မေ ၁၀၊ ၂၀၂၅
M-Media
လက်ရှိ ဖြစ်ပွားနေတဲ့ အိန္ဒိယနဲ့ ပါကစ္စတန် အပြန်အလှန် တိုက်ခိုက်မှုတွေကို အမေရိကန်နဲ့ တရုတ်အပါအဝင် တစ်ကမ္ဘာလုံးက အထူးအာရုံစိုက်နေပါတယ်။ ပါကစ္စတန်ရဲ့ တရုတ်လုပ် J-10 တိုက်လေယာဉ်တွေနဲ့ အိန္ဒိယရဲ့ ပြင်သစ်လုပ် Rafale တိုက်လေယာဉ် စီးချင်းထိုးပွဲဟာ တစ်ကမ္ဘာလုံးကို အံ့သြ မှင်သက်စေခဲ့ပါတယ်။ ဒီတိုက်ပွဲဟာ ခေတ်သစ် အဆင့်မြင့် လေကြောင်းတိုက်ခိုက်ရေးစွမ်းရည်တွေကို လက်တွေ့စမ်းသပ်တဲ့ ပွဲလည်းဖြစ်ပါတယ်။
အမေရိကန်အစိုးရ တာ၀န်ရှိသူတွေရဲ့ပြောကြားချက်အရ ပါကစ္စတန်ဘက်က အိန္ဒိယလေယာဉ် အနည်းဆုံး ၂စီးကို ပစ်ချနိုင်ခဲ့တယ်လို့ဆိုပါတယ်။ ဒီလိုပစ်ချတဲ့နေရာမှာ တရုတ်လုပ် PL-15 ဒုံးကျည်ကို အသုံးပြုခဲ့တာပါ။ ကမ္ဘာ့လက်နက်လောကကို အချိန်ကြာ လွှမ်းမိုးထားတဲ့ အနောက်ကမ္ဘာကို တရုတ်က ယှဥ်လာနိုင်ပြီလားဆိုပြီး ကမ္ဘာတစ်၀ှမ်းက စောင့်ကြည့်လာကြပါတယ်။
အချက်အလက်အချို့ကို အတည်မပြုနိုင်သေးပေမယ့် ခေတ်သစ် လေကြောင်းတိုက်ပွဲသမိုင်းမှာ ဒါဟာ နည်းဗျူဟာ၊ နည်းပညာနဲ့ လေယာဉ်မှူးတွေရဲ့ ကျွမ်းကျင်မှုကို လေ့လာနိုင်တဲ့ ရှားပါး အခွင့်အရေးတစ်ခုလည်း ဖြစ်ပါတယ်။ လေ့လာဆန်းစစ်သူတွေကတော့ ဒီဖြစ်ရပ်ဟာ အနာဂတ်မှာ ကမ္ဘာ့နိုင်ငံတွေရဲ့ လက်နက်ဝယ်ဖို့ ဆုံးဖြတ်ချက်တွေ၊ စက်ဖက်ဆိုင်ရာ နည်းပညာအဆင့်မြှင့်တင်မှုတွေအပေါ် သက်ရောက်မှုရှိနိုင်တယ်လို့ ဆိုပါတယ်။
ပစ်မှတ်ကို မမြင်နိုင်တဲ့ အခြေအနေမှာတောင် ရှာဖွေ ဖျက်ဆီးပစ်နိုင်တဲ့ တရုတ်ထုတ် PL-15 ဒုံးကျည်ရဲ့ အစွမ်းကို လက်ရှိ အိန္ဒိယ-ပါကစ္စတန် စစ်ပွဲမှာ တစ်ကမ္ဘာလုံးက မြင်တွေ့ခဲ့ကြရပါတယ်။ တရုတ်ဟာ ကာကွယ်ရေးမှာ ဆိုဗီယက်နည်းပညာတွေကို မှီခိုနေရတဲ့ အနေအထားကနေ လုံး၀ဖောက်ထွက်လာနိုင်ခဲ့တာပါ။ အမေရိကန်၊ ကာကွယ်ရေးနည်းပညာမှာ အမေရိကန်အပေါ် လုံး၀ မှီခိုနေရတဲ့ ဥရောပတို့ဟာ သူတို့ရဲ့ လက်ရှိ လေကြောင်း ကာကွယ်ရေးနည်းစနစ်တွေကို ပိုမိုအားကောင်းအောင် ဆောင်ရွက်ဖို့ စဥ်းစားနေကြပြီဖြစ်ပါတယ်။
Ref: Reuters