ဇန်န၀ါရီ ၂၆၊ ၂၀၁၄
M-Media
သီရိ
ရန်ကုန် ။ ။ အရှင်ဆန္ဒာဓိက (နတ်မှီတောရ၊ တောင်တွင်းကြီး)က “Buddhism is Not Religion” “ဗုဒ္ဓသည် ဘာသာမဟုတ်” ဟူသော ခေါင်းစဉ်ဖြင့် ဆွေးနွေးပွဲတစ်ရပ်ကို မြန်မာနိုင်ငံ ဘာသာပေါင်းစုံ လူငယ်များ ပူးပေါင်းဆောင်ရွက်ရေးအဖွဲ့ (IYCA -Myanmar) ရုံးခန်းတွင် ယနေ့ ဇန်န၀ါရီလ ၂၆ ရက်နေ့ မွန်းလွဲ ၂း၀၀-နာရီမှ ညနေ ၅း၀၀-နာရီထိ ပြုလုပ်ခဲ့ပါသည်။
“ဘာသာကြီးလေးခုဟာ ကမ္ဘာ့အမှောင်ထုကို ဖယ်ရှားပေးတဲ့ အလင်းရောင်ကြီးလေးခု ဖြစ်ပါတယ် ကမ္ဘာ့အလင်းအိမ်တွေပါပဲ၊ ဘာသာတရားတိုင်းရဲ့ အဆိုအမိန့်ကို နားလည်ထား တာဟာ ကောင်းပါတယ်။ ဘာသာတိုင်းကတော့ လူတွေကို ငြိမ်းချမ်းရေးတွေဆီ ရောက်အောင် ပို့နေကြတာပါပဲ။ ဘာသာကြီး လေးခုဟာ ဖြိုဖျက်လို့ခက်တဲ့ ကျောက်ဆောင်တွေပါပဲ။ လူတွေကို ယဉ်ကျေးစေချင်လို့ ပေါ်ထွက်လာတာပါ။ ကံသုံးပါးနဲ့ လောကကြီးကို ယဉ်ကျေးအောင် ပြုလုပ်ရမှာက အားလုံးရဲ့ တာဝန်ပါ။ ဖန်ဆင်းရှင် ဘုရားသခင်ရှိတယ် ဆိုတာကိုယုံကြည်ရမယ်။ ဘုရားဝတ်ပြု ဆုတောင်းခြင်းနဲ့ ပတ်သက်ပြီး အကျိုးတရားရှိတာကို ယုံကြည်ရမယ်။ ဘ၀ကူးပြောင်းမှုကိုလည်း ယုံကြည်ရမယ်”ဟု ဆရာတော်က မိန့်ကြားခဲ့ပါသည်။
ဆက်လက်ပြီး ဆရာတော်သည်” ဗုဒ္ဓဘာသာဆိုတာ ဘာသာမဟုတ်ပါဘူး၊ ဟောပြောချက်ပါ ဆုံးမချက်ပါ။ အဓိကတော့ ယုံကြည်မှုပါပဲ။ ကိုယ်လုပ်တဲ့ အလုပ်အပေါ်မှာ ယုံကြည်မှုခိုင်မာရမယ်၊ ဘာသာတိုင်း ဘာသာတိုင်းမှာ အစွန်းရောက်နေတဲ့ ပုဂ္ဂိုလ်တွေရှိနေသလို မြင့်မြတ်တဲ့ ပုဂ္ဂိုလ်တွေလည်း ရှိပါတယ်။ အစွဲလွန်နေတာတွေလဲ မဖြစ်ဖို့ လိုတယ်။ ဂေါတမဗုဒ္ဓ မြတ်စွာဘုရားဟာ သမိုင်းဝင် ဗုဒ္ဓဖြစ်ပါတယ်။ ဂေါတမဗုဒ္ဓ မြတ်စွာဘုရားက သူပရိနိဗ္ဗာန်စံခါနီးမှာ အားလုံးကို လွတ်လပ်ခွင့် ပေးခဲ့ပါတယ်။ ဂေါတမဗုဒ္ဓဟာ ဗုဒ္ဓ၀ါဒကို တည်ထောင်ခဲ့သူမဟုတ်ပါဘူး သူ့ဟောပြောချက်တွေကို နှောင်းလူတို့ကနေ ဗုဒ္ဓ၀ါဒကို စုစည်းခဲ့တာပါ။ အဖွဲ့အစည်းတစ်ခုရဲ့ ခေါင်းဆောင်အနေနဲ့ သူ့ကိုယ်သူမသတ်မှတ်ခဲ့ပါဘူး” ဟု ဗုဒ္ဓ၏ အဆိုအမိန့်များ ကိုလည်း မိန့်ကြားခဲ့ပါသည်။
ဘာသာကြီးတွေ အားလုံးပူးပေါင်းပြီး လောကကြီးကို ငြိမ်းချမ်းတဲ့ အသွင်ကို ဖော်ဆောင်နိုင်အောင် ကြိုးပမ်းကြရန် ဆရာတော်မှ တိုက်တွန်း နှိုးဆော်ခဲ့ပြီး တက်ရောက်လာသူများမှ သိလိုသမျှကို ဆရာတော်မှ ပြန်လည်ဖြေကြားခဲ့ပါသည်။
Leave a Reply
You must be logged in to post a comment.