Author: Ko Lay

သြဂုတ် ၂၉၊ ၂၀၁၆
M-Media

– ပြီးခဲ့သည့်တစ်ပတ်က လှုပ်ခတ်ခဲ့သည့် ငလျင်ကြောင့် ပုဂံတွင် ထိခိုက်ပျက်ဆီးခဲ့သည့် စေတီပုထိုးအရေအတွက်မှာ ၄၀၀ နီးပါး ရှိလာခဲ့ပြီး ပြန်လည်ပြင်ဆင်ရေးလုပ်ငန်းများ ပြီးစီးရန် အနည်းဆုံး ၁ နှစ် ကြာမည်ဟု ဗိသုကာ၊ အမျိုးသားပြတိုက်နှင့် စာကြည့်တိုများဌာနက ယမန်နေ့တွင် ပြောကြားလိုက်သည်။

သြဂုတ်လ ၂၄ ရက်နေ့က မကွေးတိုင်းဒေသကြီး ချောက်မြို့အနောက်ဖက် ၁၆ မိုင်အကွာကို ဗဟိုပြု၍ လှုပ်ခတ်ခဲ့သည့် အဆိုပါငလျင်မှာ ပြင်းအား ၆.၈ မဂ္ဂနီကျု ရှိခဲ့သည်။

ဌာန၏ လက်ထောက်ညွှန်ကြားရေးမှူးဖြစ်သူ ဦးသိန်းလွင်ကမူ လက်ရှိအချိန်တွင် စေတီပုတိုး ၃၃ ဆူသို့ ဧည့်သည်များ ၀င်ရောက်ခွင့်ကို ပိတ်ပင်ထားပြီး၊ နေ၀င်ချိန်၊ နေထွက်ချိန်ကို ကြည့်ရှုရန် အထက်ပစ္စယံများသို့ တက်ရောက်မှုကိုလည်း ခွင့်မပြုဟု ဆိုသည်။

“တစ်နှစ်လောက် ကျွန်တော်တို့ ပိတ်ထားမှာပါ။ အဲဒီ ပြန်လည်ပြင်ဆင်ရေးကာလ ပြီးမှသာလျှင် ကျွန်တော်တို့ ဧည့်သည်တွေကို ၀င်ရောက်ခွင့်၊ တက်ခွင့်ပြုမှာ ဖြစ်ပါတယ်” ဟု ဦးသိန်းလွင်က ထည့်သွင်းပြောကြားခဲ့သည်။

သာသနာရေးနှင့် ယဉ်ကျေးမှုဝန်ကြီးဌာနကမူ ထိုကဲ့သို့ ဧည့်သည်များဝင်ရောက်ခွင့် ပိတ်ပင်ထားသည့် စေတီပုထိုးများတွင် ထင်ရှားသည့် စေတီများဖြစ်သော ပြသာဒ်ကြီးစေတီ၊ ရွှေဆံတော်စေတီ၊ ထီးလိုမင်းလိုစေတီ၊ ဆူလာမဏိစေတီတို့ ပါဝင်သည်ဟု ပြောကြားခဲ့သည်။ ပုဂံတွင် ထိခိုက်ပျက်ဆီးခဲ့သော စေတီပုထိုးအရေအတွက်မှာ ကနဦးက ၁၈၇ ဆူသာ ရှိခဲ့သည်ဟု သတင်းထုတ်ပြန်ခဲ့သော်လည်း အသေးစိတ်လေ့လာမှုများအရ လက်ရှိတွင် ၄၀၀ နီးပါး ရှိလာခဲ့ပြီဖြစ်သည်။

ထို့ပြင် မကွေးတိုင်းဒေသကြီး စလေမြို့တွင် စေတီပုထိုး ၃၅ ဆူ၊ ရခိုင်ပြည်နယ် မြောက်ဦးမြို့တွင် ၅ ဆူနှင့် စစ်ကိုင်းတိုင်း ဒေသကြီးတွင် ၁၃ ဆူတို့လည်း ငလျင်ဒဏ်ကြောင့် ထိခိုက်ပျက်ဆီးခဲ့သည်။

Ref: mmtimes