောပသမဂ္ဂမှ ခွဲထွက်ရေး၊ မထွက်ရေး မဲပေးမှုအတွင်း စကော့တလန်၌ ၆၂-၃၈ ရာခိုင်နှုန်းဖြင့် မထွက်ရေးဖက်က အသာရခဲ့သည်။

နိုင်ငံရေးကျွမ်းကျင်သူများကမူ ဗြိတိန်အနေဖြင့် ဥရောပသမဂ္ဂမှခွဲထွက်ပါက ဗြိတိန်အတွင်းရှိ နိုင်ငံများကလည်း လွတ်လပ်ရေးကြိုးပမ်းလာနိုင်သည်ဟု သတိပေးထားသည်။ ၂၀၁၄ ခုနှစ်က စတော့တလန်တွင်ပြုလုပ်ခဲ့သည့် ဗြိတိန်မှခွဲထွက်ရေး ပြည်သူ့ဆန္ဒခံယူပွဲတွင် ခွဲမထွက်ရေးဘက်က ၅၅.၃၀ ရာခိုင်နှုန်းဖြင့် အနိုင်ရခဲ့သည်။

Ref: BBC