ဇူလိုင် ၈၊ ၂၀၁၆
M-Media
– ဆီးရီးယားပြည်တွင်းစစ်နှင့်ပတ်သက်၍ ငြိမ်းချမ်းရေးစကားပြောနေသော နိုင်ငံများကိုယ်တိုင် ထိုစစ်ပွဲအတွက် လက်နက်များ ထောက်ပံ့ပေးနေသည်ဟု ပုပ်ရဟန်းမင်းကြီး ဖရန်စစ်က ဝေဖန်ပြောကြားလိုက်သည်။
ဆီးရီးယားနိုင်ငံဆိုင်ရာ ပရဟိတအဖွဲ့ ညီလာခံသို့ အင်္ဂါနေ့က ပေးပို့သည့် ဗီဒီယိုမိန့်ခွန်းတွင် ထိုကဲ့သို့ ပြောကြားခဲ့ခြင်းဖြစ်ပြီး ရည်ညွှန်းလိုသည့် နိုင်ငံများ၏ အမည်ကို ဖော်ပြခဲ့ခြင်းမရှိပေ။
၂၀၁၁ ခုနှစ်က စတင်ခဲ့သည့် ဆီးရီးယားပြည်တွင်းစစ်တွင် သမ္မတ ဘာရှာအလ်အာဆတ်အစိုးရအား ရုရှားနှင့် အီရန်တို့ကဲ့သို့ နိုင်ငံများက စစ်ရေးနှင့် အခြားအကူအညီများ ပေးနေပြီး၊ သူပုန်များကိုမူ ဒေသတွင်း စွန်နီအင်အားကြီး နိုင်ငံများနှင့် အနောက်နိုင်ငံတို့က ပံ့ပိုးပေးနေကြသည်။
“ပြည်သူတွေက ထိခိုက်ခံစားနေရတဲ့အချိန်မှာ တိုက်ခိုက်ရေးသမားတွေကို လက်နက်ထောက်ပံ့ဖို့ ငွေလုံးငွေရင်းနဲ့ အကုန်အကျခံသူတွေ ရှိနေပါတယ်။ အဲဒီလို ပံ့ပိုးပေးနေတဲ့ နိုင်ငံတွေကပဲ ငြိမ်းချမ်းရေးစကား ပြောကြပြန်ပါတယ်။ မီးစာတစ်ဖက် ရေမှုတ်တစ်ဖက်ဖြစ်နေတဲ့ အဲဒီသူတွေကို ဘယ်လိုလုပ် ယုံကြည်ရမလဲ” ဟု ပုပ်ရဟန်းမင်းကြီးက ပြောကြားခဲ့သည်။
၅ နှစ်တာ ကြာမြင့်နေပြီဖြစ်သည့် ဆီးရီးယားစစ်ပွဲတွင် သေဆုံးသူမှာ ၂၅၀၀၀၀ ကျော် ရှိလာခဲ့ပြီး အိုးအိမ်စွန့်ခွာ ထွက်ပြေးရသူ အရေအတွက်မှာလည်း ၁၁ သန်း ရှိနေသည်။
ကုလက ကြားဝင်ပြုလုပ်သည့် ငြိမ်းချမ်းရေးဆွေးနွေးမှုမှာ လက်ရှိအချိန်တွင် ရပ်တန့်နေပြီး၊ နောက်တစ်ကြိမ် ငြိမ်းချမ်းရေး ဆွေးနွေးပွဲ မည်သည့်အချိန်တွင် ဖြစ်မည်ကို ရှင်းရှင်းလင်းလင်း မသိရဟု ဆီးရီးယားဆိုင်ရာ ကုသမဂ္ဂ ကိုယ်စားလှယ်အဖွဲ့က လုံခြုံရေးကောင်စီသို့ ပြီးခဲ့သည့်တစ်ပတ်တွင် တင်ပြခဲ့သည်။
ပုပ်ရဟန်းမင်းကြီး ဖရန်စစ်မှာ ဆီးရီးယားငြိမ်းချမ်းရေးနှင့် ပတ်သက်၍ အစဉ်တစ်စိုက် မေတ္တာရပ်ခံ တိုက်တွန်းမှုများ ပြုလုပ်ခဲ့ပြီး လက်နက်ထုတ်လုပ်သူများ၊ မှောင်ခိုရောင်းဝယ်သူများကိုလည်း ပြင်းပြင်းထန်ထန် ဝေဖန်ပြစ်တင်ဖူးသည်။
Ref: Huffingtonpost
Leave a Reply
You must be logged in to post a comment.