News @ M-Media

ယူကရိန်းနှင့်တင်းမာမှုကြောင့် ခရိုင်းမီးယားတွင် ရုရှားက လေကြောင်းရန် ကာကွယ်ရေးစနစ်ချထား

သြဂုတ် ၁၄၊ ၂၀၁၆
M-Media

russia

– ယူကရိန်းနှင့် တင်းမာမှုများ မြင့်တက်လာပြီးနောက် ရုရှားက ခရိုင်မီးယားကျွန်းဆွယ်တွင် လေကြောင်းရန် ကာကွယ်ရေးနစ် S-400 ကို ချထားလိုက်သည်ဟု ရုရှားနိုင်ငံပိုင်သတင်းဌာန TASS က ဖော်ပြခဲ့သည်။

ရုရှား၏ တောင်ပိုင်းစစ်ဌာနချုပ်မှ ထုတ်ပြန်သော ကြေငြာချက်ကို ကိုးကား၍ ထိုကဲ့သို့ ဖော်ပြခဲ့ခြင်းဖြစ်ပြီး ခရိုင်မီးယားရှိ ရုရှားတပ်ဖွဲ့များမှာ အဆင့်မြင့် S-400 ခေတ်မီလေကြောင်းရန်ကာကွယ်ရေးစနစ်ကို လက်ခံရရှိထားပြီးဖြစ်သည်ဟု ဆိုသည်။

အမြင့်ပေ ၃၀ ကီလိုမီတာနှင့် အကွာအဝေး ၄၀၀ ကီလိုမီတာရှိ ပစ်မှတ်များအား ထိမှန်အောင် ပစ်ခတ်နိုင်သော အဆိုပါ မြေပြင်မှ ဝေဟင်ပစ် ဒုံးကျည်စနစ်မှာ ရုရှားရှိ အဆင့်မြင့်ဆုံး လက်နက်များထဲမှ တစ်ခုလည်းဖြစ်သည်။ ထို့ပြင် လာမည့်လတွင် ပြုလုပ်ရန် စီစဉ်ထားသည့် Caucasus-2016 စစ်ရေးလေ့ကျင့်မှုများတွင်လည်း ထိုစနစ်အား ထုတ်ဖော်ပြသသွားရန် ရှိနေသည်။

ယခုသီတင်းပတ်အစောပိုင်းတွင် ရုရှားက ယူကရိန်းစစ်သည်များမှာ ခရိုင်းမီးယားကျွန်းဆွယ်ထဲသို့ ၀င်ရောက်လာခဲ့ပြီး ကျွန်းဆွယ်အတွင်းရှိ အဓိကအဆောက်အဦးများကို ဖောက်ခွဲရန်လည်း အစီအစဉ်ရှိနေသည်ဟု ပြောကြားပြီးနောက် ၎င်းတို့ နှစ်နိုင်ငံအကြား တင်းမာမှုများ မြင့်တက်လာခဲ့ခြင်းဖြစ်သည်။

ယူကရိန်းကမူ ထိုစွပ်စွဲချက်များကို ငြင်းပယ်ထားပြီး သမ္မတပိုရိုရှန်ကိုကလည်း စစ်တပ်ကို တပ်လှန့်ထားသည်။

Ref : Aljazeera

Comments

Leave a Reply