ဧပြီ ၂၆၊ ၂၀၁၅
M-Media
– ပြီးခဲ့သည့်နှစ်က အိမ်ဖြူတော်ကွန်ပျူတာစနစ်၏ အရေးပါသော အစိတ်အပိုင်းများအတွင်းသို့ ၀င်ရောက်ခဲ့သည့် ရုရှားဟက်ကာများမှာ အိုဘားမား၏ လုံးခြုံရေးအဆင့် မမြှင့်ထားသော အီးမေလ်းများကို ဖတ်ရှုခဲ့ကြသည်ဟု နယူးယောက် တိုင်းမ်စ်က အမေရိကန် တာဝန်ရှိသူများ၏ ပြောကြားမှုများကို ကိုးကား၍ ယမန်နေ့တွင် ဖော်ပြခဲ့သည်။
“သမ္မတရဲ့ ကိုယ်ပိုင်အီးမေးလ်အကောင့် ဟက်ခံရတယ်ဆိုတဲ့ အထောက်အထားတော့ မရှိဘူးလို့ အိမ်ဖြူတော် တာဝန်ရှိသူတွေက ပြောပါတယ်။ ဒါပေမယ့် မစ္စတာအိုဘားမားရဲ့ ဆက်သွယ်မှုအချို့ဟာ ဟက်ကာတွေက ရယူသွားတဲ့ အချက်အလက်တွေထဲမှာ ပါဝင်တယ်ဆိုတာကတော့ စုံစမ်းမှုရဲ့ တွေ့ရှိချက်တွေထဲမှာ တစ်ခုအပါအ၀င် ဖြစ်ပါတယ်” ဟု နယူးယောက်တိုင်မ်းစ်က ဆိုသည်။
အိမ်ဖြူတော်ကလည်း ၎င်းတို့၏ ကွန်ပျူတာစနစ် ဖောက်ထွင်းခံရကြောင်းကို ယခုလ အစောပိုင်းက အတည်ပြုခဲ့ပြီး အဆိုပါဖောက်ထွင်းခံရမှုမှာ ပြီးခဲ့သည့်နှစ်ကဖြစ်ကြောင်း၊ လျှို့ဝှက်အချက်အလက်များကို ထိခိုက်မှုမရှိကြောင်း ပြောကြားခဲ့သည်။
နယူးယောက်တိုင်းမ်စ်ကမူ အဆိုပါ ဖောက်ထွင်းခံရမှုမှာ လူသိရှင်ကြား ထုတ်ပြန်ထားသည်ထက် ပို၍ အနှောက်အယှက်ဖြစ်စရာနှင့် စိုးရိမ်စရာကောင်းနေသည်ဟု ဖော်ပြခဲ့သည်။ ထို့ပြင် လျှို့ဝှက်ကွန်ပျူတာကွန်ယက်များ မထိခိုက်သော်လည်း ဖောက်ထွင်းခံလိုက်ရသည့် ကွန်ပျူတာစနစ်တွင် သံတမန်များနှင့် အီးမေးလ်အသွားအပြန်များ၊ လူပုဂ္ဂိုလ်တစ်ဦးချင်းစီ၏ လှုပ်ရှားမှုများနှင့် ဥပဒေများ၊ သမ္မတရုံးဆိုင်ရာ အချိန်ဇယားများနှင့် ပေါ်လစီရေးရာ ဆွေးနွေးမှုများကဲ့သို့ အရေးပါသည့် သတင်းအချက်လက်များ ပါဝင်သသည်ဟု ဆိုသည်။
တာဝန်ရှိသူများကမူ အိုးဘားမား၏ အီးမေးလ် အစောင်မည်မျှကို ဟက်ကာများ ခိုးဖတ်သွားသည်နှင့် ထိုအီးမေလ်းများ၏ အရေးပါမှုကို ထုတ်ဖော်ပြောဆိုခြင်းမရှိကြောင်း၊ သမ္မတ၏ ကိုယ်ပိုင်အီးမေးလ်လိပ်စာမှာ ဖောက်ထွင်းခံရပုံမရကြောင်း၊ ထိုကဲ့သို့ ဖောက်ထွင်းဝင်ရောက်ခံရမှု၏ အတိမ်အနက်ကို အိမ်ဖြူတော် အကြီးတန်းအရာရှိများက လအနည်းငယ်အရင်ကပင် သိရှိခဲ့ကြောင်း စသဖြင့် နယူးယောက်တိုင်းမ်စ်က ထည့်သွင်းရေးသားခဲ့သည်။
အိမ်ဖြူတော် တာဝန်ရှိသူများကမူ ထိုသတင်းနှင့်ပတ်သက်၍ မည်သည့်မှတ်ချက်မှ မပေးသေးပေ။
Ref: Reuters
